“Muletwalisha”
1 Yesu ailingenye ku mwangashi, Wishi amulingenye ku Mulimi, na bakonshi bakwe abasubwa ku misambo itwala imyangashi. Ilyo alelanda pa mulimo wa Mulimi wa mampalanya, Yesu akomaile pa mulandu cacindamina ukutwalilila ukuba imisambo. (Yoh. 15:1-4) Ico tulesambililako ca kuti bonse ababa ifibusa na Yehova balingile ukuba ngo musambo uutwalisha uwa “mwangashi wine wine,” Yesu Kristu. Tulingile ukutwalilila ukutwalisha “ifisabo fya mupashi” e lyo ne fisabo fya Bufumu.—Gal. 5:22, 23; Mat. 24:14.
2 Ifisabo fya Mupashi: Ukulunduluka kwesu ukwa ku mupashi maka maka kuti kwamonekela mu fyo tulanga ifisabo fya ku mupashi. Bushe mulesha ukuba ne fisabo fya mupashi wa kwa Lesa ukupitila mu kusambilila lyonse no kulaetetula pa Cebo ca kwa Lesa? (Fil. 1:9-11) Twilashimunuka ukupepela umupashi wa mushilo pantu kuti walenga twaba ne mibele iicindika Yehova kabili kuti twalunduluka.—Luka 11:13; Yoh. 13:35.
3 Ukuba ne fisabo fya mupashi na kabili kukatwafwa ukuba abacincila mu kubila imbila nsuma. Ku ca kumwenako, ukutemwa ne citetekelo twakwata filenga tuleshako inshita ya kubombako lyonse umulimo wa kushimikila te mulandu ne milimo tubomba. Nga twaba aba mutende, abashishimisha, aba cikuuku, abafuuka, kabili nga tulailama tukeshiba ifya kucita nga baletukaanya mu mulimo wesu. Ukusekelela kulenga tuleba ne nsansa mu mulimo wesu nangu abantu tabalefwaya ukukutika.
4 Ifisabo fya Bufumu: Na kabili tulafwaya ukutwala ifisabo fya Bufumu. Muli ifi fisabo fya Bufumu mwaba no kutuula “ilambo lya kulumbanya kuli Lesa, e kutila, icisabo ca milomo iilumbula apabuuta ishina [lya kwa Yehova].” (Heb. 13:15) Tucite ci ukupitila mu kuba abacincila kabili abashipa ukubila imbila nsuma. Bushe mulebombesha ukutwalisha ifisabo fya Bufumu ukupitila mu kuwamyako ifyo mushimikila?
5 Yesu alandile ukuti abakonshi bakwe tabakaletwala impendwa imo ine iya fisabo. (Mat. 13:23) Kanshi, tatulingile ukuilinganya kuli bambi lelo tufwile ukubombela Yehova no mweo onse. (Gal. 6:4) Ukubebeta ifyo twaba ukufuma pa nshi ya mutima ukulingana ne fyo Icebo ca kwa Lesa cilanda kukatwafwa ukutwalilila ukucindika Yehova ilyo ‘tuletwalisha’ ifisabo.—Yoh. 15:8.