Mwilatana!

1. Ni mu nshila nshi ‘tushitanina busuma’ ku bantu?

¹ Nga tuli abacincila mu kubila imbila nsuma iya Bufumu bwa kwa Lesa, ninshi ‘tatuletana busuma’ ku baba mu cifulo twapeelwa ukuti tulebombelamo. (Amapi. 3:27) Takwaba ilyashi ilisuma limbi ilyo twingebako abantu bonse ilingacila pa lyashi lya kuti ku ntanshi ifintu fili no kuwama mu Bufumu bwa kwa Lesa. Nangu ca kuti limbi mulabila sana imbila nsuma iya Bufumu nga mulelanda fye ilyashi na bantu, nangu pa mulandu wa kuti mulabashila impapulo, bushe mulandu nshi te kuti mwiminine pa kutendeka isambililo nga ca kuti tamwakwata?

2. Cinshi cingalenga ukuti tufilwe ukutendeka isambililo lya Baibolo?

² Limo icilenga ukuti cafye ukulatungulula isambililo lya Baibolo mulandu fye wesu fwe bene. Bamo balafilwa ukutungulula isambililo lya Baibolo pa mulandu wa kuti tabaicetekela nangu pa mulandu wa kuti balikwata sana ifya kucita. Ifyo twalamwebako muli cino cipande fili no kumwafwa pa kuti mwilafilwa ukulabombako uyu mulimo wa masambililo ya Baibolo.—Mat. 28:19; Imil. 20:20.

3. Cinshi calenga ukuti tulinge ukulasambilisha abantu Baibolo?

³ Ukukanaicetekela: Nalimo tamwasambilila sana nangu limbi mumona kwati tamutungulula bwino isambililo lya Baibolo. Abena Kristu ba kubalilapo abaishibe sana ukushimikila baali “bantu bashasambilila.” Cinshi cabafwile ukulasambilishako bambi icine? “Baali pamo na Yesu.” (Imil. 4:13) Basambilile kuli Kasambilisha Mukalamba, Yesu, kabili ifyo Yesu alesambilisha fyonse fyalilembwa no kufibelenga kuti twafibelenga mu Malembo. Nangu ca kuti tamwasambilila, pali ino nshita mulesambilishiwa amasambililo ayacila pa masambililo ya ku sukulu.—Esa. 50:4; 2 Kor. 3:5.

4. Finshi twingasambilila kuli Amose?

⁴ Yehova limo limo aletuma bakasesema ukuyakalipila bakateka abalelufyanya nangu abantu bambi abakankaala. Kasesema umo uo apeele umulimo ni Amose, aali fye mupiina. Amose aliyilandiile umwine ati: “Ine nshili kasesema, kabili nshili mwana wa kwa kasesema; ndi mucemi, kabili wa kusunge mikunyu.” (Amose 7:14) Na lyo line, ifyo Yehova apingwile Amasia shimapepo uwalepepa umwana wa ng’ombe Amose tashimbile ukuya mweba. (Amose 7:16, 17) Tulingile tuleibukisha lyonse fye ukuti tubomba umulimo wa kwa Lesa kabili Lesa wine e ukatulanga ifya kubomba umulimo alefwaya tubombe.—2 Tim. 3:17.

5. Mulandu nshi tulingile ukwesesha na maka ukutendeka isambililo lya Baibolo nangu twalikwata ifya kucita ifingi?

⁵ Ukukwata Ifya Kucita Ifingi: Nangu nga mwalikwata imilimo iingi iya kubomba, nakalimo mulashako inshita ya kuya mu mulimo wa mwi bala lyonse. Ukutungulula isambililo lya Baibolo mulimo mwingaipakisha icine cine. Ala cilawama ukumona uko Icebo ca kwa Yehova cileafwa umuntu ukwaluka. (Heb. 4:12) Yehova alatemwa nga tuleipeelesha ukwafwa umuntu pa kuti ‘afike ku kwishiba bwino bwino icine.’ (1 Tim. 2:4) Nangu fye ni bamalaika, na bo balomfwa bwino nga nshi nga bamona ukuti umuntu wali kale imbifi ayaluka alaya na pa ntanshi mu kulabombela Lesa.—Luka 15:10.

6. Mulimo nshi uwacindama uo twakwata uwa kucita ukufwaya kwa kwa Lesa?

⁶ Lesa afwaya ukuti abantu bonse bakapusuke no kuti beshibe icine. (1 Tim. 2:4) Ala twalishuka nga nshi pa kulabomba umulimo uo Lesa afwaya ukuti tulebomba, twilashiimashiima ukutungulula amasambililo ya Baibolo!