Sansamusheni Abali no Bulanda

¹ Ukutula apo abantu babela pano calo, ino nshita e lyo abantu balefwaikwa sana ukusansamusha ukucila kale. Ukukonka ica kumwenako ca Mfumu yesu, Kristu Yesu, ne fwe bene tulabomba ‘ukukakila abafunaike misana.’—Esa. 61:1.

² Inshila ya Kusansamushishamo Abantu: Pa kusansamusha abantu, umulimo wesu uwa kushimikila ulingile wamoneka ukuti wa kusansamusha abantu. Tatulingile ukukoselela ukulanda sana pa fyabipa na pa fisambilisho fya bufi, kano ukukoselela ukulanda pe subilo lisuma ilyo Lesa alaya ilya kusansamusha abantu. Lelo tacilolele mu kuti te kuti tulanshanye na bantu pali Armagedone. Umulimo wesu wa kubila “umwaka wa luse lwa kwa Yehova, no bushiku bwa cilandushi ca kwa Lesa wesu,” e lyo no “kusoka umubifi ukuti afume ku mibele yakwe iya bubifi.” Nomba nangu cibe fyo, ukusoka abantu pali Armagedone no kulondolola ubukulu bwa iyi nkondo tafilingile ukuba sana pa ntanshi ica kuti twasuula na ku lyashi lya “imbila nsuma iya Bufumu bwa kwa Lesa.”—Esa. 61:2; Esek. 3:18; Mat. 24:14.

³ Ukuya ku Mwinshi no Mwinshi: Caliseeka sana ukusanga abantu aba bulanda pa mulandu wa kulwala, ukufwilwa, ulufyengo, nangu pa mulandu wa bwafya bwa kusanga umwa kwikalila. Ifwe fwe bapashanya Kristu, ‘tulekatwa inkumbu’ kabili tulalanga umutima wa cililishi ku bantu abo tusanga mu mulimo. (Luka 7:13; Rom. 12:15) Nangu tulanshanye no muntu ilembo limo nangu yabili ukulosha ku bwafya umuntu akwete, na lyo line tulingile ukuba “abayanguka ukumfwa,” no kuleka umuntu afumye icili ku mukoshi. (Yak. 1:19) Nga twabala twaumfwa ifyo umuntu alanda, e lyo twingeshiba ne fya kumusansamusha.

⁴ Ilyo tulelanshanya na bantu, kuti twamona fwe bene ilyo twingalanda ukuti, “Ndefwaya ukumwebako amashiwi ya kukoselesha aya muli Baibolo.” Tulingile ukucenjela pa kuti tatuleti fye nga twaumfwa conse ico umuntu alanda ico twaishiba ukuti bufi ifwe ninshi kukaana. Lelo, tulingile ukubika amano ku kukoselesha no kusansamushisha umuntu mu Malembo pa kuti twinganasha umutima wakwe. Lyena kuti mwayalukila ku citabo ca kuti Ukupelulula Ukufuma mu Malembo amabula 325-328 pa mutwe wa kuti “Ukukoselesha.” Nangu kuti mwapeela umwine wa ng’anda trakiti ya kuti Ukusansamusha ku Bapopomenwa e lyo mwapituluka na mu fyebo fya kukoselesha ifyabamo.

⁵ Mulemona Ilyo Mwingasansamushako Abantu: Bushe namwishibapo umo nampo nga mwina mupalamano, uo mubomba nankwe incito, umwana we sukulu munenu, nangu umo mu lupwa uulefwaikwa ukusansamusha? Bushe mulandu nshi te kuti muyile mu kutandalila abantu ba musango yu ku kuyabasansamushako mu Malembo? Nga namwishiba ubwafya bakwete, kuti mwapekanya ukulingana no bo bwine ubwafya bakwete. Bambi ifyo bacita pa kusansamushako abantu, babalembela fye amakalata nangu ukubatumina foni. Ukutemwa kwa cine cine ku bantu banensu kuti kwatulenga ukuba no mutima wa cililishi no kufwaya ukubasansamushako mu Malembo.—Luka 10:25-37.

⁶ Ca cine, twalipeelwa umulimo wa kusansamusha abaloosha, ukukoselesha aba mitima ya bulanda, e lyo no kubakoselesha ukukwata isubilo line line. Uku e kusansamusha uko abantu icalo fye conse bafwaya. Ukulanda ne nsansa pa fintu ifingi ifisuma ifyo Lesa alaya, kuti kwasansamusha abantu ba mitima yafumaluka no kubalenga ukukwata isubilo. Lekeni lyonse tuleibukisha ukuti tulingile ukukakila abafunaike misana.