Twalikwata Ifyo Twingapeela Yehova
1 Bushe mwalishiba ukuti abantunse balikwata ifintu ifyo bengapeela Lesa? Abele, alituulile kuli Yehova ifiteekwa fyakwe fimo, kabili bambi abatuulile ifiteekwa kuli Lesa ni Noa na Yobo. (Ukute. 4:4; 8:20; Yobo 1:5) Lelo kwena ifya bupe ifyo bamupeele tafyalengele Kabumba ukubeelako umukankaala pantu e mwine wa fintu fyonse. Nomba ifya bupe ifyo bapeele Lesa fyalangilile ukuti balya bantu aba citetekelo balimutemenwe sana. Muno nshiku kuti twabomfya inshita yesu, amaka, ne fyuma fyesu ukutuula kuli Yehova “ilambo lya kulumbanya.”—Heb. 13:15.
2 Inshita: Ala cisuma nga nshi ‘ukubomfya bwino inshita’ pa kuti tulebombako sana umulimo wa kubila imbila nsuma! (Efes. 5:15, 16) Nomba pa kuti twingabombako, nalimo kano twayalula ifyo tubomba imilimo yesu imo pa kuti twingabombako bupainiya bwa kwafwilisha umweshi umo nangu imyeshi iingiko mu mwaka. E lyo limbi kuti twalundako fye inshita tubomba umulimo wa kushimikila. Nga ca kuti cila mulungu tulelundako fye amamineti 30 mu mulimo ninshi ilyo umweshi uleisa ku kupwa kuti twaba natulundako amaawala yabili no kucilapo!
3 Amaka: Nga tulefwaya ukukwata amaka ya kubomba mu mulimo, tatulingile ukutemwa ifyangalo fimo no kulabomba incito shimo ifingalalenga tulenaka sana ica kuti twalafilwa no kupeela Yehova ifyawamisha. Kabili tatulingile ukuleka amasakamiko ukulenga ‘umutima ukusakamana,’ ica kuti na maka ya kubombela Lesa yabula. (Amapi. 12:25) Nangu pali icintu icikankaala icitusakamike, icingawama ‘kupoosa pali Yehova icisendo cesu’!—Amalu. 55:22; Fil. 4:6, 7.
4 Ifyuma: Kuti twapeela ne fyuma fyesu ku mulimo wa kushimikila. Paulo akoseleshe Abena Kristu banankwe ukuti lyonse balingile ‘ukulapaatulapo fimo’ pa kuti balekwata ifya kupeelako abalebulisha. (1 Kor. 16:1, 2) Na ifwe kuti tulesungako indalama sha kupeela ku kubomfya pa cilonganino e lyo na ku mulimo wa mwi sonde lyonse. Yehova alatasha ubupe ubo tupeela no mutima onse, nangu ubo bupe buceepe shani.—Luka 21:1-4.
5 Yehova alitupeela ifintu ifingi nga nshi. (Yako. 1:17) Kuti twalangilila ukuti tulatasha pa fyo atupeela nga tulepoosa inshita iikalamba mu mulimo wakwe, ukulabombesha, e lyo no kulabomfya ifyuma fyesu pa kumubombela. Nga tulecite ifi kuti twatemuna Yehova, “pantu Lesa atemwa uupeela ne nsansa.”—2 Kor. 9:7.