‘Muletootela’
1 Ilyo Yesu apooseshe aba fibashi ikumi, umo fye e wabwelele ku kumutasha. Yesu aipwishe ukuti: “Bushe te bantu ikumi (10) abasangulwilwe? Nga kanshi bambi pabula (9) bali kwi?” (Luka 17:11-19) Kanshi caliwama ukulatasha, kabili tufwile no kulatootela Yehova Lesa Shifwe uwa mu muulu uwaba kapekape, uwakwata ukutemwa, uutupeela ica bupe conse icisuma kabili icapwililika!—Kol. 3:15; Yako. 1:17.
2 Fintu nshi fimo ifyo twingatashishapo Lesa? Tulamutasha pa kutupeela icilubula icaba ica bupe icakulisha ico apeela umutundu wa muntu. (Yoh. 3:16) Tulamutasha na pa kutupalamika kuli wena. (Yoh. 6:44) Na kabili tulamutasha pa fyo twaikatana mu cilonganino ca Bwina Kristu. (Amalu. 133:1-3) Kwena fingi ifya bupe ifyo mwingatontonkanyapo ifyo Yehova atupeela. Twiba nga bena Israele abashaletasha kabili abalabile fyonse ifyo Yehova abacitile.—Amalu. 106:12, 13.
3 Muletootela: Nangu ca kutila aba fibashi bonse 10 balitemenwe ifyo Yesu abacitile, umo fye e wamutashishe. (Luka 17:15) Kanshi na ifwe bene kuti twalanga ukuti tulatasha Lesa nga tuli abacincila mu mulimo wa mwi bala. Nga tulatasha mu cine cine pa fyo Shifwe wa mu muulu uwakwata ukutemwa kabili kapekape acita, na ifwe tukalafwaya ukumupashanya pa kwebako bambi pali wena. (Luka 6:45) Ilyo tuleebako bambi pa ‘fipesha amano na matontonkanyo ya kwa Yehova,’ e lyo tukacilanapo ukumutemwa no kulamutasha sana.—Amalu. 40:5.
4 Mulekoselesha Bambi Ukulatasha: Tufwile ukufwaya inshila isha kwafwilamo abana besu na masambililo yesu aya Baibolo ukulatasha Lesa. Abafyashi balikwata utushita utwingi uto bengalangilapo abana babo ifya kutasha Lesa. Ku ca kumwenako, kuti bacite fyo pa nshita baleipakisha na bana babo ukumona ifyo Yehova abumba. (Rom. 1:20) Ilyo tuletungulula isambililo lya Baibolo napamo kuti twaipusha isambililo lyesu ukuti, “Bushe ifi tulesambilila pali Yehova filetweba ukuti aba shani?” Ilyo umusambi aleya aletemwa ifyo alesambilila, no kutemwa Lesa na ko kwine kwakulaya kulekulilako kabili lyonse akalafwaya ukumutemuna.
5 Muli shino nshiku sha kulekelesha abantu abengi tabatasha. (2 Tim. 3:1, 2) Yehova afwile alatemwa sana ukumona uko abantu bakwe abaipeelesha balelanga ukuti balatasha ilyo balebombesha mu mulimo wa kushimikila!—Yako. 1:22-25.