‘Konkeni Bwino Bwino mu Ntampulo Shakwe’
1. Pa kuti tube bakashimikila bene bene kuti twacita shani?
1 Nangu ca kuti Yesu tasambilile ku masukulu ya barabi, alicilile abantu bonse ukushimikila Icebo ca kwa Lesa. Nomba ico twatemwako ca kuti, ifyo Yesu aleshimikila fyalilembwa no kusungwa bwino bwino pa kuti na ifwe tusambilileko. Pa kuti tube bakashimikila bene bene tufwile ‘ukukonka bwino bwino mu ntampulo shakwe.’—1 Pet. 2:21.
2. Bushe cinshi cikatwaafwa ukutemwa abantu nge fyo Yesu abatemenwe?
2 Muletemwa Abantu: Icalengele ukuti Yesu aleshimikila abantu ni co alibatemenwe. (Marko 6:30-34) Abengi umo tushimikila ‘balecululuka’ ukufwayafwaya Icebo ca kwa Lesa. (Rom. 8:22) Nga twatontonkanya ifyo aba bantu bapelelwa na pa fyo Yehova abatemwa, cikatulenga ukutwalilila ukulabashimikila. (2 Pet. 3:9) Na kabili abantu bakakutika ku fyo tulebashimikila nga bamona ukuti natubatemwa icine cine.
3. Ni kwi Yesu ashimikile abantu?
3 Shimikileni Konse Uko Mwasanga Bantu: Yesu ashimikile imbila nsuma konse uko alesanga abantu. (Mat. 4:23; 9:9; Yoh. 4:7-10) Na ifwe bene, kuti twashimikila imbila nsuma ilyo tulebomba imilimo yesu cila bushiku. Bamo balasenda Baibolo ne mpapulo lyonse pa kuti baleshimikila ku ncito, ku sukulu, pa bulendo nangu ilyo baleshita fimo nelyo ilyo balecita ifintu fimbi.
4. Bushe ilyo tuleshimikila, kuti twacita shani pa kuti Ubufumu bwaba e mutwe uwe lyashi tulelandapo?
4 Ico Mufwile Ukulandapo Sana, Bufumu: Umutwe wa lyashi uo Yesu aleshimikila walelanda pa Bufumu. (Luka 4:43) Nangu ca kuti ilyo tuleshimikila te kuti tulande pa Bufumu apo pene, lelo tulingile ukwaafwa uo tuleshimikilako ukwishiba umulandu tufwaila Ubufumu kwa Lesa ukwisa. Nangu ca kuti tulelanda pa mibele yabipa iilangisha ukuti tuli mu nshiku sha kulekelesha, icikalamba ico ‘tubila ni mbila nsuma iya fisuma.’—Rom. 10:15.
5. Bushe kuti twabomfya shani Baibolo pa kuti twashimikila bwino abantu?
5 Lyonse Mulebomfya Icebo ca kwa Lesa: Lyonse ilyo Yesu aleshimikila alebomfya Icebo ca kwa Lesa. Kabili ifyo alesambilisha tafyali fyakwe. (Yoh. 7:16, 18) Alebelenga Icebo ca kwa Lesa kabili alecibomfya ilyo Satana alemutunka. (Mat. 4:1-4) Na ifwe bene pa kuti tusambilishe bwino abantu, tufwile ukulabelenga Baibolo lyonse no kulacita ifyo tulesambilila. (Rom. 2:21) Ilyo tuleasuka amepusho mu mulimo wa mwi bala, tulingile ukulanda ifyo Amalembo yasosa e lyo no kubelenga Baibolo nga cingacitika. Ico tucitile fyo, kufwaya abantu ukwishiba ukuti ifyo tulebeba te matontonkanyo yesu, lelo Cebo ca kwa Lesa.
6. Finshi Yesu acitile pa kuti afike pa mitima ya bantu alesambilisha?
6 Ilyo Mulesambilisha Abantu Bafikeni pa Mutima: “Takwatala akuba umuntu uulanda filya.” (Yoh. 7:46) Aya e mashiwi ayo bamushika bayaswike ilyo babepwishe kuli bashimapepo bakalamba na baFarise umulandu bashaikatile Yesu. Ilyo Yesu alesambilisha bantu, talebeba fye ifishinka, lelo alebasambilisha bwino sana ica kuti fyalebekata ku mutima. (Luka 24:32) Alebomfya ifilangililo ifyo abantu baishibe pa kuti abafwe ukumfwikisha ifyo alelandapo. (Mat. 13:34) Yesu talelanda ifyebo ifingi ica kuti abalekutika bafilwa ukufyumfwa. (Yoh. 16:12) Talefwaya ukuti bamucindike lelo alefwaya ilumbo lyonse ukuya kuli Yehova. Kanshi na ifwe kuti twaba bakasambilisha basuma ukupala Yesu, nga ‘tuleangwa ifyo tusambilisha.’—1 Tim. 4:16.
7. Mulandu nshi Yesu ashalekele ukushimikila?
7 Mwileka Ukushimikila: Nangu ca kutila Yesu alecita ifipesha amano, abengi tabalekutika ku fyo alesosa. (Luka 10:13) Nangu fye ni balupwa lwa kwa Yesu nabo bene baleti “napena.” (Marko 3:21) Nangu bamwebele fyo, Yesu talekele ukushimikila. Atwalilile fye ukuba ne nsansa pantu alishininkishe ukuti ifyo alelanda fyali fya cine kabili fyali no kulenga abantu ukuba abantungwa. (Yoh. 8:32) Apo Yehova alatwafwa, na ifwe bene tatwakaleke ukubomba umulimo wakwe.—2 Kor. 4:1.
8, 9. Bushe kuti twaipusula shani nga fintu Yesu acitile pa mulandu wa mbila nsuma?
8 Ipusuleni Fimo pa Kuti fye Mulebombesha: Yesu aliipuswile ifya ku mubili pa mulandu wa kushimikile imbila nsuma. (Mat. 8:20) Alebombesha ica kuti limo limo aleshimikila ukufika fye ne cungulo. (Marko 6:35, 36) Yesu alishibe ukuti inshita iya kupwisha umulimo wakwe yalicepele. Apo ‘inshita iyashalako naipipa,’ na ifwe bene tufwile ukupashanya Yesu pa kulapeela kuli Lesa inshita yesu, na maka, e lyo no kulabomfya ifikwatwa fyesu mu mulimo wakwe.—1 Kor. 7:29-31.
9 Abena Kristu bakubalilapo bali bakashimikila bene bene pantu basambilile kuli Yesu. (Imil. 4:13) Na ifwe bene tukalabombesha nga tulepashanya Yesu uwaishibishe sana ukushimikila ukucila abantu bonse.—2 Tim. 4:5.