Sansamusheni Abaleloosha
1. Mulandu nshi tufwile ukusansamushisha abaleloosha?
1 Abantu balaba aba bulanda nga nshi ilyo uo batemwa afwa, cilacilapo no kubipa nga ca kutila tabasubila ukuti Ubufumu bwa kwa Lesa bukafumyapo imfwa. (1 Tes. 4:13) Abengi balepusha ukuti: ‘Mulandu nshi abantu bafwila? Bushe ni kwisa baya nga bafwa? Bushe nkatalamonapo umuntu wandi na kabili?’ Lekeni nomba tulande pa fyo twingasansamusha abo tusanga mu mulimo wa mwi bala abaleloosha balupwa lwabo nelyo ifibusa.—Esa. 61:2.
2. Nga ca kutila abo twasanga pa ng’anda batweba ukuti bali ne cililo, bushe ni lyonse twingapoosa inshita iikalamba ukubashimikila?
2 Ilyo Tuleshimikila ku Ng’anda ne Ng’anda: Abo twasanga pa ng’anda nalimo kuti batweba ukuti lupwa lwabo nafwa. Bushe twabasanga balelila? Bushe mu ng’anda muli balupwa abengi abaleloosha? Pali aka kashita nalimo te kuti ciwame ukupoosapo inshita iikalamba ukubashimikila. (Luk. Mil. 3:1, 7) Limbi kuti cawama ukubeba ukuti tuli aba bulanda pa kumfwa ukuti bali ne cililo, lyena kuti twabashila trakiti, nelyo magazini nangu broshuwa, kabili mucinshi mucinshi kuti twabasha. Kuti twabwelelako pa nshita imbi iyo twingamona ukuti nomba kuti twalanshanya nabo no kubasansamusha ne fyebo ifyaba mu Baibolo.
3. Nga twamona ukuti nacilinga ukulanshanya na baleloosha, malembo nshi twingababelengela?
3 Inshita shimo kuti twalanda ifingi ku bantu twasanga pa cililo pa muku wa kubalilapo fye nga ca kutila twamona ukuti nacilinga. Nangu ca kutila iyi te nshita ya kusuusha ifisambilisho fya bufi, nalimo kuti cawama ukubelenga nabo ifyo Baibolo yalaya pa kubuuka. (Yoh. 5:28, 29) Nelyo, kuti twabalanga ifyo Baibolo ilanda pa fyo abantu baba nga bafwa. (Luk. Mil. 9:5, 10) Ukubabelengela ilyashi lya mu Baibolo ililanda pa kubuuka kuti lya basansamusha. (Yoh. 11:39-44) Na cimbi ico twingacita kulanda nabo pa fyo Yobo uwakwete icitetekelo muli Yehova asubilemo. (Yobo 14:14, 15) Ilyo tushilaya, kuti twabashila amabroshuwa yatila Cinshi Cicitika nga Twafwa?, Ilyo Untu Watemwa Afwa, nelyo broshuwa nangu trakiti ili yonse ingabasansamusha. Nalimo kuti twabashila Icitabo citila Cinshi Baibolo Isambilisha, no kubeba ukubelenga icipandwa 6, kabili kuti twapangana ukwisalanshanya nabo ilyo tukabwelelako.
4. Ni pa tushita nshi tumbi apo twingakwata ishuko lya kusansamusha abafwililwe?
4 Pa Tushita Tumbi: Nga baletele icililo ku Ng’anda ya Bufumu, kabili kuli abantu abashili Inte sha kwa Yehova, kuti cawama ukubapeela impapulo ishingabasansamusha. Pa fililo fimo abantu balatemwa ukupokako impapulo isha kusansamusha balupwa abaleloosha. Limo limo kuti mwakwata ishuko lya kulemba ka kalata akepi aka kusansamusha abafwililwe nga mwamona mu nyunshipepala umo beshibisha balupwa ne fibusa pa bafwile. Lintu umwaume umo uwafwililwe umukashi wakwe apokelele kalata ya cisansamushi pamo na matrakiti, aile no mwana wakwe umukashana ku ng’anda ya kwa Nte no kumwipusha ukuti: “Bushe ni mwe mwacintumina kalata? Ndefwaya ukwishiba ifingi pali Baibolo!” Uyu mwaume no mwana wakwe balitendeke ukusambilila Baibolo no kulasangwa mu kulongana.
5. Mulandu nshi tufwile ukubikilako amano ukumona ifingalenga twakwata ishuko lya kusansamusha abaleloosha?
5 Pali Lukala Milandu 7:2 patila: “Cisuma ukuya ku ng’anda ya kuloosha, ukucilo kuya ku ng’anda ya mutebeto.” Abaleloosha ilingi line kuti batemwa ukumfwa Icebo ca kwa Lesa ukucila fye na balesangalala. Bonse tufwile ukubikako amano ukumona ifingalenga twakwata ishuko lya kusansamusha abaleloosha abantu babo.