Shimikileni Ukwabula Ukuleka

¹ Inshita shimo, kuti twamona kwati mu cifulo tushimikila twalibombelamo imiku iingi lelo te bengi bakutika. Nomba, kwaliba imilandu iilenga tuleshimikila ukwabula ukuleka.—Mat. 28:19, 20.

² Ku Kuba Ubunte: Yesu asobele ukuti ukubila Ubufumu kwali no kuba cishibilo icikalamba ica “mpela ya bwikashi,” kabili atile kwali no ‘kuba ubunte ku nko shonse.’ (Mat. 24:3, 14) Abantu nga baletumona tulebila imbila nsuma iya Bufumu, ninshi tulebila ubunte ubukalamba. Nga twafuma mu cifulo tulebombela, abantu bamo nalimo kuti balalanda pa kutandala kwesu pa nshita iitali nelyo pa nshiku ishingi, nangu ca kuti tabakutike ku mbila nsuma. Ukwishiba imilandu tuyila mu kushimikila kulalenga tuleba no mute. Tulatemuna Yehova nga tulebombako umulimo wa kulenga ubusesemo bwa mu Baibolo ukufikilishiwa. Tucite ifi ilyo tuleshimikila abantu imbila nsuma no kubasoka pa bonaushi ubuli mupepi.—2 Tes. 1:6-9.

³ Tulingile Ukuba no Mute: Apo ifipumfyanya abantu fingi ne fibaliila inshita na fyo fingi, kanshi pa kuti twafwe abantu abalefwaya ukusambilila Baibolo kano tuli no mute. BaNte baletandalila umwanakashi umo cila mulungu pa mwaka umo uutuntulu, asukile alabengisha mu ng’anda no kulalanda nabo ifya mu Baibolo. Alitemenwe ifyo aumfwile ica kuti alisumine isambililo lya Baibolo, atendeke ukusangwa ku kulongana, kabili tapakokwele alefwaya ukubatishiwa.

⁴ Ifintu mu calo filealuka lubilo lubilo, na bantu nabo balealuka. Abengi abalekana ukubashimikila kale, pali ino nshita limbi kuti bafwaya ukukutika ku mbila nsuma iyo tubila. Nangu fye muntu umo e wakutika ku mbila nsuma iya Bufumu, ninshi tatulebombela ibusha.

⁵ Mu calo conse, abantu abengi “[baleteta] no kulila pa fya muselu fyonse ifilecitwa.” (Esek. 9:4) Ififuma mu mulimo wesu uwa kubila filangilila ukuti ababa ne mitima iisuma balekutika ku mbila nsuma iya Bufumu. (Esa. 2:2, 3) E ico, tuleshimikila ukwabula ukuleka ukupitila mu kuba no mute mu ‘kubile mbila nsuma.’—Esa. 52:7; Imil. 5:42