Sambilisheni Bambi Ukutemwa Yehova
1. Cinshi cilenga bamo ukupalama kuli Yehova?
1 Bushe muleibukisha ifyo mwaumfwile ilyo fye mwasambilile pali Yehova? Cinshi calengele ukuti mupalame kuli ena? Abantu abengi aba mitima ya bufumacumi kuti bamweba ukuti ukusambilila pa mibele ya kwa Kabumba iisuma nga nshi, sana sana pa cikuuku cakwe no kutemwa e kwalengele ukuti bapalame kuli ena.—1 Yoh. 4:8.
2, 3. Bushe kuti twabomfya shani icitabo ca kuti Ico Baibolo Isambilisha ukwafwa abasambi ba Baibolo ukutemwa sana Yehova?
2 “Lesa Wesu Uyu”: Icitabo citila Ico Baibolo Isambilisha cilanda sana pa kutemwa kwa kwa Yehova no mulandu tufwile ukubela ifibusa fyakwe. Kuti twabomfya shani ici citabo ukusambilisha abantu ukutemwa sana Lesa? Ilyo mulesambilila icishinka icipya, kuti mwaipusha umusambi amepusho ayengalenga mwaishiba ifyo aletontonkanya, amepusho pamo nga aya: “Bushe ici cishinka ciletusambilisha finshi pali Yehova?” nelyo “Bushe ici cishinka cilelanga shani ukuti Yehova Mufyashi umusuma uo umuntu onse engafwaya ukukwata?” Nga tulesambilisha abasambi muli iyi nshila tukabafwa ukuba ifibusa fya kwa Yehova ku ciyayaya.
3 Nga twaafwa abasambi ba Baibolo ukwishiba ukuti lishuko sana ukwishiba Lesa wa cine kabili uwa mweo, na bo bakasuminisha amashiwi ya kwa Esaya aya kuti, “Lesa wesu uyu.” (Esa. 25:9) Ilyo tulelondolola Icebo ca kwa Lesa, tulingile ukukomaila pa fyo abantu bakapaalwa ilyo ukufwaya kwa kwa Yehova kukafikilishiwa lintu Kristu Yesu akalateka mu bufumu bwa kwa Lesa.—Esa. 9:6, 7.
4, 5. Bushe ukutemwa Yehova kwalola mwi?
4 Ubushininkisho bwa Kuti Twalitemwa Yehova: Twalishiba ukuti ukutemwa Yehova no mutima wesu onse, umweo wesu onse, no kutontonkanya kwesu konse kwalicila pa kulanda fye ukuti twalimutemwa. Tufwile ukwishiba ifyo atontonkanya pa fintu no kulacita ifintu ukulingana no kutontonkanya kwakwe. (Amalu. 97:10) Ukutemwa Lesa kumonekela mu kumfwila amafunde yakwe yonse no kutwalilila ne “myendele ya mushilo ne milimo ya kuipeelesha kuli bukapepa,” nangu tukwate amafya nelyo ukutukaanya.—2 Pet. 3:11; 2 Yoh. 6.
5 Tulomfwa bwino ukubombela Lesa pantu twalimutemwa. (Amalu. 40:8) Umusambi wa Baibolo afwile ukwishiba ukuti amafunde yonse ayo Lesa abikako yabelako ukuti ababomfi bakwe bakamwenemo ku ciyayaya. (Amala. 10:12, 13) Nga tulekonka ubutungulushi bwa kwa Yehova, tulanga ukuti tulatasha sana pa milimo iisuma nga nshi iyo Yehova acita. Afweni umusambi ukwishiba ukuti ukwenda mu mibele yalungama iya kwa Yehova kukamulenga ukusengauka amafya ayesa pa mulandu wa kukaanaenda mu mibele ya kwa Yehova.
6. Mapaalo nshi umuntu engakwata pa mulandu wa kutemwa Yehova?
6 Amapaalo Ayo Abatemwa Lesa Bakwata: Yehova alasakamana sana abantu abaicefya abamutemwa, kabili alabasokolwela ‘ifyashika fyakwe.’ (1 Kor. 2:9, 10) Apo balishiba ifyo Yehova afwaya, balishiba bwino ifyo ifintu fikaba ku ntanshi kabili balikwata ne subilo lya cine cine. (Yer. 29:11) Yehova wa cikuuku sana ku bantu abamutemwa. (Ukufu. 20:6) Balicindamika isubilo bakwata ilya bumi bwa muyayaya pa mulandu wa kuti Lesa alibatemwa nga nshi.—Yoh. 3:16.
7. Bushe mumfwa shani ukusambilisha bambi ukutemwa Yehova?
7 Ilyo twasambilila ifingi pali Shifwe wa ku muulu, e lyo tufwile ukwebako bambi ifyo twasambilila. (Mat. 13:52) Ala mwandini lishuko nga nshi ukusambilisha bambi ukutemwa Yehova, sana sana abana besu! (Amala. 6:5-7) E ico kanshi, ifwe pamo na basambi besu aba Baibolo natutwalilile ukulalumbanya Yehova ilyo tulemona ‘ubwingi bwa busuma bwakwe.’—Amalu. 145:7.