Ilyo Lesa aleteka icalo, ifya mweo fyonse fyalikatene kabili kwali umutende
Cinshi Tufwaila Ubufumu bwa kwa Lesa?
Ilyo Kabumba wesu, uwakwata ishina lya kuti Yehova abumbile abantu bakubalilapo, e wali fye Kateka eka kabili aleteka bwino. Alibapangiile ibala lya Edeni ilisuma umo bali no kulaikala kabili mwali ifya kulya ifingi. Na kabili alibapeele imilimo iisuma iyo bali no kulabomba. (Ukutendeka 1:28, 29; 2:8, 15) Abantu abaleka Lesa atwalilila ukubatungulula, nga balitwalilile ukuba abaikatana no kulaikala mu mutende.
Abantu bakubalilapo balikene ukuti Lesa alebateka
Baibolo ilanda ukuti malaika umo alisuushishe imitekele ya kwa Lesa kabili aishileba Satana Kasebanya. Alandile ukuti abantu kuti baba ne nsansa nga ca kuti Lesa talebateka nelyo ukubatungulula. Ku ca bulanda, abafyashi besu aba kubalilapo Adamu na Efa balikonkelele Satana kabili balipondokele Lesa.—Ukutendeka 3:1-6; Ukusokolola 12:9.
Pa mulandu wa kuti Adamu na Efa balefwaya ukulaiteka, Lesa alibatamfishe mwi bala lya Edeni umo baleikala kabili balitendeke ukulwala no ukufwa. (Ukutendeka 3:17-19) Apo balipondokele Lesa, abana abo balekwata balelwala no kufwa. Baibolo itila apo Adamu alibembwike, ‘ulubembu lwalingile pano calo ne mfwa yaingilile mu lubembu.’ (Abena Roma 5:12) Na kabili pa mulandu wa kuti tatwapwililika, “umuntu atekela umuntu munankwe ku kumucusha.” (Lukala Milandu 8:9) E ico Abantu nga baleteka abantu banabo kulaba amafya.
IFYO ABANTU BATENDEKE UKUITEKA
Nimrode alipondokele Yehova
Umuntu wa kubalilapo uo Baibolo yalandapo ukuti ali kateka ni Nimrode, kabili alelwisha imitekele ya kwa Yehova. Ukufuma fye ilyo Nimrode ali pano calo, intungulushi shilabomfya amaka bubi bubi. Imyaka 3,000 iyapita, Imfumu Solomone yatile: ‘Nalimwene ifilamba fya batitikishiwa, lelo tabakwete uwa kubasansamusha, kabili abalebatitikisha balikwatishe amaka.’—Lukala Milandu 4:1.
Na ino ine nshita e fyo caba. Mu mwaka wa 2009 Ulupapulo lwa ba United Nations lumo lwatile, abantu baleya balesumina ukuti imitekele yabipa yaba pa fintu “ifilenga mu calo mube amafya.”
INSHITA IYO LESA AKAWAMYA IFINTU
Ifintu kuti fyaba fye bwino mu calo nga mwaba kateka umusuma no buteko ubusuma. Na kuba, ifi fine e fyo Kabumba wesu atulaya.
Nangu fye mabuteko ya bantunse ayasuma sana yalafilwa ukupwisha amafya tukwata
Ubufumu bwa kwa Lesa buteko bwa ku muulu ubo Lesa abikako ubukafumyapo amabuteko ya bantu, kabili bwena “bukeminina umuyayaya.” (Daniele 2:44) Ubu bwine Ubufumu e bo abantu abengi bapepela ukuti bwise. (Mateo 6:9, 10) Na lyo line, Lesa te ukalateka ubu Ubufumu, lelo alisala Kateka uwalipo umuntu. Nani asala?