Ifyo Tubomba Umulimo E Filanga Ifyo Twatemwa Lesa
1. Bushe ukutemwa Lesa kwalengele ukuti Yesu alecita cinshi?
1 Ukutemwa kwalengele ukuti Yesu alebomba umulimo apeelwe. Imilimo yonse iyo Yesu alebomba yalelangilila fye apabuuta tuutu ukuti alitemenwe Yehova. Yesu atile: “Pa kuti aba muli ici calo beshibe ukuti nalitemwa Tata, filya fine na Tata ampeela ifunde, e fyo na ine ndecita.” (Yoh. 14:31) Na ifwe fwe bakonka Yesu, mu mulimo uo tubomba, e mo twakwatila ishuko lya kulangilila ukuti twalitemwa Lesa icine cine.—Mat. 22:37; Efes. 5:1, 2.
2. Bushe ukutemwa Yehova kuti kwalenga twalabomba shani umulimo twapeelwa?
2 “Ishina Lyenu Libe Ilya Mushilo”: Nga tulelanda pali Yehova na pa Bufumu bwakwe konse fye uko twasanga abantu, ninshi tulelangilila ukuti twalitemwa Lesa kabili ninshi na ifwe tulelenga ishina lyakwe ukuba ilya mushilo. (Amalu. 83:18; Esek. 36:23; Mat. 6:9) Nga filya Yesu alebomba umulimo, na ifwe bene ifyo tubomba umulimo filangilila ukuti tulafwaya sana ukuti ishina lya kwa Yehova libe ilya mushilo no kuti ukufwaya kwakwe kucitwe.—Mat. 26:39.
3. Bushe ukutemwa Yehova kutwafwa shani ukushipikisha amesho?
3 Ukutemwa Kulalenga Twacimfya Amafya: Ukutemwa Yehova kuti kwalenga twacimfya amafya yonse fye. (1 Kor. 13:4, 7) Yesu alikwete amafya ayengi nga nshi aya kuti no kumunenuna nga yalimunenwine. Lelo icalengele ukuti acimfye amafya ayo alekwata, mulandu wa kutemwa sana no kufwaisha ukucita ukufwaya kwa kwa Yehova. (Marko 3:21; 1 Pet. 2:18-23) Na ifwe tulakwata amafya ayengi, lelo nga twalitemwa Lesa kuti twacimfya. Nga tulepashanya Kristu, kuti twashipa, twalabomba na bwino umulimo twapeelwa. Nangu balupwa bengatulwisha, nangu nga tulelwalilila, nelyo nga tuli bakote, nelyo nga ca kuti abantu tuleshimikila tabalefwaya ukuumfwa, te kuti tuleke ukubomba umulimo uo Yehova atupeela pantu twalimutemwa.
4. Bushe ukutemwa Yehova kulenga twakwata ishuko lya musango nshi?
4 Ukutemwa kwalikwata maka, kabili twalipaalwa pa kuba na maka ya kulangilila ukuti twalitemwa Lesa no mweo onse ku mulimo tubomba. (1 Kor. 13:13) Apo inshita ilepalama iya kulenga ishina lya kwa Yehova ukuba ilya mushilo umupwilapo, lekeni ‘ukutemwa kwesu kulekulilako fye lyonse.’—Fil. 1:9; Mat. 22:36-38.