Bikeniko Sana Amano ku Kushimikila Abaume
1. Ni bani balefwaikwa sana pa kuti umulimo wa Bufumu uletungululwa bwino?
1 Ilyo umulimo wa kushimikila imbila nsuma ya Bufumu uleya ulekulilako muli shino nshiku shakulekelesha, abaume bafikapo balefwaikwa nga nshi abakutungulula ifilonganino. (Marko 4:30-32; Imil. 20:28; 1 Tim. 3:1-13) Mu ncende shimo banono sana abaume abalepokelela imbila nsuma ya Bufumu, lelo abanakashi bena bengi nga nshi. Mu fyalo fimo, abaume bamona kwati abanakashi e bafwile ukubika sana amano ku fya mapepo e lyo no kusambilisha abana ifya kwa Lesa. Nomba bushe, kuti twaafwa shani abaume abengi ukuba bacibusa ba kwa Lesa no kulenga bese mu kupepa na ifwe mu kupepa kwa cine?
2. Bushe fisuma nshi ifyacitike ilyo Paulo na Petro bashimikile ku baume?
2 Bikeniko Sana Amano ku Kushimikila Abaume: Ilingi line nga ca kuti umutwe wa lupwa apokelela icine, alalenga bambi mu lupwa nabo ukumukonka mu kupepa kwa cine. Ilyo Paulo na Sila babapoosele mu cifungo pa mulandu wa kushimikila, balishimikile kuli kalinda wa cifungo. Uyu mwaume na ba mu ng’anda yakwe bonse balibatishiwe. (Imil. 16:25-34) Pa mulandu wa kuti Paulo alishimikile mu Korinti, “Krispi umukalamba we sunagoge alitetekele Shikulu, pamo na bonse aba mu ng’anda yakwe.” (Imil. 18:8) Yehova abomfeshe Petro ukushimikila Korneli, umukalamba wa bashilika, uyu mwaume bamulondolola ukutila “aali ni kapepa, umuntu uwali na katiina kuli Lesa.” Korneli pamo no lupwa lwakwe ne fibusa balibatishiwe.—Imil. 10:1-48.
3. Ni “bashimucindikwa” nshi abo mwingashimikilako, nga filya Filipi acitile?
3 Ukushimikila kuli “bashimucindikwa” kuti mwafuma ifisuma, ifingi nga nshi. (1 Tim. 2:1, 2) Ica kumwenako fye, malaika wa kwa Yehova aebele Filipi ukulanda ku “mulashi” uwalesunga ifyuma fyonse ifya kwa namfumu wa ku Etiopia. Filipi alyumfwile uko umwaume “alebelenga mwi buuku lya kwa kasesema Esaya” kabili alimulondolwelele ilyashi lisuma pali Yesu. Uyu umwina Etiopia, alisangwike umusambi kabili afwile aleshimikila ne mbila nsuma konse uko aleya pa kubwelelamo ku mwabo. Na kabili nalimo e washimikile na namfumu e lyo na ku balebomba mwi sano lyakwe abo limbi nga tabakwete ishuko lya kumfwa imbila nsuma.—Imil. 8:26-39.
4. Kuti twacita shani pa kutila tushimikile imbila nsuma ku baume abengi?
4 Ifyo Mwingacita pa Kuti Mushimikile ku Baume Abengi: Apo ilingi line abaume balaba ku ncito inshita ya kasuba, limbi kuti mwatendeka ukulabomba mu butumikishi inshita ya cungulo, pa Cibelushi na pa Mulungu, nelyo mu nshiku sha mwikalwe. Ukulabombela lyonse mu fifulo fya makwebo kuti kwalenga mwalashimikila ku baume abashisangwa sana pa mayanda. Bamunyinefwe nabo kuti baesha sana na maka ukushimikila ku baume abo babomba nabo. Inshita shimo ilyo muleshimikila ku ng’anda ne ng’anda, sana sana mu fifulo umo mushimikila lyonse, bamunyinefwe kuti baipusha nga ca kutila kuti balanda na bene ba ng’anda abaume.
5. Bushe nkashi afwile ukucita shani ilyo asanga umwaume uutemenwe sana ukumfwa icine pa Bufumu?
5 Nga ca kuti nkashi asanga umwaume uutemenwe sana ukumfwa icine, tafwile ukubwelelako eka. Nalimo kuti aya no mwina mwakwe nelyo kasabankanya umbi. Ilyo uyo muntu aleya alelunduluka, kuti cawama nkashi ukweba munyinefwe uwaishiba sana ukusambilisha ukulasambilisha uyo muntu.
6. Bushe kuti twacita shani pa kuti ‘tunonke abengi’ nga filya umutumwa Paulo acitile?
6 Saleni Amalyashi Ayo Abaume Bengatemwa Ukumfwa: Umutumwa Paulo alemona ifyo abantu aleshimikilako batemenwe ukumfwa kabili aleyalula ifyo aleshimikila pa kuti ‘anonke abengi.’ (1 Kor. 9:19-23) Na ifwe bene tufwile ukwishiba bwino amalyashi abaume tuleshimikilako bengatemwa ukumfwa, kabili tufwile ukupekanya bwino. Ica kumwenako fye, abaume ilingi line balasakamikwa sana na mafya aya mikalile, balafwaya ukutungululwa no buteko ubusuma, e lyo balafwaya ne nshila sha kuicingililamo no kwikala bwino no lupwa lwabo. Na kabili kuti batemwa ukumfwa umulandu fwe bantu twabela pano calo, no kwishiba ifikacitika kwi sonde e lyo no mulandu Lesa asuminishisha ukucula. Abantu bakatemwa ifyo tukalabashimikila nga ca kutila twaishibila limo ifyo bengatemwa ukumfwa.—Amapi. 16:23.
7. Bushe bonse mu cilonganino kuti baafwa shani abalume abashili baNte nga baisa mu kulongana?
7 Afweni Abalume Abashili BaNte: Ca cine ukutila imibele iisuma iya banakashi Abena Kristu ilingi line ilalenga sana abalume babo abashili baNte ukumfwa icine, lelo bamunyinefwe mu cilonganino nabo kuti balenga aba bantu ukupokelela icine. (1 Pet. 3:1-4) Aba mu cilonganino nga babapokelela bwino ilyo baisa na bena mwabo mu kulongana, cikalenga ukuti bakapokelele icine. Nga baisa mu kulongana ninshi nabatemwa icine kabili kuti batemwa ukusambilila Baibolo.
8. Bushe bamunyinefwe kuti bacita shani pa kuti bafwe abalume abashili baNte abashatemwa sana icine?
8 Na kabili abaume bamo tabatemwa sana icine pa kubalilapo fye, lelo mu kupita kwa nshita kuti nalimo balasumina ukulalanshanya ifyaba mu Baibolo na munyinefwe uo batemenwe. Mu cilonganino cimo bamunyinefwe limo limo ilyo baletandalila ulupwa umo umwaume ashali Nte, balepekanya ifintu ifyo bengayalanda nankwe ifyo atemenwe. Ici calengele ukuti mukupita kwa nshita batendeke ukulalanshanya nankwe ifyaba mu Baibolo, kabili ino nshita alibatishiwa. E lyo munyinefwe umbi na o ayafwile umwaume uushali Nte uwali bwino ukukuula ulupango pa ng’anda yakwe. Ukumwafwa ukukuula ulupango kwalengele ukuti asumine ukusambilila Baibolo. (Gal. 6:10; Fil. 2:4) Nga ca kutila muli Bena Kristu abaume, kuti cawama mwaafwako abalume bamo abashili baNte.
9. Finshi ficitika nga ca kutila abaume mu cilonganino bakanshiwa?
9 Bakansheni pa Kuti Bakabombe Imilimo mu Cilonganino: Abaume nga bapokelela imbila nsuma ya Bufumu kabili babombesha ukufikapo ukubomba imilimo mu cilonganino nalimo kuti baisaba baeluda ababa “ifya bupe ku bantu,” kabili ababomfya amaka yabo no kulamuka ukwafwa abantu ba kwa Yehova mu cilonganino. (Efes. 4:8; Amalu. 68:18) Abaume ba musango yo balaitemenwa kabili balafwaisha ukulacema icilonganino. (1 Pet. 5:2, 3) Ala aba baume balafwa bamunyinabo bonse!
10. Bushe abantu abengi banonkelamo shani muli filya Anania ashipile ukwafwa Paulo?
10 Ku ca kumwenako fye, Sauli uwalecusha Abena Kristu, aishileba “umutumwa ku bena fyalo.” (Rom. 11:13) Pa kubalilapo fye umusambi Anania aleshimunuka ukushimikila kuli Sauli uwalecusha Abena Kristu kale. Lelo Anania acitile ifyo Shikulu amwebele ukucita kabili alandile na ulya mwaume uwaishileba umutumwa Paulo. Mu kupita kwa myaka imilimo umutumwa Paulo abombele yalinonseshe abantu abengi abaumfwile uko aleshimikila kabili abengi sana balanonkelamo mu makalata ya mushilo ayo alembele ayaba mu Cebo ca kwa Lesa.—Imil. 9:3-19; 2 Tim. 3:16, 17.
11. Mulandu nshi tufwile ukwalwila imibombele yesu pa kuti fye tushimikile abaume?
11 Apo twaumfwa fyonse ifi, natweshe ukwaluka mu mibombele yesu pa kuti fye tushimikile abaume. Ukwabula no kutwishika nga twatwalilila ukwafwa abaume ukusambilila icine, Yehova akapaala imilimo yesu ilyo tulecita ukufwaya kwakwe no kusakamana imilimo ya Bufumu.