Bushe Kuti Mwayasuka Shani?
1. Mulandu nshi tufwile ukulapashanishisha Yesu ilyo batwipusha icipusho?
1 Na muno nshiku mwine, abantu balapapa pa fyo Yesu aleyasuka bwino ilyo balemwipusha. Na ifwe nga batwipusha ifipusho ifyalekanalekana ilyo tuleshimikila, kuti caba bwino ukula-asuka nga filya fine Yesu aleyasuka.—1 Pet. 2:21.
2. Cinshi cingatwafwa ukuti twasuke bwino uutwipwishe?
2 Baleni Kutikeni: Yesu aletala aishiba icilengele ukuti umuntu epushe. Limo limo cilaba bwino ukwipusha ifipusho pa kuti twishibe ico umuntu aletontonkanya. Umuntu uwaipusha ukuti, “Bushe mwalisumina muli Yesu?” kuti limbi teshibe ico mushisefeshako Krisimasi. Nga ca kutila mwailuka icilengele ukuti epushe, kuti calenga mwapelulushanya nankwe bwino.—Luka 10:25-37.
3. Fintu nshi twakwata ifingatwafwa ukusanga ifyasuko ifisuma pa fyo Amalembo yasambilisha?
3 Belengeni Icebo ca kwa Lesa pa Kwasuka: Ilingi line cilaba bwino ukubomfya Baibolo pa kwasuka icipusho. (2 Tim. 3:16, 17; Heb. 4:12) Icitabo ca Ukupelulula e lyo na Amalyashi ya mu Baibolo aya Kulanshanyapo muli Baibolo ya Amalembo ya Calo Cipya filatwafwa ukusanga icasuko ico cine fye tulefwaya. Nangu ca kutila uuleipusha tasumina mu fyo Baibolo ilanda, nalimo mu mucenjelo kuti mwalanshanya nankwe ifyo Amalembo yasambilisha. Koselesheni uyo muntu ukulabika sana amano ku fyebo ifisuma ifisangwa mu Baibolo ifyashininkishiwa ukuti fya cine. Nga mulepashanya Yesu, ifyo mukala-asuka fikaba kwati “ma-apele yapangilwa na golde ayabikilwe pa mbale sha silfere,” e kutila ifyasuko fyenu fikalafika abantu pa mutima kabili fikalabanonsha.—Amapi. 25:11.
4. Ni lilali tushilingile ukwasuka icipusho conse ico batwipusha?
4 Bushe Tulingile Ukwasuka Amepusho Yonse? Nga ca kuti tamwishibe icasuko ku fyo bamwipwishe, mwiumfwa insoni sha kusosa ukuti: “Nshishibe, lelo nalaya mfwaye icasuko kabili nkabwela ukwisayasuka.” Nga mwaicefya e lyo mwalanga no kuti namutemwa uumwipwishe, ici kuti calenga uyo muntu ukumweba ukuti mukabwele. Nga mwamona ukuti abalemwipusha, bantu abapata Inte sha kwa Yehova, pashanyeni Yesu, mwilanda na bo ifingi. (Luka 20:1-8) Na lintu mwasanga umuntu uushilefwaya ukusambilila icine lelo alefwaya fye ukuti mutampe ukukansana nankwe, mu mucinshi kuti mwaleka ukulanshanya pa kuti mukwate inshita ya kufwaya abalefwaya ukusambilila.—Mat. 7:6.
5. Cinshi Yesu alecita icalengele ukuti aleasuka bwino amepusho ico na ifwe twingalacita?
5 Yesu alishibe ukuti ukushintilila pali Yehova kwalicindeme sana pa kuti abombe bwino umulimo wa ‘kuba inte ku cine,’ uyu mulimo wasanshishemo no kwasuka ifipusho ifyo abalefwaya ukusambilila baleipusha. (Yoh. 18:37) Ala mwandini twalikwata ishuko ilya kupashanya Yesu ilyo tuleasuka ifipusho ifyo ‘ababa ne mitima isuma abafwaya umweo wa muyayaya’ bepusha!—Imil. 13:48.