Cincileni mu Kushimikila Imbila Nsuma!
1. Mashiwi nshi aya kukoselesha Paulo alandile ayo tulingile ukubikako amano muno nshiku?
1 Paulo atile: “Bila icebo, cincila.” (2 Tim. 4:2) Bushe aya mashiwi ya kukoselesha ayo Paulo alandile, yacindama shani kuli ifwe muno nshiku? Bushe yatukuma shani kabili yakuma shani abantu bambi?
2. Mulandu nshi tufwayafwaila abantu abashatala abomfwapo imbila nsuma?
2 Abantu Kuti Baisafwa: Abantu abengi nga nshi mwi sonde lyonse tabalati bomfwe imbila nsuma iingalenga baisapusuka. (Rom. 10:13-15; 1 Tim. 4:16) Abengi abalefwaya ukusambilila Baibolo, bacili balesangwa na mu ncende umo tushimikila imiku ne miku. E ico nga twaya mu kushimikila pa bushiku bumbi, nelyo pa nshita imbi fye, napamo kuti twasanga umuntu umbi uo tushashimikilapo. Ukufwayafwaya abantu kuti kwalenga twaba na kampingu iyasanguluka kabili aba kaele ku mulopa wabo.—Imil. 20:26.
3. Kuti twabomfya shani bwino inshita ilyo tuleshimikila?
3 Abena Kristu ba kubalilapo balebakaanya no kubacusha, lelo batwalilile fye ‘ukusalanganya isambilisho lyabo mu Yerusalemu monse.’ (Imil. 5:28) Bushe na ifwe twalicincila mu “kushimikisha ubunte”? (Imil. 10:42) Ilyo tuleshimikila, bushe tulabomfya bwino inshita? Ilyo tulelolela abo tuli nabo ukuti bapwishe ukulanda no muntu balepempula, bushe tulashimikila abapita nshila bambi?
4. Bushe ukucincila mu kushimikila kutwafwa shani ukuba abalola?
4 Ukushimikila Kulenga Twaba Abalola: Apo impela ya buno bwikashi ili mupepi, tulingile ukuba abacenjela, no kuba abalola lyonse. (1 Tes. 5:1-6) Lyonse nga tulelanda pa fyo Ubufumu bukatucitila ku ntanshi, amafya ya muli buno bwikashi tayakatufininine. (Luka 21:34-36) Kabili nga ‘tulefulukisha’ ubushiku bwa kwa Yehova, e lyo tubombesha mu mulimo wa kushimikila uwa kupususha abantu.—2 Pet. 3:11, 12.
5. Bushe ukucindika ubumi kutucincisha shani ukushimikila?
5 Nga tuli abacincila mu kushimikila abantu, ninshi tulepashanya Yehova uwacindika ubumi. Yehova, “Tafwaya umuntu nangu umo ukonaika lelo afwaya ukuti bonse bakalapile.” (2 Pet. 3:9; Esek. 33:11) Shi na tupampamine pa kushimikila abantu abengi ababa mu ncende tushimikilamo, pa kuti Yehova akalumbanishiwe!—Amalu. 109:30.