‘Peeleni Imyeo Yenu’ ku Basambi Benu
1. Cinshi tulingile ukucita pa kwafwa umusambi wa Baibolo ukulunduluka?
1 Pa kuti twafwe umusambi wa Baibolo ukufika ku kuipeela, tatulingile ukupelela fye pa kulatungulula isambililo lya Baibolo lyonse. Umutumwa Paulo apashenye icibusa akwete na bantu alesambilisha kuli filya nyina uonsha asakamana bwino abana bakwe. Na ifwe bene tufwaisha ‘ukupeela imyeo yesu’ pa kuti twafwe abasambi besu ukulunduluka.—1 Tes. 2:7-9.
2. Cinshi tulingile ukubikila amano kubo tusambilisha Baibolo, kabili kuti twababikako shani amano?
2 Bikeni Amano ku Musambi: Ilyo umusambi wa Baibolo alekonka ifyo alesambilila, kampingu yakwe ikamulenga ukuleka ukwangala na bantu abashikonka amafunde ya mu Baibolo. (1 Pet. 4:4) Balupwa lwakwe kuti bamukaana. (Mat. 10:34-36) Kuti twapwisha ukupelelwa kwakwe nga ca kutila tulemulanga ukuti twalimubikako sana amano. Mishonari umo uwabomba pa myaka iingi, atile: “Nga mwapwisha ukusambilila no musambi, mwilafumapo ilyo line fye mwapwisha ukusambilila. Nga namukwata inshita, ikaleniko panono no kulandako ilyashi no musambi.” Umusambi nga alefwaya ubwafwilisho, mwafweni bwangu bwangu. Ku ca kumwenako, kuti mwamutuminako foni nelyo ukumutandalila nga ca kuti nalwala. Kabili nga cili fye bwino, kuti mwaikala pamo no musambi wenu pa kulongana no kumwafwa ukusakamana abana bakwe.
3. Finshi twingacita pa kuti aba mu cilonganino bakoseleshe umusambi wesu?
3 Aba mu Cilonganino Kuti Ba-afwa: Nga muleshimikila mupepi no kwikalila umusambi, kuti cawama mwashokela pa ng’anda ya musambi pa kuti eshibane na bo mulebomba nabo. Limo limo kuti mulesendako bakasabankanya, e lyo na baeluda ukuti bamushindikeko ku kuyatungulula isambililo. Kabili lintu mwasambilila no musambi pa muku wa kubalilapo fye, mulaalikeni ukuti akesesangwako ku kulongana pa Ng’anda ya Bufumu. Ukusangwa ku kulongana kukafwa umusambi pantu aba mu cilonganino bakamukoselesha sana kabili bakaba ni balupwa bakwe aba ku mupashi.—Marko 10:29, 30; Heb. 10:24, 25.
4. Nga ca kuti twabombesha, fisuma nshi fingafumamo?
4 Umufyashi uubombesha pa kwafwa abana bakwe ukuba abakosa mu kupepa alaba sana ne nsansa ilyo abana basalapo ukubombela Yehova no kulaenda mu cine. (3 Yoh. 4) Na ifwe bene kuti twaba ne nsansa nga ca kutila tulepeela imyeo yesu pa kwafwa abo tusambilisha Baibolo.