“Wikabatiina”
1. Mafya nshi twingakwata pali ino nshita ayapalana na yalya Yeremia akweteko?
1 Ilyo Yeremia bamutumine ukubomba umulimo wa kusesema, aleumfwa kwati tafikapo ukubomba. Lelo Yehova amukoseleshe ukuti,“wikabatiina,” kabili cikuuku cikuuku alimukoseshe pa kuti apwishe umulimo amupeele. (Yer. 1:6-10) Na muno nshiku mwine, ukuba ne nsoni nelyo ukukanaicetekela kuti kwalenga twalafilwa ukubomba umulimo wa kushimikila. Ukutiina ifyo abantu balayasuka nelyo ifyo bakulatumona kuti kwalenga twalafilwa ukushimikila inshita shimo. Nomba finshi twingacita pa kuti tuleke ukutiina abantu, kabili mapaalo nshi tukakwata?
2. Bushe ukupekanya kuti kwatwafwa shani ukuleka ukutiina abantu ilyo tuleshimikila?
2 Pekanyeni Calimo: Ukupekanya bwino kuti kwatwafwa sana ukupwisha umwenso. Ku ca kumwenako, nga ca kuti twapitulukilamo calimo mu fyo abashifwaya ukubashimikila bacita, ninshi tukaipekanya bwino bwino ukwasuka abatemwa ukutucilima. (Amapi. 15:28) Kanshi kuti mwabomfya inshita ya Mapepo ya Lupwa ukupekanya ifya kucimfya amafya yamo abana bakwata ku sukulu na pa kushimikila.—1 Pet. 3:15.
3. Bushe ukucetekela Yehova kutwafwa shani ukuleka ukutiina abantu?
3 Cetekeleni Yehova: Nga twashintilila pali Lesa, tukaleka ukutiina abantu ilyo tuleshimikila. Yehova alitulaya ukuti akulatwafwa. (Esa. 41:10-13) Ala mwandini twalikwata ubucingo bwine bwine! Yesu na o wine alitulaile ukutila nangu kwacitika fimo ifyo tushile-enekela, umupashi wa mushilo uwa kwa Lesa ukatwafwa ukulashimikila bwino sana. (Marko 13:11) E ico lyonse mulepapaata Yehova ukuti alemupeela umupashi wakwe uwa mushilo.—Luka 11:13.
4. Mapaalo nshi tukwata nga ca kuti twatwalilila ukulashimikila te mulandu na mafya tusanga?
4 Amapaalo: Nga twatwalilila ukulashimikila te mulandu na mafya tukwata, tulakosa ica kuti na ku ntanshi kuti twacimfya amafya. Mu kuya kwa nshita, tulashipa kabili ukushipa, mibele iyo abatungululwa no mupashi wa mushilo bakwata. (Imil. 4:31) E lyo kabili, Yehova nga atwafwa ukuleka ukutiina abantu, icitetekelo cesu cilakoselako kabili tulacetekela sana amaka akwata aya kutupususha. (Esa. 33:2) Kabili tulaba ne nsansa pa kwishiba ukuti tulesekesha Shifwe wa ku muulu. (1 Pet. 4:13, 14) Kanshi lyonse fye twilatiina ukubilisha imbila nsuma ya Bufumu lelo tuleba abashipa, no kulacetekela ukuti Yehova akulatwafwilisha!