Amabala Nayabuuta, ni Nshita ya Kuseepa
1. Mulimo nshi uwacindama uuliko pali ino nshita?
1 Pa numa ya kushimikila ku mwanakashi umwina Samaria, Yesu aebele abasambi bakwe ati: “Inuneni amenso no kumona amabala, ukuti nayabuuta, ni nshita ya kuseepa.” (Yoh. 4:35, 36) Yesu alimwenene kabela ifyo umulimo wa kuseepa wali no kuba mwi sonde lyonse. Uyu mulimo wa kuseepa wali wa kwafwa abantu abatemwa ukukutika ku mbila nsuma. Nangu ca kuti Yesu aba ku muulu, na o wine alabombako sana uyu mulimo wa kuseepa. (Mat. 28:19, 20) Finshi filangilila ukuti uyu mulimo wa kuseepa ulekulilako ilyo impela ilepalama?
2. Finshi fyacitika ifilanga ukuti umulimo wa kuseepa uulecitika mu calo conse uleilako fye pa ntanshi?
2 Ukuseepa Ukwa mwi Sonde Lyonse: Mu mwaka wa mulimo uwa 2009, impendwa ya bakasabankanya mwi isonde lyonse yalikuliileko ukucila umwaka wa 2008. Na mu fyalo umo babinda umulimo wa kushimikila, mwali ukubombesha ukucila ifyo balebomba kale. Amasambililo ya Baibolo ayatungulwile cila mweshi yalicilile pali 7,619,000, kabili aya masambililo yalicilile na pali bakasabankanya. Nomba nga kukonka impendwa ya masambililo yatungulwilwe mu 2008, ninshi amasambililo ya mu 2009 yalicililepo mupepi na 500,000. Ilyo umulimo uleya ulekulilako lubilo lubilo mu ncende ishingi, abengi balalomba ukuti babatumineko bamishonari abakanshiwa mwi sukulu lya Gileadi. Mu fyalo ifingi ifyakwata abalanda ifitundu fya mu fyalo fimbi namo mwine muli ukuseepa ukukalamba. Nacimoneka ukuti Yehova alelenga umulimo ukubombwa bwangu bwangu mu nshita ya ku mpela iya kuseepa. (Esa. 60:22) Bushe na imwe mulafwaya ukubombesha mu “mabala” yenu?
3. Finshi bamo bengatendeka ukulanda pa mulimo wa kuseepa ukwa mu cifulo bashimikila?
3 Ukuseepa Ukwa mu Cifulo Mushimikila: Bamo nalimo kuti batila, “Icifulo nshimikilamo abengi tabatemwa ukusambilila Baibolo.” Kwena ca cine ukuti pali ino nshita mu fifulo fimo fimo tamwaba sana abatemwa ukumfwa Icebo ca kwa Lesa nge fyo cali kale. BaNte bamo nalimo kuti bamona kwati umulimo wa kuseepa walipwa muli shilya ncende no kuti ino nshita icashalako fye kufwailisha nelyo ukusota abanono abalesangwa. Bushe cine cine e fyo caba?
4. Bushe tufwile ukumona shani umulimo wesu uwa kushimikila, kabili mulandu nshi tufwile ukuumwena ifyo?
4 Ukutula pa kutendeka ukufika pa mpela, inshita ya kuseepa iba ni nshita ya kubombesha. Kuti mwamona ifyo uyu mulimo wapamfya nga mwatontonkanya pa mashiwi Yesu alandile aya kuti: “Umulimo wa kulobolola ukalamba, lelo ababomfi bena nabacepa. E ico, lombeni Umwine wa mulimo wa kulobolola ukuti atume ababomfi mu mulimo wakwe uwa kulobolola.” (Mat. 9:37, 38) Yehova, Umwine wa kuseepa, e uwishiba inshita yalinga ukuseepa ne ncende iya ukuseepamo. (Yoh. 6:44; 1 Kor. 3:6-8) Mulimo nshi mwapeelwa? Baibolo ilasuka ilyo itila: “Ulucelo tanda imbuto shobe ukufika icungulo wileka ukuboko kobe kutuushe.” (Luk. Mil. 11:4-6) Cine cine, ilyo ukuseepa kulefika pa kalume te nshita ya kutuusha!
5. Mulandu nshi tulingile ukutwalilila abacincila ukushimikila na mu ncende umo abantu bamoneka kwati tabafwaya icebo?
5 Twalilileni Ukuseepa Nangu ca kutila mu cifulo tushimikila tulabombamo libili libili kabili abantu tabakutika ku mbila nsuma, kwaliba icilenga sana ukuti tuleba abacincila mu mulimo wa kushimikila. (2 Tim. 4:2) Ifintu fya kupapusha ifilecitika mu calo filalenga abantu ukwaluka no kutendeka ukutontonkanya sana pa fyo ubumi bwabo bukaba ku ntanshi. Ilyo abaice baleya balekula, kuti napamo batampa ukufwaya ukucingililwa e lyo no mutende wine wine. Nga tuli no mupampamina mu kushimikila abantu bambi kuti basuka batutemwa. Abashalefwaya ukumfwa icebo kale, mu kuya kwa nshita kuti basuka basumina ukukutika. Nangu fye ni balya abakaana ukufwa icebo ku mufulo fye bakabila ukubasoka.—Esek. 2:4, 5; 3:19.
6. Mu cifulo tushimikilamo nga mwaliba abantu bashifwaya imbila nsuma, cinshi cikatwafwa ukutwalilila abacincila?
6 Mu cifulo tushimikilamo nga mwaba abantu bashifwaya imbila nsuma, cinshi cikatwafwa ukutwalilila abacincila? Nalimo kuti twa-alula inshila ya kushimikililamo, e kutila nga tushimikila ku ng’anda ne ng’anda, limbi kuti cawama ukulashimikila ku fifulo fya makwebo, nelyo ukubomfya foni. Nelyo kuti twabomfya inshila shalekanalekana pa kuti lyonse tulebomfyako inshila ipya. Kuti limbi twayalula ne nshita tushimikila no kutendeka ukulashimikila mu nshita ya cungulo nelyo inshita shimbi ilyo abantu bengasangwa pa ng’anda. E lyo napamo kuti twasambililako ululimi lumbi pa kuti tuleshimikila abantu abengi imbila nsuma. Kabili kuti twalundulula umulimo wesu nga twatendeka bupainiya bwa nshita yonse. Napamo kuti twakuukila na ku cifulo cimbi ukushaba sana aba kubomba umulimo wa kuseepa. Nga ca kuti natutemwa umulimo wa kuseepa, tukafwaisha ukubombesha uyu mulimo wacindama.
7. Tufwile ukubomba umulimo wa kuseepa ukufika lilali?
7 Bashibulimi bakwata fye inshita iinono iya kuseepa ifisabo fyabo, kanshi tabateeka umutima pa kubomba kabili balabomba bwangu bwangu mpaka bapwisha umulimo. Umulimo wa kuseepa na o wine ukabila uku-ubomba mu kwangufyanya. Nomba tulingile ukubomba umulimo wa kuseepa ukufika lilali? Tulingile ukutwalilila ukubomba “mpaka na ku mpela ya calo.” (Mat. 24:14; 28:20) Nga filya fine Umutumikishi Mukalamba uwa kwa Yehova aba, tufwaya ukupwisha umulimo uo batupeela. (Yoh. 4:34; 17:4) Kanshi natutwalilile ukulatemwa umulimo wa kushimikila no kulaubomba mu kucincila, na mu nsansa ukufika na ku mpela. (Mat. 24:13) Umulimo wa kuseepa taulapwa!
[Amashiwi pe bula 2]
Ukutula pa kutendeka, ukufika pa mpela, inshita ya kuseepa iba ni nshita ya kubombesha