Ukulabila Sana pa Bufumu bwa kwa Lesa
1. Citabo nshi tukatendeka ukusambilila pe Sambililo lya Baibolo Ilya pa Cilonganino mu mulungu wa March 14?
1 Ukutendeka mu mulungu wa March 14, 2011, tukatampa ukusambilila icitabo ca Ukulabila Sana pa Bufumu bwa kwa Lesa pe Sambililo lya Baibolo Ilya pa Cilonganino. Ici citabo cilanda pe buuku lya mu Baibolo ilya Imilimo kabili calembwa mu nshila ya kuti uulebelenga kuti atemwa sana ukumfwa ifintu fisuma ifingi ifyo ili buuku lyalandapo. Ici citabo ca Ukulabila Sana tacilanda pa cikomo cimo na cimo ice buuku lya Imilimo, lelo cilanda pa fintu fyalekanalekana ifyo twingasambilila mwi buuku lya Imilimo no kutwafwa ukumona ifyo twingakonka ifi fyebo.—Rom. 15:4.
2. Londololeni fimo fimo ifyaba mu citabo ca Ukulabila Sana.
2 Ifyaba Muli Ici Citabo: Amashiwi ya kwiswila pe bula 2, yaba ni kalata ya kukoselesha ukufuma kwi Bumba Litungulula iilondolola ifyo twingamwenamo muli ici citabo. Ukutampila mu cipandwa 2, ifipandwa fyonse fyalikwata ifyebo ifinono pa muulu ifilondolola cipandwa e lyo paliba ne lembo ililanga iciputulwa ce buuku lya Imilimo apafumine ilyashi. Mu fipandwa ifingi mwaliba no tubokoshi utulanda ifyebo fyacindama pa bantu, ififulo, nelyo uko fyacitikile. Mu mbali ya mabula mwaliba incende iikalamba umo twingalemba ifyebo. Muli ici citabo conse mwaliba ifikope ifisuma ifingatwafwa ukwelenganya ifyacindama ifyacitike kale ifyalembwa mu Baibolo, kabili pe bula lya kulekelesha paliba icisontelelo ca fikope ifyalekanalekana ifilondolola ifikope fyaba mu citabo. Mu kati ka nkupo iya kubalilapo ne ya kulekelesha mwaliba ama mapu aya kutwafwa ukwishiba umo bakapepa banensu balepita mu nshita ya batumwa ilyo batendeke ukulasabankanya imbila nsuma ukufika “na ku mpela ya pano isonde.”—Imil. 1:8.
3. Mepusho nshi ayacindama ayo ibuuku lya Imilimo likasuka ilyo twakulalisambilila?
3 Amasuko ku Mepusho Yacindama: Ukusambilila ibuuku lya Imilimo kukatwafwa ukwishiba bwino bwino amasuko ku mepusho yacindama ayakuma umulimo wa Bena Kristu. Ku ca kumwenako abakonka Yesu Kristu beshibikilwa ku mulimo nshi? Nani bani batungulula umulimo wa kushimikila mu calo conse kabili bautungulula shani? Filya Abena Kristu balebacusha no kubakanya fyabalengele ukucita cinshi? Bushe umupashi wa mushilo utwafwa shani ilyo tuleshimikila?
4. Bushe finshi tulingile ukucita nga tulefwaya ukumwenamo pa kusambilila ici citabo?
4 Nga tulefwaya ukumwenamo sana muli ici citabo, tulingile ukubelengela calimo ifyebo no kupekanya pa kuti tukaleasukapo ilyo tulelanshanya pa kulongana. Mukalesangwa lyonse ku kulongana, kabili mukaletontonkanya pa fyo mwingabomfya ifyebo mulesambilila mu mulimo wa kushimikila. Lekeni ifyo tukalasambilila muli ici citabo cishaiwamina fikatulenge ukulabila sana pa Bufumu bwa kwa Lesa!—Imil. 28:23.