Umukululo wa Mepusho

◼ Bushe Tulingile Ukusambilila Baibolo no Musambi Uulelunduluka Ukufika Lilali?

Caliwama ukutwalilila ukusambilila no musambi mpaka mwapwisha ifitabo fibili, e kutila icitabo ca Bushe Cinshi Baibolo Isambilisha? na “Ikalilileni mu Kutemwa kwa kwa Lesa.” E fyo cifwile ukuba nangu ca kuti umusambi abatishiwa ilyo tamulati mupwishe ifi fitabo fyonse fibili. Nangu ca kuti umusambi abatishiwa, kuti twatwalilila ukulemba ama-awala, ne fipempu fya kubwelelamo, e lyo ne sambililo. Nga twabomba na kasabankanya umbi kabili alelandapo ilyo tuletungulula isambililo, na o wine kuti alemba ama-awala.—Moneni Ubutumikishi Bwesu Ubwa Bufumu, ubwa March 2009 ibula 2.

Calicindama ukuti abapya babe abakosa mu cine ilyo tatulaleka ukusambilila nabo. Bakabila ukuba “abalimbwa” muli Kristu “no kuba ne citetekelo icakosa” pa kuti bakashipikishe no kucimfya amafya ayo bengakwata. (Kol. 2:6, 7; 2 Tim. 3:12; 1 Pet. 5:8, 9) Te apo peka iyo, pa kuti balesambilisha bambi mu kufikapo, balingile “kwishiba bwino bwino icine.” (1 Tim. 2:4) Nga twapwisha ifitabo fibili na basambi besu, ninshi tulebafwa ukukosa no kulaenda bwino mu “musebo uwaya ku bumi.”—Mat. 7:14.

Ilyo baeluda bashilasuminisha ukuti umuntu abatishiwe, balingile ukushininkisha ukuti uyo muntu naumfwikisha amasambililo ya kubalilapo aya mu Baibolo kabili aleyakonka mu mikalile yakwe. Baeluda balingile ukucenjela sana maka maka ilyo balebebeta umuntu uushapwisha icitabo ca kubalilapo. Nga ca kuti umuntu tafikilepo ukubatishiwa, baeluda bakashininkisha ukuti bamwafwa bwino bwino pa kuti ku ntanshi akafikepo ukubatishiwa.—Moneni icitabo ca Abaiteyanya Ukucita Ukufwaya kwa kwa Yehova, amabula 217 ukufika ku 218.

[Amashiwi pe bula 2]

Calicindama ukuti abapya babe abakosa mu cine