“Muleba aba Nkumbu”
1. Cinshi abantu balefwaisha nga nshi ino nshita tufikilepo?
1 Ino nshita tufikilepo e lyo abantu abengi nga nshi balefwaisha ukubalanga inkumbu ukucila ifyo cali kale. Imibele mwi sonde iileya ilebipilako ilelenga abantu ukukanaba ne nsansa, ukusakamikwa, e lyo no kupelelwa. Abengi nga nshi balefwaya ukwafwiwa kabili ifwe fwe Bena Kristu ni fwe twingalanga sana ukuti twalibabikako amano. (Mat. 22:39; Gal. 6:10) Kuti twalanga shani ukuti twalibika amano ku bantu?
2. Ni nshila nshi iisuma iyo twingalangilamo inkumbu?
2 Umulimo wa Nkumbu: Insansa isha cine cine shifuma fye kuli Lesa epela. (2 Kor. 1:3, 4) Yehova alatukoselesha ukulamupashanya ukupitila mu ‘kuba aba nkumbu’ kabili alitupeela no mulimo wa kushimikila abantu imbila nsuma iya Bufumu. (1 Pet. 3:8) Ukubombesha muli uyu mulimo e nshila fye iisuma iya kusansamushishamo “abali no bulanda” pantu Ubufumu bwa kwa Lesa e subilo lya cine cine ilingaafwa abantu abalecula. (Esa. 61:1) Pa mulandu wa kuti Yehova alikwata inkumbu ku bantu bakwe, nomba line fye, ali no kufumyapo ububifi bonse no kuleta isonde lipya ilyalungama.—2 Pet. 3: 13.
3. Kuti tulemona shani abantu nga filya Yesu alebamona?
3 Mulemona Abantu nge fyo Yesu Alebamona: Nangu fye ilyo aleshimikila ku mabumba ya bantu, Yesu talebamona fye bonse nge bumba lelo aletontonkanya pa muntu umo umo. Alishibe abantu abalekabila ifya kwa Lesa. Baali nge mpaanga ishabula kacema uwa kushitungulula. Ifyo Yesu amwene fyalimwikete ku mutima, fyamulengele ukutendeka ukusambilisha abantu mu mutekatima. (Marko 6:34) Nga tulemona abantu nga filya fine Yesu alebamona ninshi tukalanga ukuti tuli ba nkumbu ku muntu umo umo. Inkumbu shikamonekela mu fyo ishiwi lilefuma, ne fyo tulemoneka pa menso. Ico tukabika pa ntanshi kushimikila, kabili tukalaalula ifyebo fyesu ukulingana ne fyo muntu umo umo alekabila.—1 Kor. 9:19-23.
4. Mulandu nshi tufwile ukubela ne nkumbu?
4 Ibumba likalamba ukufuma mu nko shonse balakutika ku mbila ya Bufumu kabili balamona ukuti twalibabikako amano. Nga tuletwalilila ukulaba ne nkumbu, tukalacindika no kusekesha Lesa wesu Yehova uwaba ne nkumbu.—Kol. 3:12.