Bushe Mulesambilila Sana Kuli Yehova?

1. Bushe Yehova afwaya ukuti tube shani?

¹ Yehova ‘Kasambilisha wesu Uwapulamo’ afwaya twasambilila. (Esa. 30:20) Uo abalilepo ukusambilisha mwana wakwe Umwaume ibeli. (Yoh. 8:28) Nangu fye ilyo Adamu apondweke, Yehova talekele ukusambilisha, lelo atwalilile ukusambilisha abantu abashapwililika.—Esa. 48:17, 18; 2 Tim. 3:14, 15.

2. Ni programu nshi iya kusambilila iliko lelo?

² Shino nshiku, Yehova aletungulula programu yakulisha iya kusambilisha mwi sonde lyonse. Nga filya Esaya aseseme, abantu abengi nga nshi isonde fye lyonse balekonkomokela ku “lupili” lwa mampalanya “ulwa ng’anda ya kwa Yehova.” (Esa. 2:3) Mulandu nshi abantu balekonkomokelako? Pa kuti basambilile imibele ya kwa Lesa, e kutila ukusambilishiwa na Yehova! (Esa. 2:3) Mu mwaka wa mulimo uwa 2010, Inte sha kwa Yehova babombele ama-awala 1.6 bilioni ukushimikila no kusambilisha abantu Baibolo. E lyo, cila mulungu kulaba ukusambilila ifyebo fya kwa Lesa mu filonganino ukucila pali 105,000 isonde fye lyonse kabili umusha wa cishinka kabili uwashilimuka alafumya impapulo sha kubomfya mu ndimi ukucila pali 500.

3. Bushe pa lwenu mwamwenamo shani pa kusambilishiwa na Yehova?

³ Mwenenimo Sana: Twalimwenamo nga nshi mu fyo Lesa atusambilisha! Twalishiba ukuti Lesa alikwata ishina kabili alatusakamana. (Amalu. 83:18; 1 Pet. 5:6, 7) Twalishiba ne fyasuko ku fipusho fyacindamisha abantu bepusha, pamo nge fi: Mulandu nshi abantu baculila no kufwa? Ni kwi ningasanga insansa sha cine? Cinshi ubumi bwabelako? Na kabili Yehova alatusambilisha ifisuma ifitwafwa ‘ukutunguluka.’—Yosh. 1:8.

4. Masukulu nshi ayabako ku babomfi ba kwa Lesa, kabili mulandu nshi tulingile ukusambilila sana ukufuma kuli Yehova?

⁴ E lyo kabili, kwalibako amasukulu ayaibela ayo Yehova ateyanya pa kusambilisha ababomfi bakwe abengi ukuwamyako imibombele yabo. Pa mabula 4-6 pali umutande wa masukulu uo bamo bengasangwako. Nangu ca kuti bamo te kuti tukumanishe ukusangwa kuli aya masukulu, bushe tulebomfya ifyo batusambilisha mu masukulu yambi aya bulesa ayo twakwata? Bushe tulakoselesha abaice ukukonkelela amasambililo ya bulesa ayacila aya ku calo, nangu ca kuti bakafundisha babo na bantu fye bambi babakoselesha ukukonkelela amasambililo ya ku calo? Ukusambilila sana kuli Yehova kukatwafwa ukuipakisha ubumi bwa nsansa nomba na ku nshita ya ku ntanshi ubumi bwa muyayaya.—Amalu. 119:105; Yoh. 17:3.

Amasukulu Ayabako mu Kuteyanya kwa kwa Yehova

Amasukulu ya Shibukeni

• Imifwaile: Ukusambilisha abantu ukubelenga no kulemba pa kuti baleibelengela no kusambilila Baibolo abene e lyo no kusambilisha bambi icine.

• Inshita ili Isukulu Lisenda: Cikonka ne fyo abasambi bacenjela.

• Uko Libela: Pa Ng’anda ya Bufumu.

• Abengasangwako: Bakasabankanya bonse e lyo na bantu bambi abalesambilila icine.

• Ifya Kucita pa Kusangwako: Baeluda ba mu cilonganino e bateyanya aya makalasi aya shibukeni nga kuli abalefwaya ukusambilila kabili balakoselesha bonse abengamwenamo ukusangwako.

Isukulu lya Butumikishi Ilya Bulesa

• Imifwaile: Ukukansha bakasabankanya pa kuti baleshimikila no kusambilisha bwino imbila nsuma.

• Inshita ili Isukulu Lisenda: Libako lyonse fye

• Uko Libela: Pa Ng’anda ya Bufumu.

• Abengalembesha: Bakasabankanya bonse. Na bambi abalongana lyonse, abasumina ifyo Baibolo isambilisha kabili abomfwila amafunde yonse aya Bwina Kristu.

• Ifya Kucita pa Kulembesha: Landeni na Kangalila we Sukulu lya Butumikishi Ilya Bulesa.

Amakalasi ya mu Ndimi sha ku Fyalo Fimbi

• Imifwaile: Ukusambilisha bakasabankanya ifya kushimikila imbila nsuma mu lulimi lumbi.

• Inshita ili Isukulu Lisenda: Imyeshi ine nelyo isano. Ili isukulu libako pa Cibelushi ulucelo, iawala limo nelyo yabili.

• Uko Libela: Ilingi line libela pa Ng’anda ya Bufumu iya mupepi.

• Abengalembesha: Bakasabankanya ababa ne mibele isuma abengatemwa ukushimikila mu lulimi lumbi.

• Ifya Kucita pa Kulembesha: Abapekanya ili kalasi liofesi lya musambo, abaishiba abengasambilila.

Ukukuula Amayanda ya Bufumu

• Imifwaile: Ukukuula Amayanda ya Bufumu no kuyawamya. Ili lyena te sukulu, nomba abengila muli uyu mulimo balabasambilisha imilimo iyalekanalekana pa kuti bengala-afwilishako mu kukuula.

• Inshita Aya Makuule Yasenda: Cikonka fye ne nshita umuntu akwete

• Ukubela aya Makuule: Ukuli konse ukuli amabumba ya Abakuula Amayanda ya Bufumu. Bambi abafwilisha mu makuule balabapako ne milimo imbi iya kwafwilisha abaponenwa na mafya.

• Abengabombako: Bamunyina na bankashi ababatishiwa kabili abo ibumba lya baeluda lyasuminisha. Kuti pambi balisambilila imilimo imo nangu tabaishiba nelyo imo.

• Ifya Kulembesha uyu Mulimo: Baeluda ba pa cilonganino kuti bamupeela formu ya Kingdom Hall Volunteer Worker Questionnaire.

Isukulu lya Bapainiya

• Imifwaile: Ukwaafwa bapainiya ‘ukubombesha umulimo wabo onse.’—2 Tim. 4:5.

• Inshita ili Isukulu Lisenda: Imilungu ibili.

• Uko Libela: Iofeshi lya musambo e lipekanya; ilingi libela pa Ng’anda ya Bufumu iyabela mupepi.

• Abasangwako: Ababomba bupainiya bwa nshita yonse ukucila pa mwaka umo.

• Ifya Kucita pa Kusangwako: Bapainiya abafikilepo balabalemba no kubeba kuli kangalila wabo uwa muputule.

Bethel Entrants’ School (Isukulu lya Babombela pa Bethel)

• Imifwaile: Ili isukulu lya kwafwa abatendeka umulimo wa pa Bethel pa kuti balebomba bwino.

• Inshita ili Isukulu Lisenda: Basambilila iawala limo cila mulungu pa milungu 16.

• Uko Libela: Ku Bethel.

• Abasangwako: Bafwile ukulabombela pa Bethel lyonse nelyo ababomba pa Bethel pa nshita iinono (ukutampila pa mwaka umo nelyo ukucilapo).

• Ifya Kucita pa Kusangwako: Bonse ababombela pa Bethel abafikilepo balabalemba muli ili isukulu.

Isukulu lya Butumikishi bwa Bufumu

• Imifwaile: Ukusambilisha baeluda na babomfi batumikila ukubomba umulimo wa kutungulula no kuteyanya bwino ifintu. (Imil. 20:28) Ibumba Litungulula lilapingulapo ukuti ili isukulu libeko lyonse ilyo papita imyaka iinono.

• Inshita ili Isukulu Lisenda: Pali ino nshita, isukulu lya baeluda lisenda ubushiku bumo na hafu e lyo ilya batumikila lisenda ubushiku bumo.

• Uko Libela: Pa Ng’anda ya Bufumu nangu pa Cikuulwa ca Kulonganinamo ukulongana kukalamba.

• Abasangwako: Bafwile ukuba baeluda nangu ababomfi batumikila.

• Ifya Kucita pa Kusangwako: Baeluda na babomfi batumikila abafikilepo balabeba ukusangwako kuli kangalila wa muputule.

Isukulu lya Baeludaa

• Imifwaile: Ukwafwilisha baeluda ukubomba imilimo yabo mu cilonganino.

• Inshita ili Isukulu Lisenda: Inshiku shisano.

• Uko Libela: Uko iofeshi lya musambo lyasala, lelo ilingi libela pa Ng’anda ya Bufumu nelyo Icikuulwa ica Kulonganinamo.

• Abasangwako: Baeluda.

• Ifya Kucita pa Kusangwako: Baeluda balebwa ne ofeshi lya musambo.

Isukulu lya Bakangalila Benda na Bena Mwabob

• Imifwaile: Ukwafwa bakangalila ba muputule na ba citungu ukufikapo bwino ukubombela ifilonganino no ‘kubombesha mu kulanda no kusambilisha’ e lyo no kucema abo basakamana.—1 Tim. 5:17; 1 Pet. 5:2, 3.

• Inshita ili Isukulu Lisenda: Imyeshi ibili.

• Uko Libela: Uko iofeshi lya musambo lyasala.

• Abasangwako: Bafwile ukuba bakangalila ba muputule nelyo aba citungu.

• Ifya Kucita pa Kusangwako: Iofeshi lya musambo lileta bakangalila benda abafikilepo pamo na bena mwabo.

Isukulu lya Bamunyina Abashimbec

• Imifwaile: Ukusambilisha baeluda na batumikila abashaupa ifya kubomba imilimo na imbi. Abengi abapita muli ili isukulu balabatuma ukuya mu kubombela ukuli ukukabila mu calo mu mwabo. Abanono kuti babatuma ukuyabombela ku fyalo fimbi nga baitemenwa.

• Inshita ili Isukulu Lisenda: Imyeshi ibili.

• Uko Libela: Uko iofeshi lya musambo lyasala; ilingi libela pa Cikuulwa ca Kulonganinamo nelyo pa Ng’anda ya Bufumu.

• Abasangwako: Bamunyinefwe abashimbe abali pa kati ka myaka 23 na 62 kabili ababa no bumi busuma abalefwaya ukwafwa bamunyinabo no kubomba umulimo wa Bufumu konse ukuli ukukabila. (Marko 10:29, 30) Pafwile ukupita imyaka ibili apo basontelwa.

• Ifya Kucita pa Kusangwako: Nga ca kuti ili isukulu e ko lyaba mu calo mu mwenu, kulaba ukukumana na balefwaya ukusangwako pa kulongana kwa muputule. Ifyebo fimbi filalondololwa pali uku kwine ukukumana.

Isukulu lya Bena Kristu Abaupanad

• Imifwaile: Ukusambilisha bwino abaupana pa kuti babomfiwa kuli Yehova na ku kuteyanya kwakwe. Abengi abapwa ili isukulu bakalabatuma ukwaba ukukabila mu calo mu mwabo. Abanono kuti babatuma ukuyabombela ku fyalo fimbi nga baitemenwa.

• Inshita ili Isukulu Lisenda: Imyeshi ibili.

• Uko Libela: Amakalasi ya kubalilapo yabela pa Watchtower Educational Center mu Patterson, ku New York, mu U.S.A. Pa numa, ili isukulu likalabela pa ncende iikasalwa ne ofeshi lya musambo, sana sana pa Cikuulwa ca Kulonganinamo nelyo pa Ng’anda ya Bufumu.

• Abasangwako: Abaupana abali ne myaka pa kati ka 25 na 50 ababa no bumi busuma kabili abengabombela konse ukuli ukukabila e lyo abaitemenwe ukutila: “E po ndi! Ntumeni.” (Esa. 6:8) Kabili, pafwile ukupita imyaka ibili apo baupanine e lyo pafwile ukupita imyaka ibili apo batendekela umulimo wa nshita yonse.

• Ifyo Mwingengila Muli ili Isukulu: Nga ca kuti ili isukulu e ko lyaba mu calo mu mwenu, kulaba ukukumana na balefwaya ukusangwako pa kulongana kwaibela. Ifyebo fimbi filalondololwa pali uku kwine ukukumana.

Isukulu lya Gileadi

• Imifwaile: Ukusambilisha bapainiya na bambi ababa mu mulimo wa nshita yonse ifya kubomba bumishonari.

• Inshita ili Isukulu Lisenda: Imyeshi isano.

• Uko Libela: Pa Watchtower Educational Center, mu Patterson, ku New York, U.S.A.

• Abasangwako: Abaupana aba kuti apo babatishiwilwe palipita imyaka itatu kabili abali pa kati ka myaka 21 na 38 ilyo baletuma formu ya kwipushishapo uyu mulimo. Bafwile ukwishiba iciNgeleshi, kabili pafwile ukupita imyaka ibili apo baupanine kabili pafwile ukupita imyaka ibili apo batampile umulimo wa nshita yonse. Bafwile ukuba no bumi ubusuma. Bapainiya ababombela ku fyalo fimbi; bakangalila benda; ababombela pa Bethel; na bapita mwi Sukulu lya Kukansha ilya Butumikishi, Isukulu lya Bamunyina Abashimbe, ne Sukulu lya Bena Kristu Abaupana na bo kuti baipusha ukusangwa kuli iili isukulu nga nabafikapo.

• Ifya Kucita pa Kusangwako: Mu misambo imo imo, kulaba ukukumana kwa balefwaya ukusangwa kuli ili isukulu pa kulongana kwa citungu. Ifyebo fimbi filalondololwa pali uku kwine ukukumana. Nga takuli ukukumana pa kulongana kwa citungu mu calo mu mwenu lelo mulefwaya ukusangwako, kuti mwalembela ku maofeshi yenu aya musambo pa kuti mwishibe ifyo mwingacita.

Isukulu lya Baba Muli Komiti ya Musambo na Bena Mwabo

• Imifwaile: Ukwafwa ababa mu Makomiti ya Musambo ukwishiba ifya kusakamana bwino ifikuulwa fya Bethel, ukwafwilisha ifilonganino mu mulimo wa kushimikila, no kwangalila bakangalila ba muputule na ba fitungu umo babombela, e lyo no kwangalila bakapilibula, abapulinta impapulo, abatuma impapulo, e lyo ne milimo imbi.—Luka 12:48b.

• Inshita ili Isukulu Lisenda: Imyeshi ibili.

• Uko Libela: Pa Watchtower Educational Center, mu Patterson, ku New York, mu U.S.A.

• Abasangwako: Ababa muli Komiti ya Musambo nelyo muli Komiti ya Calo nangu abasalwa ukubomba iyi milimo.

• Ifya Kucita pa Kusangwako: Ibumba Litungulula lileta bamunyinefwe abafikilepo pamo na bena mwabo.

[Amafutunoti]