Ifintu Fitatu Ifingamwafwa Ukuwamyako Imisambilishishe
1. Mulandu nshi twingafwaila ukuwamyako imisambilishishe yesu?
1 Bakasabankanya bonse ni bakasambilisha. Tuleba abantu ifyebo fyacindama ilyo twalanda nabo pa muku wa kubalilapo, nangu nga twabwelela ku kulanshanya na balefwaya ukumfwilapo na fimbi, na lintu tuletungulula isambililo lya Baibolo. Tulalenga abantu ukwishiba “amalembo ya mushilo,” ayengabalenga ukuba na ‘mano, kabili aya mano, kuti yalenga bapusuka.’ (2 Tim. 3:15) Ala uyu mulimo tubomba walicindama! Twalalanda pa fintu fitatu ifingatwafwa ukuwamyako imisambilishishe yesu.
2. Kuti twa-angusha shani pa kusambilisha?
2 Ukwangusha: Nga natwishiba bwino ilyashi tulelandapo, cilanguka ukulaba ukuti abo tulelanda nabo bena ilyo lyashi talibangukile. Kanshi, ilyo muletungulula isambililo lya Baibolo, mwilalanda sana ifishikumine isambililo. Lelo, mulelanda fye pa fishinka ifipulilemo. Ukulanda ifingi takupilibula ukuti twalishiba ukusambilisha. (Amapi. 10:19) Kuti cawamisha ukubelenga fye amalembo ayakumine sana ifyo mulelandapo. Pa numa ya kubelenga ilembo, londololeni fye amashiwi ayalelanda sana pa fyebo mulelanshanyapo. Mu Lyashi lya pa Lupili, ilyalembwa muli Mateo ifipandwa 5 ukufika ku 7, mwaba icine icashika, lelo Yesu asambilishe mu nshila iya-anguka kabili tafushishe ifyebo alandile.
3. Busuma nshi bwaba mu kubomfya ifilangililo, kabili filangililo fya musango nshi ifyawama?
3 Ifilangililo: Ifilangililo filalenga umuntu ukutontonkanya, filafika pa mutima, kabili filaafwa ukwibukisha. Mwilatontonkanya ukuti pa kulanda ifilangililo ifisuma mufwile ukwishiba sana ukushimika amalyashi. Ilingi line Yesu alebomfya ifilangililo ifipi kabili ifya-anguka. (Mat. 7:3-5; 18:2-4) Fimbi ifingamwafwa sana, kulengako fikope ifya-anguka. Ukupekanishisha kabela, kuti kwamwafwa ukulabomfya ifilangililo ifisuma.
4. Kuti twabomfya shani bwino ifipusho?
4 Ifipusho: Pa kuti umusambi asuke icipusho afwile ukutontonkanya. Kanshi, nga mwaipusha cipusho, mufwile ukutekanya. Nga mwamwasukilako bwangu bwangu, tamwakeshibe ifyo omfwilepo. Nga taswike bwino, kuti cawama ukumwipushako na fimbi ifipusho ifingalenga ayasuka bwino, ukucila ukumulungika. (Mat. 17:24-27) Ca cine ukuti, ifwe bonse teti twishibe ukusambilisha bwino fyonse. E co Baibolo itukoselesesha ukulasakamana ifyo tulesambilisha. Nga tulebika amano ku fyo tulesambilisha, tukakwata amapaalo ku ntanshi pamo na baletumfwa.—1 Tim. 4:16.