Ifyo Lesa Aletweba Ukupitila Muli Yeremia
1. Citabo nshi cafumine pa kulongana kwa citungu ukwa mu 2010, kabili tukacibomfya shani?
1 Twalitemenwe nga nshi ilyo icitabo icipya icakwata ili shina cafumine pa kulongana kwa citungu ukwa mu 2010 ukwaleti “Ikalilileni Kuli Yehova!” Ici citabo calikwata ifyebo ifyaba mu mabuuku ya kwa Yeremia na Inyimbo sha Bulanda ifyo twingabomfya mu mikalile yesu. (Rom. 15:4) Ici citabo ca kusambililamo pa Kulongana kwa Baibolo Ukwa pa Cilonganino. Tukatendeka ukusambililamo mu mulungu wa 5 November, 2012.
2. Mulandu nshi twinganonkelamo mu kusambilila ibuuku lya kwa Yeremia na Inyimbo sha Bulanda?
2 Kuti Twanonkelamo na Pali Ino Nshita: Yeremia, kalemba wa ili buuku ilya mu Baibolo, aseseme ilyo kwali ifimfulunganya mu Yuda. Pa kubalilapo, alemona kwati te kuti abombe uyu mulimo. (Yer. 1:6) Yeremia alipakeswe ku bantu abo aishibe e lyo nalimo na kuli balupwa bakwe ku Anatote, ku mushi ku mwabo. (Yer. 11:21, 22) Kanshi Yeremia alefupulwa inshita shimo. (Yer. 20:14) Ilyo tulebomba umilimo wesu uwa ‘kulenga aba nko shonse ukuba abasambi,’ ilingi tulakwata amafya no kumfwa ifyaumfwile Yeremia. (Mat. 28:19) Ukusambilila ifyo alembele kuti kwatwafwa ukuba abacincila no kuba abashipa ilyo tulebomba umulimo wesu.
3. Bushe kuti twabomfya shani fimo fimo ifyaba mu citabo ca kwa Yeremia?
3 Ifyabamo: Amalembo ayakwete ifishinka fikalamba ayo mufwile ukubelenga ilyo mulelanshanya bayalemba mu filembo ifyaibela. Pa mpela ye sambililo cila mulungu paba icipusho cimo nangu fibili mu filembo ifyafiita sana ifingalenga twalanda pa cishinka cikalamba icili mwi sambililo. Ifi fipusho fya kwipusha ibumba ilyo mulepituluka mwi sambiliilo. Mwi buuku lyonse mwaba ifikope ifyo aba mu cilonganino bengatemwa ukulandapo.
4. Kuti twacita shani pa kuti tukalenonkelamo sana mu kusambilila icitabo ca kwa Yeremia?
4 Nga mulefwaya mukalenonkelamo sana, mukalepekanishisha libela. Ilyo mulepekanya mukalemonamo ifishinka fyo mwingabomfya mwe bene na mwi bala. Mukaleasukapo sana. Pa mulandu we paalo lya kwa Yehova, Yeremia alibombele bwino sana ne nsansa. (Yer. 15:16) Tulesubila ukuti ici citabo cipya cili no kutwafwa na ifwe ukuba abakosa mu mulimo.