Cingilileni Kampingu Yenu

1. Umutwe wa kulongana kwaibela ukwa mu mwaka wa mulimo uwa 2013 uleti shani, kabili mulandu nshi bapekanishishe uku kulongana?

¹ Cila bushiku, kulaba ifintu ifingonaula kampingu yesu. E mulandu wine mu mwaka wa mulimo uwa 2013, uukatendeka pa September 1, 2012, tukakwatila ukulongana kwaibela ukukaba no mutwe uuleti “Cingilileni Kampingu Yenu.” (1 Tim. 1:19) Uku kulongana kupekanishiwe ukutwafwa bonse ukumona ifyo tulebomfya ubu bupe bwaibela ubo Kabumba wesu atupeela.

2. Mepusho nshi ayacindama ayakasukwa mu malyashi ya pa kulongana kwaibela?

² Mukomfwikishe Ifi Fishinka: Amalyashi ya pa kulongana kwaibela yakasuka amepusho yacindama 7 pali kampingu:

• Finshi fingonaula kampingu yesu?

• Kuti twasambilisha shani kampingu yesu?

• Kuti twaba shani aba kaele ku mulopa wa bantu bonse?

• Nga tuletontonkanya sana pa fya kututungulula ifisangwa mu Baibolo no kufikonka tukalanga ukuti tuli bantu ba musango nshi?

• Kuti twacita shani pa kuti tatonawile kampingu ya bamunyinefwe?

• Mwe baice, kuti mwacita shani pa kuti muleshipikisha amatunko?

• Mapaalo nshi abakonka kampingu yabo iitungululwa no mupashi bapokelela?

3. Finshi tufwile ukucita pa kuti tukanonkelemo sana muli uku kulongana?

³ Yehova kuti atwafwa ukucimfya ukwesha konse ukwa kwa Satana ukwa konaula kampingu yesu. Ukubomfya Icebo cakwe no kuteyanya kwakwe, Shifwe wa ku muulu aletweba ati: “Iyi e nshila. E mo mwende.” (Esa. 30:21) Inshila imo Yehova atutungulwilamo kupitila muli uku kwine kulongana. E ico, ipekanyeni ukusangwa ku kulongana konse. Mukalekutikisha, kabili mukalemona ne fyo mwingabomfya ifyebo mukasambilila mu mikalile wenu. Mukalelanshanya pa fishinka fya pa kulongana no lupwa lwenu. Nga twakonka ifyo tukasambilila tukaba abakosa ica kuti tukatwalilila ‘ukukwata kampingu musuma’ kabili ifya mu calo ca kwa Satana ifishikalilila tafyakatupumbule no kutufumya mu nshila yalungama.—1 Pet. 3:16.