Ifya Kubomfya Broshuwa ya Ni Bani Balecita Ifyo Yehova Afwaya Muno Nshiku?
Broshuwa Iipya iya Kutwafwa Ukutungulula Abasambi ku Cilonganino
1. Milandu nshi itatu iyo balembele iyi broshuwa ya Ifyo Yehova Afwaya?
1 Bushe mwalitendeka ukubomfya broshuwa ipya ya Ni Bani Balecita Ifyo Yehova Afwaya Muno Nshiku? Umulandu balembele iyi broshuwa (1) kwafwa abasambi ukwishiba bwino Inte sha kwa Yehova, (2) ukwishiba umulimo tubomba, e lyo na (3) ukwishiba ifyo icilonganino cesu caba. Broshuwa ya Ifyo Yehova Afwaya yena ikwete amasambililo ayepi, e co yaleba fye pe bula limo kabili kuti mwayasambilila no musambi pa mamineti fye 5 ukufika ku mamineti 10 pa numa ye sambililo.
2. Landenipo fimo fimo ifyaba muli iyi broshuwa.
2 Ifyo Bailemba: Iyi broshuwa ikwete ifipande fitatu, kabili icipande cimo na cimo cilelanda pa fintu fitatu pa kuteyanya kwa kwa Yehova, ifyo tulandilepo mu paragrafu ya kubalilapo. Umutwe we sambililo limo na limo ulembelwe nge cipusho, e lyo utumitwe utunono utuli mwi sambililo tuleasuka icipusho ca mutwe uukalamba. Muli iyi broshuwa muli ifikope ifyo bakopa ukufuma mu fyalo fyalekanalekana ukucila pali 50, kabili balilembapo amashina ya fyalo pa kuti umusambi aishiba ukuti umulimo wesu ubombwa fye isonde lyonse. Amasambililo ayengi nayakwata utubokoshi utuleti, “Ishibilenipo na Fimbi.” Muli utu tubokoshi muli ifyebo ifyo mwingakoselesha umusambi wenu ukucita.
3. Kuti twabomfya shani broshuwa ya Ifyo Yehova Afwaya?
3 Ifyo Mwingabomfya iyi Broshuwa: Intanshi langeni umusambi umutwe we sambililo. Lyena, ilyo mulebelenga nankwe amaparagrafu, komaileni pa tumitwe utunono utuli mu filembo ifyatikama. Nga mwapwisha isambililo, lanshanyeni amepusho ya kupitulukamo ayali pe samba. Nga mulefwaya kuti mwabelenga isambililo lyonse e lyo mwalanshanya pa numa, nelyo kuti mwaya mulebelenga no kulanshanya amapragrafu yanono yanono. Salenimo amalembo ayo mwingabelenga. Mwilalaba ukulanshanya nabo ifikope no tubokoshi tuleti “Ishibilenipo na Fimbi.” Ilingi line, kuti cawama nga muleya mulesambilila amasambililo mulya mwine yakonkanina. Na lyo line, nga ca kuti pali cimo ico umusambi alefwaya ukwishiba bwangu, cili fye bwino ukulanshanya nankwe isambililo ilili ku ntanshi ililelanda pali uyo mulandu. Ku ca kumwenako, nga mukakwata ukulongana kukalamba nelyo ukulongana kwa citungu, kuti mwalanshanya nankwe isambililo 11 nangu ca kutila tamulafikako.
4. Mulandu nshi mutemenwe ukukwata iyi broshuwa iipya?
4 Nga tulesambilisha umusambi Baibolo, ninshi tulemwafwa ukwishiba Shifwe wa ku muulu. Na lyo line, tufwile no kumusambilisha pa kuteyanya kwa kwa Yehova. (Amapi. 6:20) Kanshi naciwama ifi nomba tukwete iyi broshuwa iipya iya kutwafwa ukusambilisha abasambi pa kuteyanya kwa Yehova!