Mulepashanya Bakasesema—Hosea
1. Cipusho nshi napamo mwayipushapo?
1 ‘Finshi ningaipeelesha ukucita pa kuti ndesekesha Yehova?’ Napamo mwaliyipushapo ico cipusho pa numa ya kutontonkanya pa fisuma ifingi ifyo Lesa amucitila na pa luse lwakwe. (Amalu. 103:2-4; 116:12) Hosea ali-itemenwe ukucita ifyo Yehova amwebele ukucita, nangu ca kuti kwaleba fimo ifyo aleipusulako. Kuti twamupashanya shani?
2. Kuti twaba shani no mupampamina pa kushimikila nga filya fyali Hosea?
2 Muleshimikila na mu Nshita Iishiweme: Hosea alebila imbila maka maka ku mikowa 10 iya bufumu bwa kwa Israele, uko abantu abengi balekele ukupepa Lesa wa cine. Imfumu Yeroboamu 2, yalecita ifyabipa mu menso ya kwa Yehova kabili yasuminishe abantu ukutwalilila ukupepa umwana wa ng’ombe uko Yeroboamu 1 atendeke. (2 Isha. 14:23, 24) Ishamfumu shakonkelepo isha ubu bufumu bwa mikowa 10 nasho shalitwalilile ukucita ifyabipa ukufika fye na lintu ubu bufumu bwaishileonaulwa mu 740 B.C.E. Lelo nangu ca kuti mu calo mwali sana ukupepa kwa bufi, Hosea abombele mu cishinka umulimo wa kusesema pa myaka 59. Bushe na ifwe tulaipeelesha ukutwalilila ukushimikila nangu ca kuti abantu tabalefwaya ukumfwa nelyo baletukaanya?—2 Tim. 4:2.
3. Bushe ifyo Hosea acitile fitulanga shani ifyo Yehova akwata uluse?
3 Tontonkanyeni Sana pa Luse lwa kwa Yehova: Yehova aebele Hosea ukuupa “umwanakashi, umulalelale.” (Hos. 1:2) Gomere umukashi wa kwa Hosea alifyele umwana umwaume kuli Hosea, lelo pa numa aishilekwata abana bambi babili aba mu cani. Filya Hosea aitemenwe ukwelela umukashi wakwe, fyalelangilila ifyo Yehova ali no kwelela abena Israele nga balapila. (Hos. 3:1; Rom. 9:22-26) Bushe na ifwe tulaitemenwa ukuipusulako muli fimo pa kuti fye twafwe abantu ukwishiba ishina lya kwa Yehova?—1 Kor. 9:19-23.
4. Milimo nshi imo twingabomba iingalanga ukuti twaliipeelesha kuli Yehova?
4 Ababomfi ba kwa Yehova bamo bali-ipeelesha ica kuti balileka incito sha pa muulu pa kuti balebomba inshita iikalamba mu mulimo wa kushimikila. Bambi balisalapo ukuba fye abashimbe nelyo ukukanakwata abana pa mulandu wa kubomba imilimo ya Bufumu. Nga twatontonkanya pa fyo Hosea acitile, napamo kuti twatila, ‘Ine te kuti nkwanishe ukucita ifyo Hosea acitile.’ Na lyo line, ilyo twamona ifyo Yehova aba ne cikuuku kuli ifwe, kabili nga twacetekela ukuti umupashi wa mushilo ukalatukosha, Yehova kuti alenga twabomba imilimo iikalamba nga filya fine abomfeshe Hosea.—Mat. 19:26; Fil. 2:13.