Mulepashanya Bakasesema—Nahumu
1. Finshi twingasambilila mwi buuku lya kwa Nahumu?
1 Filya umusumba wa Ninebe washala fye icibolya, nge fyo Nahamu asesemene, calenga twashininkisha ukutila Yehova alakanda abalwani bakwe, kabili takuli umulwani uuli onse nangu umo uwingacimfya Yehova. (Nahu. 1:2, 6) Nga twaishiba bwino ifyo Nahumu aseseme, kuti twasambililako amasambililo ayacindama pa mulimo tubomba uwa kushimikila.
2. Kuti twacita shani pa kuti tulekoselesha abantu ilyo tuleshimikila?
2 Mulesansamusha Abantu no Kubalenga Baba ne Subilo: Umuntu nga tabelengele sana ifyalembwa mwi buku lya kwa Nahumu, kuti atontonkanya ukuti mwaba fye ifyo Yehova asobele pa konaulwa kwa musumba uukalamba uwa Ninebe, uwa mu Asiria. (Nahu. 1:1; 3:7) Lelo abantu ba kwa Yehova balitemenwe icine cine pa cali no kucitikila umusumba wa Ninebe. Nahumu uo ishina lyakwe lipilibula ukuti “Uusansamusha,” akoseleshe abaYuda banankwe ukuti Yehova ali no konaula abalwani babo, abena Ninebe! Na kabili alibakoseleshe ilyo abebele ukuti Yehova “e ucingilila mu bushiku bwa bulanda.” (Nahu. 1:7) Na ifwe nga tuleshimikila, tuleba abantu imbila iisuma no kubakoselesha ukuti balingile ukuuba muli Yehova.—Nahu. 1:15.
3. Kuti twapashanya shani Nahumu ilyo tulesambilisha?
3 Mulebomfya Ifilangililo: Yehova alandiile muli Nahumu ukuti nga filya fine abena Asiria baonawile umusumba wa Thebes (No-amone), uwa mu Egupti, e fyo ali no konaula umusumba wa Ninebe. (Nahu. 3:8-10) Ilyo tuleshimikila abantu ukuti Yehova ali no kufumyapo ifyabipa, tufwile tulelanda na pa masesemo ya mu Baibolo ayafikilishiwa ayalanga ukuti Yehova alafikilisha fyonse fye ifyo alanda. Ku ca kumwenako, ilyo abena Babiloni na bena Madai basanshile umusumba wa Ninebe mu 632 B.C.E., imfula yalengele umumana wa Tigrisi wisule, no konaula ifibumba fya musumba uwayafishe ukwingilamo. Umusumba wa Ninebe walyonawilwe bwangu bwangu nga filya fine Yehova asobele.—Nahu. 1:8; 2:6.
4. Kuti twacita shani pa kuti abantu baleumfwa ifyo tulebasambilisha?
4 Mulebomfya Amashiwi Ayayanguka Ukumfwa: Pa kulemba, Nahumu alelondolola bwino sana kabili ifyebo aalemba fyalyanguka ukumfwa. (Nahu. 1:14; 3:1) Na ifwe bene tulingile ukulabomfya amashiwi ayayanguka ilyo tuleshimikila. (1 Kor. 14:9) Ilyo mwatandalila umuntu, mufwile ukumweba ico mwendeele. Ilyo mulesambilisha abantu Baibolo, mulingile ukubafwa ukucetekela Yehova ne Cebo cakwe e lyo no kulenga baishiba ifyo bengabomfya ifyo balesambilila.—Rom. 10:14.
5. Finshi Yehova atulaya ifyalembwa mwi buuku lya kwa kasesema Nahumu?
5 Ifyalembwa mwi buuku lya kwa Nahumu filanga apabuuta tuutu ukutila Nahumu taletwishika nangu panono ukuti Yehova ali no kufikilisha ifyo alaile. Ilyo impela ya mitekele ya kwa Satana ileya mu kupwa, tulasansamushiwa na mashiwi ya kwa Lesa ayatila: “Ubulanda tabwakeme umuku wa bubili.”—Nahu. 1:9.