Ifyo Lesa Atupaala nga Tuli ne Cumfwila

Kasesema Mose alandile ukuti Lesa akulatupaala nga tuleumfwila amafunde yakwe. (Amalango 10:13; 11:27) Tatumfwila Lesa pa mulandu wa kutiina ukutukanda. Imibele ya kwa Lesa iisuma ilalenga twamutemwa, ne ci cilenga tulemumfwila no kukanafwaya ukucita ifingamukalifya. Amalembo ya Mushilo yatila: “Uku e kutemwa Lesa, ukuti tulekonka amafunde yakwe; kabili amafunde yakwe taya-afya.”—1 Yohane 5:3.

Bushe Lesa atupaala shani nga tulemumfwila? Natulande pa fintu fibili.

1. UKUMFWILA LESA KULALENGA TWABA NA MANO

“Ine, ne Yehova, nine Lesa obe, uukusambilisha ifingakuwamina, uukwensha mu nshila iyo ufwile ukwendamo.”—ESAYA 48:17.

Yehova Lesa, Kabumba wesu, alitwishiba bwino kabili alatutungulula bwino. Nga tulefwaya ifyo Lesa atusambilisha filetwafwa ukulapingula bwino pa fintu, tufwile ukulasambilila Amalembo ya Mushilo no kulacita ifyo tulesambilila.

2. UKUMFWILA LESA KULALENGA TWABA NE NSANSA

“Abapaalwa ni abo abomfwa no kukonka icebo ca kwa Lesa!”—LUKA 11:28.

Pali ino nshita, abantu abengi nga nshi abacita ifyaba mu Malembo ya Mushilo baliba ne nsansa. Ku ca kumwenako, tontonkanyeni pa mwaume umwina Spain uwali sana ne cipyu kabili uwalecusha umwina mwakwe na bantu bambi. Bushiku bumo abelengele mu malembo ayalembele kasesema Mose pali Yosefe mwana Yakobo, uwali sana ne cikuuku. Yosefe balimushitishe mu busha kabili balimufyengele no kumubika mu cifungo, nomba alitwalilile ukuba no mutende ku bamufyengele kabili alibabelele uluse. (Ukutendeka ifipandwa 37–45) Uyu umwaume umwina Spain atile: “Ukutontonkanya pali Yosefe kwalilengele natendeka ukuba ne cikuuku no kuilama. Ici calilenga naba ne nsansa pali ino nshita.”

Amalembo ya Mushilo yalatwafwa ukwishiba ifya kwikala na bantu. Twalalanda sana pali ici icishinka mu cipande cikonkelepo.