Kabumba Wesu Alitutemwa

1. KABUMBA WESU ALALENGA AKASUBA UKUBALIKA

Bushe ifintu mu calo kuti fyaba shani nga takwali akasuba? Akasuba e kalenga imiti ukukwata amabuula, ubuluba, ifisabo e lyo ne nseke. Na kabili e kalenga imishila ukukula amenshi ukufuma mu mushili no kulenga yanina ukufika ku mabuula.

2. KABUMBA WESU ALALENGA IMFULA UKULOKA

Lesa alatupeela imfula pa kuti tulekwata ifya kulya ifingi no kulenga imitima yesu ukusekelela.

3. KABUMBA WESU ALATUPEELA IFYA KULYA NE FYA KUFWALA

Abafyashi abengi balasakamana pa fyo bengasanga ifya kulya ne fya kufwala ifya kupeela indupwa shabo. Icebo ca kwa Lesa cilanda ukuti: “Lolekesheni ifyuni fya mu muulu, pantu tafibyala imbuto nelyo ukulobolola nelyo ukusunga ifya kulya mu matala; na lyo line Shinwe wa mu muulu alafiliisha. Bushe tamwaficila ukucindama?”—Mateo 6:25, 26.

Na kabili Icebo ca kwa Lesa cilanda ukuti: “Sambilileniko ku maluba ya mu mpanga fintu yakula . . . ; nomba ndemweba nati nangu fye ni [Mfumu] Solomone mu bukata bwakwe bonse tafwelepo nga limo ilya aya maluba. Nomba ifi nga e fyo Lesa afwika ifimenwa fya mu mpanga . . . , bushe takacilepo ukumufwika?”—Mateo 6:28-30.

Apo Lesa kuti atupeela ifya kulya ne fya kufwala, te kuti afilwe ukutupeela ifintu fimbi ifyo tukabila mu bumi. Nga tulecita ifyo Lesa afwaya kuti alenga ifya kulya twalima ukukula bwino, nelyo kuti atwafwa ukusanga incito pa kuti tulekwata ifyo tukabila.—Mateo 6:32, 33.

Tulatemenwako Lesa nga twatontonkanya pa fyo atupeela akasuba, imfula ne fyo asakamana ifyuni na maluba. Mu cipande cikonkelepo, twalalanda pa fyo Lesa alanshanya na bantu.