IFYO FWE BENA KRISTU TULINGILE UKULAIKALA
Muletemwa Umulimo wa Kubila Imbila Nsuma
Bushe calimukoselapo ukubila imbila nsuma? Fwe bengi kuti twasumina ukuti calitukoselapo. Mulandu nshi? Nalimo abantu balakaana ukumfwa imbila nsuma nelyo tulatiina ukulanda na bantu abo tushaishiba. Ca cine ukuti ifi twalandapo, kuti fyalenga twafilwa ukuba ne nsansa. Na lyo line, tupepa Lesa wa nsansa uufwaya ukuti tulemubombela no kusekelela. (Amalu. 100:2; 1 Tim. 1:11) Fintu nshi fitatu ifingalenga twatemwa umulimo wa kubila imbila nsuma?
Ica kubalilapo, tubila ubukombe ubwafwa abantu ukuba ne subilo. Nangu ca kuti abantu abengi muli shino nshiku tabakwata isubilo, kuti twabebako “imbila nsuma iya fintu ifisuma.” (Esa. 52:7) Imbila nsuma iya Bufumu kuti yayafwa na ifwe bene ukulasekelela. Ilyo mushilaya mu kubila imbila nsuma, muletontonkanya sana pa mapaalo ayo Ubufumu bwa kwa Lesa bukaleta pe sonde.
Ica bubili, imbila nsuma tubila ilafwa abantu lwa ku mubili na lwa ku mupashi. Balaleka ukuba ne mibele yabipa kabili balakwata isubilo lya kuba no mweo wa muyayaya. (Esa. 48:17, 18; Rom. 1:16) Umulimo tubomba wa kufwaya abantu no kubapususha. Nangu ca kuti abantu bamo tabafwaya ukubapususha, tulatwalilila ukufwaya abafwaya ukupusuka.—Mat. 10:11-14.
Ica butatu kabili icacindama ca kuti, tulacindika Yehova nga tulebila imbila nsuma. Alicindika sana umulimo tubomba uwa kubila imbila nsuma. (Esa. 43:10; Heb. 6:10) Na kabili, alatupeela umupashi wakwe uwa mushilo pa kuti twingabomba bwino uyu mulimo. Kanshi mulelomba Yehova ukuti alemwafwa ukulasekelela pantu ukusekelela, cisabo ca mupashi. (Gal. 5:22) Yehova kuti atwafwa ukuba abashipa no kuleka ukusakamikwa ilyo tulebila imbila nsuma. (Imil. 4:31) Lyena, tukatemwa sana umulimo wesu uwa kubila imbila nsuma te mulandu ne fyo abantu bengankulako.—Esek. 3:3.
Cikope nshi cilelanga ifyo mwingatemwa ukuba ilyo mulebila imbila nsuma? Kuti mwacita shani pa kuti muleba ne nsansa?
TAMBENI VIDIO ITILA UKUBELENGA BAIBOLO NO KUTONTONKANYAPO SANA KWALIBAFWILE UKUBA NE NSANSA NA KABILI, LYENA ASUKENI IFI FIPUSHO:
Mulandu nshi tulingile ukubikila sana amano ku kuisambilisha Icebo ca kwa Lesa nangu ca kuti inshita iikalamba cila mweshi tuba mu mulimo wa kubila imbila nsuma?
Kuti twapashanya shani Maria?
Ni nshita nshi mutontonkanya sana pa fyo mubelenga mu Cebo ca kwa Lesa?
Cinshi cilenga muleba ne nsansa ilyo mulebila imbila nsuma?