Tulanga Ukuti Twaliba no Kutemwa nga Twatungilila Yehova Ilyo Asalapula Umuntu

Ukutamfya umuntu uushilapila mu cilonganino, kulacingilila icilonganino kabili kulalenga asalapulwa. (1 Kor. 5:6, 11) Kanshi nga twatungilila Yehova ilyo asalapula umuntu ninshi tulelanga ukuti twaliba no kutemwa. Nomba apo ukutamfya umuntu mu cilonganino kulalenga na balupwa ba uyo muntu e lyo nabapingwile uyo mulandu baumfwa ububi, kuti twalanda shani ukuti ukutamfya umuntu mu cilonganino kulanga ukuti twaliba no kutemwa?

Icikalamba ico twingalandila ifi, ni co twalitemwa Yehova kabili tatufwaya ukuleta umuseebanya pe shina lyakwe nelyo ukucita ifyo amona ukuti tafyasanguluka. (1 Pet. 1:14-16) Na kabili tulanga ukuti twalitemwa uutamfiwe. Nangu ca kuti uo basalapula alaba sana no bulanda, mu kuya kwa nshita ukusalapula ‘kulatwala icisabo ca mutende e kutila ubulungami.’ (Heb. 12:5, 6, 11) Nga ca kuti tulebishanya no muntu uwatamfiwa mu cilonganino nelyo uwaifumya mu cilonganino, ninshi tulesuusha ukusalapula kwa kwa Yehova. Twilalaba ukuti Yehova asalapula abantu bakwe ‘mu kulinga.’ (Yer. 30:11) E ico tulatwalilila ukusubila ukuti uwatamfiwa akabwelela kuli Shifwe uwaba no luse. Ilyo tulelolela tulatwalilila, ukutungilila ukusalapula kwa kwa Yehova kabili tulabombesha pa kuti bucibusa bwesu na Yehova butwalilile ubwakosa.—Esa. 1:16-18; 55:7.

TAMBENI VIDIO ITILA TWALILILENI UKUBA ABA CISHINKA NO MUTIMA UMO, KABILI ASUKENI AMEPUSHO YAKONKAPO:

• 

  Bushe abafyashi Abena Kristu bomfwa shani umwana wabo nga asha Yehova?

• 

  Bushe icilonganino kuti ca-afwa shani aba mu lupwa abatwalilila ukuba aba cishinka kuli Yehova?

• 

  Lyashi nshi ilya mu Baibolo ililanga ico cacindamina ukuba aba cishinka sana kuli Yehova ukucila ifyo tulingile ukuba aba cishinka kuli balupwa wesu?

• 

  Finshi twingacita pa kuti tuleba sana aba cishinka kuli Yehova ukucila ifyo tulingile ukuba aba cishinka kuli balupwa wesu?