Bushe Kuti Mwatemwa Ukuya kwi Isukulu lya Bakabila ba Bufumu?

Bushe muli ne myaka pa kati ka 23 na 65 kabili ni mwe bapainiya ba nshita yonse? Bushe mwalikwata ubumi ubusuma, kabili kuti mwatemwa ukubombela uko bakabila ba mbila nsuma baceepa? Nga ca kuti mwayasuka ati ee, bushe mwalibala amutontonkanyapo ukuyako kwi Sukulu lya Bakabila ba Bufumu? Ukutula apo ili sukulu lyatendekele, bamunyinefwe na bankashi abengi abaupana na bashimbe baliyako. Na lyo line pali ino nshita tulefwaya sana bamunyinefwe abashimbe. Kanshi mulelomba Yehova ukuti alelenga mulefwaisha ukubomba kabili mulepashanya no Mwana wakwe. (Amalu. 40:8; Mat. 20:28; Heb. 10:7) E ico moneni ifyo mwingacita pa kuti mukafike pa fifwaikwa pa kuti mukayeko kuli ili sukulu.

Milimo nshi iyo aba bwananyina abapita muli ili sukulu ba bapeela? Bamo abapita muli ili sukulu balabatuma ukuya mu kubombela ku cifulo uko balanda indimi shimbi e lyo bambi balabatuma ukuya mu kubila imbila nsuma ku citubwingi mu misumba iikalamba. Mu kupita kwa nshita, bamo abapita muli ili sukulu balaba bakaafwa ba kwa kangalila wa muputule, balaba bakangalila wa muputule nelyo bamishonari. Ilyo muletontonkanya pa milimo mwingabombako mu cilonganino ca kwa Lesa, muleumfwa ifyo kasesema Esaya aumfwile ilyo atile: “E po ndi! Ntumeni.”—Esa. 6:8.

TAMBENI VIDIO ITILA BAMISHONARI BALABOMBESHA MU MULIMO WA KULOBOLOLA, LYENA ASUKENI AMEPUSHO YAKONKAPO:

• 

  Bushe bamishonari babasala shani?

• 

  Milimo nshi iyo bamishonari balebomba pali ino nshita?

• 

  Mapaalo nshi yamo ayo bamishonari bakwata?