Mulesungilila Icupo Cenu

Yehova amona ukuti imilapo iyo abaleupana balapa yalicindama icine cine, kabili afwaya abaupana batwalilila ukuba pamo. (Mat. 19:5, 6) Kwaliba ababomfi ba kwa Lesa abengi ababa ne nsansa mu fyupo fyabo. Na lyo line, takwaba mu cupo umushiba amafya. Tatufwile ukulatontonkanya nge fyo aba muli ici calo batontonkanya nga bakwata amafya mu cupo, ukuti balingile fye ukulekana nelyo ukupaatukana. Finshi mwe baupana mwingacita pa kuti musungilile icupo cenu?

Moneni ifintu 5 ifingamwafwa.

1. Mufwile ukusungilila umutima wenu, ici cilolele mu kuti tamufwile ukulasengasenga nelyo ukulatamba amafilimu umwaba ubulalelale. Pantu ukucita ifi kuti kwalenga mu cupo cenu mwaba amafya.—Mat. 5:28; 2 Pet. 2:14.

2. Mulekosha bucibusa bwenu na Lesa, kabili imwe na bena mwenu mulefwaisha ukulacita ifingalenga asekelela.—Amalu. 97:10.

3. Muletwalilila ukufwala ubuntu bupya kabili mulecitilako abena mwenu utuntu utusuma pa kuti baleba ne nsansa.—Kol. 3:8-10, 12-14.

4. Muletwalilila ukuba no mucinshi pa kulanshanya.—Kol. 4:6.

5. Muleba no kutemwa ilyo mulepeela abena mwenu ifyo mulingile ukubapeela.—1 Kor. 7:3, 4; 10:24.

Abena Kristu nga balecindika icupo, ninshi balecindika Katendeka wa cupo, Yehova.

TAMBENI VIDIO ITILA TULINGILE ‘UKULABUTUKA NO KUSHIPIKISHA’—MULEKONKA AMAFUNDE ILYO MULEBUTUKA, LYENA ASUKENI AMEPUSHO YAKONKAPO:

• 

  Mafya nshi abaupana bengakwata mu kupita kwa nshita, nangu ca kuti pa kutendeka baleikala fye bwino?

• 

  Mashinte nshi aya mafunde ayengafwa abaupana abaleka ukutemwana?

• 

  Mafunde nshi Yehova afwaya abaupana ukulakonka?

• Finshi abaupana balingile ukulacita pa kuti baleba ne nsansa?