IFYO FWE BENA KRISTU TULINGILE UKULAIKALA

Ifyaba mu Citabo Citila Kuti Mwaba ne Nsansa Umuyayaya!

Bushe mulatemwa ukubomfya amavidio na mepusho ifyaba mu citabo citila Kuti Mwaba ne Nsansa Umuyayaya!? Bushe mulatemwa ukubomfya fimbi ifyaba mu citabo pamo nga “Abantu Bamo Batila,” “Ifyo Mwingacita,” e lyo na “Ishibilenipo na Fimbi”? Finshi fimbi ifyabamo ifyo mwasanga ukuti filamwafwa ilyo muletungulula amasambililo?—Mat. 28:19, 20.

Icitabo citila “Kuti Mwaba ne Nsansa Umuyayaya!” pa “JW Library” app. Akalelangilila apatila “Amavidio ne mpapulo shimbi ifya mu Cipande 1.”

Amavidio ne mpapulo shimbi: Nga ca kuti mulebomfya icitabo capulintwa pa kutungulula isambililo, kuti mwacita shani pa kuti musange amavidio yonse ne mpapulo shimbi? Mufwile ukuya mu citabo ca pa foni nelyo pa tabuleti, e lyo mwasala icipande cimo pa fipande 4, lyena pa mpela ya cipande cimo na cimo epo mwingasanga amavidio ne mpapulo ifya muli ico cipande. (Moneni icikope 1.)

Apaba ati “Printed Edition”: Nga mulebomfya icitabo ca pa foni nelyo ica pa tabuleti pa kutungulula isambililo, inshita shimo kuti mulebomfyako na patila “Printed Edition.” Nga namwisula isambililo mufwile ukutinika pa tumatoni tutatu utwaba pa muulu ku kulyo, no kutinika apaleti “Printed Edition.” Nga mwatinikapo kuti mwamona ifyebo ifingi kabili ici cikalenga muletontonkanya pa fyo ifyebo mulelanshanya fikatene no mutwe we sambililo. Pa kubwelela uko mwaciba mufwile ukutinika palya pene pa tumatoni tutatu e lyo mwatinika apaleti “Digital Edition.”

Icitabo citila “Kuti Mwaba ne Nsansa Umuyayaya!” pa “JW Library” app. Akalelangilila akabokoshi akatila “Bushe Ninjipekanya?” na “Ifyebo na fimbi.”

“Bushe Ninjipekanya?”: Nga mwaya ku mpela ya cipande 4 e lyo mwatinika apaleti “Bushe Ninjipekanya?” mwalamona utubokoshi umwaba ifyo umuntu afwile ukucita pa kuti afikepo ukulabila imbila nsuma pamo ne cilonganino na pa kuti afikepo ukubatishiwa. (Moneni icikope 2.)

Ifyebo na fimbi: Mu fyebo na fimbi mwaba ubulondoloshi bwalundwako pa masambililo yamo ayacindama. Mu citabo ca pa foni nelyo ica pa tabuleti, pa mpela ya fyebo na fimbi paliba apa kutinika pa kuti mubwelele palya pene mwaciba mu citabo. (Moneni icikope 2.)

Nga ca kuti umusambi alelunduluka ica kuti abatishiwa no kubatishiwa ilyo tamulapwisha icitabo citila Kuti Mwaba ne Nsansa Umuyayaya!, mufwile ukushininkisha ukuti mwapwisha ukusambilila icitabo nangu ca kuti umusambi alibatishiwa. Kuti mwatwalilila ukulapenda inshita, ifipempu, ne sambililo nangu ca kuti umusambi alibatishiwa. Nga ca kuti mwaya na kasabankanya mu nenu kwisambililo kabili alelandapo na o kuti apenda inshita.