IFYO FWE BENA KRISTU TULINGILE UKULAIKALA
Yehova Alatwafwa Ukushipikisha Amafya
Muli shino inshiku sha kulekelesha, tulakwata amafya ayengi. Inshita shimo, kuti twamona kwati amafya tukwete nayakulisha te kuti tushipikishe. Na lyo line, nga twatwalilila ukupalama kuli Yehova, akatwafwa ukulashipikisha amafya nangu yengakula shani. (Esa. 43:2, 4) Kuti twacita shani pa kuti tupalame kuli Yehova ilyo tuli na mafya?
Ipepo. Nga twaeba Yehova ifili ku mutima, alalenga twaba no mutende no kuleka ukusakamikwa sana, kabili alatukosha pa kuti tushipikishe amafya.—Fil. 4:6, 7; 1 Tes. 5:17.
Ukulongana. Pali ino nshita tulakabila sana ifya kulya fya ku mupashi no kuba pamo na ba bwananyina pa kulongana. (Heb. 10:24, 25) Kanshi nga twapekanya, twaya ku kulongana kabili twaya-asukanapo, ninshi umupashi wa kwa Yehova ukalatwafwa.—Ukus. 2:29.
Ukubila imbila nsuma. Nga twaesha apo twingapesha ukutwalilila ukubika amano ku mulimo wa kubila imbila nsuma, cikatwangukila ukubika amano ku fisuma ifyo Yehova aletucitila. Kabili tukaba ifibusa ifisuma na ba bwananyina, e lyo na Yehova.—1 Kor. 3:5-10.
TAMBENI VIDIO ITILA YEHOVA AKAMUBUULA, LYENA ASUKENI AMEPUSHO YAKONKAPO:
Finshi fya-afwile ba Malu ukutwalilila ukupalama kuli Yehova na lintu bali na mafya?
Bushe amashiwi yaba pa Amalumbo 34:18 kuti yatusansamusha shani nga filya yasansamwishe ba Malu?
Nga ca kuti twakwata amafya, bushe ifyacitikile ba Malu filanga shani ukuti Yehova kuti atupeela “amaka yacila aya bantunse”?—2 Kor. 4:7