Ukutemwa Yehova no Kumutasha Kuti Fyalenga Umuntu Abatishiwa

1-2. Ukulingana ne lembo lya Imilimo 8:27-31, 35-38, cinshi calengele umulashi umwina Etiopia afwaishe ukubatishiwa?

BUSHE mulafwaya ukubatishiwa no kuba umusambi wa kwa Kristu? Ukutemwa Yehova no kumutasha kwalilenga abantu abengi basalapo ukubatishiwa no kuba abasambi ba kwa Kristu. Lekeni tulande pa ca kumwenako ca mulashi uwalebombela namfumu wa ku Etiopia.

² Ilyo umwina Etiopia asambilile fye mu Malembo ukuti alingile ukubatishiwa, taikete na ku cani, alibatishiwe. (Belengeni Imilimo 8:27-31, 35-38.) Cinshi calengele afwaishe ukubatishiwa? Ukwabula no kutwishika, alitemenwe sana amashiwi ya kwa Lesa ayo alebelenga mwi buuku lya kwa Esaya ilyo aleya mwi celeta. Kabili ilyo Filipi amulondolwelele umwalolele ifyo alebelenga, umwina Etiopia alitashishe nga nshi pa fyo Yesu amucitiile. Nomba mulandu nshi ulya mulashi ailile ku Yerusalemu? Ni co alitemenwe Yehova. Twaishiba shani? Pantu aleya ku Yerusalemu mu kupepa Yehova. Ulya mwaume alilekele ukupepa uko alepepa kale, kabili ailundile ku luko ulwaipeele kuli Lesa wa cine. Kulya kwine ukutemwa atemenwe Yehova e kwalengele asalepo ukucita icintu na cimbi icacindama, e kutila ukubatishiwa no kuba umusambi wa kwa Kristu.—Mat. 28:19.

3. Finshi nalimo fingalenga umuntu afilwa ukubatishiwa? (Moneni akabokoshi akaleti “Bushe Umutima Wenu Waba ngo Mushili Nshi?”)

³ Ukutemwa Yehova kuti kwalenga mwalafwaisha ukubatishiwa. Na lyo line ukutemwa kwine kuti kwalenga mwafilwa ukubatishiwa. Cinshi twalandila ifi? Natulandeko pa fya kumwenako fimo. Nalimo mwalitemwa sana balupwa lwenu ne fibusa fyenu abashili ba Nte kabili mulasakamana ukuti nalimo nga mwabatishiwa bakamupata. (Mat. 10:37) Nelyo limbi kwaliba ifintu fimo ifyo mwatemwa ukucita lelo mwalishiba ukuti Lesa alifipata, kabili nalimo cilamukosela ukufileka. (Amalu. 97:10) Nangu limbi ukufuma ku bwaice mwalitemwa ukusefya kumo ukwakuma ukupepa kwa bufi. Nalimo kwaliba fimo ifyo mwibukisha ifyalelenga muleba ne nsansa ilyo mwalesefya. Ifi kuti fyalenga camukosela ukuleka ukukonka intambi isho Yehova apata. (1 Kor. 10:20, 21) Kanshi kuti mwayipusha amuti, “Finshi ningile ukutemwapo sana?”

UO TULINGILE UKUTEMWA SANA

4. Cinshi icacindama sana icifwile ukulenga mwalafwaisha ukubatishiwa?

⁴ Kwaliba ifintu ifingi ifyacindama ifyo mwatemwa. Ku ca kumwenako, ilyo mushilatendeka ukusambilila Baibolo ne Nte sha kwa Yehova nalimo mwalishibe ukuti Baibolo yalicindama. Kabili nalimo mwalitemenwe sana Yesu. Apo nomba mwalishiba Inte sha kwa Yehova, mulatemwa sana ukuba nabo. Nomba ukutemwa ifi fintu twalandapo te kwingalenga mwalafwaya ukuipeela kuli Yehova no kubatishiwa. Icacindamisha icifwile ukulenga mwalafwaisha ukubatishiwa kutemwa Yehova Lesa. Nga mwatemwa Yehova ukucila ifyo mwatemwa icili conse, takwakabe umuntu nangu umo nelyo icintu icili conse icikalenga mukafilwe ukulamubombela. Ukutemwa Yehova kukalenga mukalefwaisha ukubatishiwa kabili kukamwafwa ukutwalilila aba cishinka kuli ena nga mwabatishiwa.

5. Mepusho nshi twala-asuka?

⁵ Yesu alandile ukuti tufwile ukutemwa Yehova no mutima wesu onse, no mweo wesu onse, no kutontonkanya kwesu konse, e lyo na maka yesu yonse. (Marko 12:30) Kuti mwacita shani pa kuti mutemwe sana Yehova no kumucindika? Nga tuletontonkanya pa fyo Yehova atutemwa, na ifwe tulamutemwa. (1 Yoh. 4:19) Finshi fimbi ifyo mukatemwa sana kabili ifyo mukalafwaisha ukucita nga mwatemwa sana Yehova?b

6. Ukulingana na Abena Roma 1:20, finshi fimo fingalenga twasambilila pali Yehova?

⁶ Mulesambilila pali Yehova ku fyo abumba. (Belengeni Abena Roma 1:20; Ukus. 4:11) Muletontonkanya pa fyo amano ya kwa Yehova yamonekela mu fyo abumba pamo nga inama ne fimenwa. Na kabili kuti mwasambilila na fimbi ku fyo Yehova apanga umubili wenu mu musango wa kupapa. (Amalu. 139:14) Muletontonkanya na pa maka Yehova abika mu kasuba. Akasuba lutanda lumo pa ntanda ishingi nga nshi isho Lesa apanga.c (Esa. 40:26) Ukutontonkanya pa fyo Yehova abumba kukalenga mukalemucindika sana. Na lyo line, ukwishiba ukuti Yehova wa mano kabili wa maka, kwaba fye pa fintu ifingalenga mwatendeka ukuba cibusa wakwe. Lelo pa kuti mutemwe sana Yehova no kuba ifibusa fyakwe, mufwile ukwishiba ifingi pali ena.

7. Finshi mufwile ukushininkisha pa kuti mutemwe sana Yehova?

⁷ Mufwile ukushininkisha ukuti Yehova alimutemwa. Bushe cilamukosela ukushininkisha ukuti Kabumba wa muulu ne sonde alimwishiba kabili alamusakamana? Nga cilamukosela, muleibukisha ukuti Yehova “taba kutali kuli ifwe umo umo.” (Imil. 17:26-28) “Alafwaya mu mitima yonse,” kabili alimulaya nga filya Davidi aebele Solomone ati, “nga wamufwaya, akaleka ukamusange.” (1 Imila. 28:9) Na kuba icalenga mulesambilila Baibolo ni filya Yehova alanda ukuti, ‘nalikupalamika’ kuli ine. (Yer. 31:3) Nga mwaishiba ifingi pa fyo Yehova amucitila, e lyo mukamutemwa sana.

8. Kuti mwalanga shani ukuti mulatasha Yehova pa fyo amutemwa?

⁸ Inshila imo iyo tulangilamo ukuti tulatasha pa fyo Yehova atutemwa, kulalanda nankwe mwi pepo. Nga mule-eba Lesa ifili ku mutima kabili nga mulemutasha pa fyo amucitila, mukamutemwa sana. Ukumona ifyo Yehova asuka amapepo yenu kukalenga bucibusa bwenu na ena bulekoselako. (Amalu. 116:1) Mukashininkisha ukuti aleshiba ifyo mumfwa. Lelo pa kuti mupalame sana kuli Yehova mufwile ukwishiba ico atemenwa ifintu fimo, ico apatila ifintu fimo, ne co acitila ifintu fimo. Kabili mufwile no kwishiba ifyo afwaya mulecita. Kuti mwaishiba fye ifyo Lesa afwaya mulecita nga ca kuti mulesambilila Icebo cakwe Baibolo.

9. Kuti mwalanga shani ukuti mulatasha pali Baibolo?

⁹ Muletasha pa Cebo ca kwa Lesa, Baibolo. Ni mu Baibolo fye e mwaba icine pali Yehova na pa co abumbiile abantu. Kuti mwalanga ukuti mulatasha pali Baibolo nga muleibelenga cila bushiku, nga mulepekanishisha libela isambililo lya Baibolo ilyo tabalaisa mu kumusambilisha, kabili nga mulekonka ifyo mulesambilila. (Amalu. 119:97, 99; Yoh. 17:17) Bushe mwalitantika ukubelenga Baibolo cila bushiku? Bushe mulakonka ifyo mwatantika pa kuti mulebelenga Baibolo cila bushiku?

10. Cinshi cimo icalenga Baibolo ukuba icitabo icaibela sana?

¹⁰ Cimo icalenga Baibolo ibe citabo icaibela ni co mwaliba amalyashi ya bantu abaliko ilyo Yesu ali pano calo. Baibolo e citabo fye ceka icilondolola icishinka pa fyo Yesu amucitila. Nga mwasambilila pa fyo Yesu alelanda ne fyo alecita, mukalafwaisha ukuba cibusa wakwe.

11. Cinshi cingamwafwa ukutemwa Yehova?

¹¹ Nga mwatemwa Yesu, mukatemwa sana Yehova. Cinshi twalandila ifi? Pantu Yesu e upashanya sana imibele ya kwa Wishi. (Yoh. 14:9) Kanshi nga mulesambilila sana pali Yesu, mukeshiba bwino Yehova kabili mukamutemenwako. Tontonkanyeni pa fyo Yesu alelangulukilako abapiina, abalwele, na bashakwete aba kubaafwa. Abengi balemona abantu ba musango uyu ukuti ba pa nshi. Tontonkanyeni na pa fyo Yesu alandile ifingamwafwa mu mikalile yenu iya cila bushiku na pa fyo muba ne nsansa nga mulefikonka.—Mat. 5:1-11; 7:24-27.

12. Cinshi mukalafwaisha ukucita nga mulesambilila sana pali Yesu?

¹² Nga muletontonkanya sana pa fyo Yesu aipeele ukuba icilubula pa kuti imembu shesu shelelwe, mukamutemwa icine cine. (Mat. 20:28) Nga mwaishiba ukuti Yesu ali-itemenwe ukumufwila, nalimo kuti mwalafwaya ukulapila pa kuti Yehova akamwelele. (Imil. 3:19, 20; 1 Yoh. 1:9) Nga mwatemwa sana Yesu na Yehova, mukalafwaisha ukuba pamo na bantu ababatemwa.

13. Finshi Yehova amupeela?

¹³ Muletemwa ulupwa lwa kwa Yehova. Balupwa lwenu ne fibusa mwakwete abashili ba Nte nalimo te kuti bomfwikishe ico mwasalilapo ukuipeela kuli Yehova. Nalimo kuti balamukaanya no kumukaanya. Lelo Yehova akamwafwa pantu alimupeela bamunyinenwe na bankashi ababa lupwa lwa ku mupashi. Aba muli ulu lupwa bakamutemwa nga nshi kabili bakulamutungilila nga mwatwalilila ukuba pamo nabo. (Marko 10:29, 30; Heb. 10:24, 25) Mu kuya kwa nshita, balupwa lwenu nabo nalimo kuti batendeka ukubombela Yehova no kulakonka amafunde yakwe.—1 Pet. 2:12.

14. Ukulingana ne fyaba pali 1 Yohane 5:3, finshi ifyo mwaimwena pa mafunde ya kwa Lesa?

¹⁴ Muletasha pa mafunde ayo Yehova atupeela kabili muleyakonka. Ilyo mushilasambilila pali Yehova, nalimo mwaleisalila icifwile ukuba icalungama ne cifwile ukuba icabipa. Nomba apo mwalisambilila pali Yehova, mwalishiba ukuti caliwama ukulakonka ifyo amona ukuti fyalilungama. (Amalu. 1:1-3; belengeni 1 Yohane 5:3.) Tontonkanyeni na pa fyo Baibolo ifunda abalume, abakashi, abafyashi, e lyo na bana. (Efes. 5:22–6:4) Bushe mu lupwa lwenu mwaliba insansa pa mulandu wa kuti mulakonka uku ukufunda? Bushe mwaliba ne mibele iisuma pa mulandu wa kuti mulakonka ifyo Baibolo ilanda pa kusala bwino ifibusa? Bushe ici calilenga muleba sana ne nsansa? (Amapi. 13:20; 1 Kor. 15:33) Ukwabula no kutwishika namwasuka ukuti ee kuli aya mepusho.

15. Cinshi mwingacita nga mulefwaya ukwishiba ifingamwafwa ukulakonka amashinte ya mu Baibolo?

¹⁵ Nalimo inshita shimo kuti camukosela ukwishiba ifyo mwingacita pa kuti mulekonka amashinte ya mafunde ya mu Baibolo ayo mulesambilila. Nomba Yehova alabomfya icilonganino cakwe ukutupekanishisha impapulo ishilondolola ifyaba mu Baibolo, ishitwafwa ukwishiba icalungama ne calubana. (Heb. 5:13, 14) Nga mulebelenga ishi impapulo kabili muleisambilisha, mukalamona ifyo ukukonka amashinte ya mafunde ya mu Baibolo kwingamwafwa. Kabili nga muleyakonka, kuti mwatemwa sana icilonganino ca kwa Yehova.

16. Bushe Yehova ateyanya shani abantu bakwe?

¹⁶ Muletemwa icilonganino ca kwa Yehova kabili mulecitungilila. Yehova aliteyanya abantu bakwe mu filonganino, kabili Umwana wakwe Yesu e mutwe wa filonganino fyonse. (Efes. 1:22; 5:23) Yesu alisonta ibumba ilinono ilya baume abasubwa ukulatungulula umulimo afwaya wabombwa muno nshiku. Yesu aitile ili ibumba ukuti “umusha wa cishinka kabili uwashilimuka.” Ababa muli ili ibumba balibika sana amano ku mulimo babapeela uwa kumwafwa ukuba ifibusa fya kwa Yehova no kumwafwa ukucingilila bucibusa bwenu na Yehova. (Mat. 24:45-47) Cimo ico umusha wa cishinka acita pa kumusakamana ca kutila, alashininkisha ukuti abaume abafikapo basontwa ukuba baeluda pa kuti balemutungulula no kumucingilila. (Esa. 32:1, 2; Heb. 13:17; 1 Pet. 5:2, 3) Baeluda balaipeelesha pa kuti balemusansamusha na pa kuti balemwafwa ukupalama sana kuli Yehova. Nomba cimo icacindama sana ico baeluda bengacita kumwafwa ukulasambilisha abantu pali Yehova.—Efes. 4:11-13.

17. Ukulingana ne lembo lya Abena Roma 10:10, 13, 14, cinshi tulingile ukulaebelako abantu pali Yehova?

¹⁷ Muleafwa abantu ukusambilila ukutemwa Yehova. Yesu aebele abasambi bakwe ukulasambilisha abantu pali Yehova. (Mat. 28:19, 20) Nalimo kuti twalaumfwila fye ili funde pa mulandu wa kuti natwishiba ukuti tulingile ukumfwila. Nomba nga ca kuti mwatemwa sana Yehova, mukalafwaisha ukwebako abantu pali ena nga filya umutumwa Petro no mutumwa Yohane balefwaisha ukumubombela. Batile: “Te kuti tuleke ukulanda ifyo twamwene ne fyo twaumfwile.” (Imil. 4:20) Tulaba ne nsansa nga nshi nga twa-afwa umuntu ukutemwa Yehova. Elenganyeni ifyo Filipi kabila wa mbila nsuma aumfwile ilyo a-afwile umwina Etiopia ukusambilila icine icali mu Malembo ica kuti no kubatishiwa abatishiwa! Nga mulekonka ifunde Yesu atupeele ilya kubila imbila nsuma nga filya Filipi acitile, ninshi mulelanga apabuuta tutu ukuti mulefwaya ukuba Inte ya kwa Yehova. (Belengeni Abena Roma 10:10, 13, 14.) Kabili ici cikalenga mukayipushe icipusho ico umwina Etiopia aipwishe. Atile: “Cinshi cilendesha ukubatishiwa?”—Imil. 8:36.

18. Finshi tukasambilila mu cipande cikonkelepo?

¹⁸ Ukubatishiwa e cintu icacindamisha ico mufwile ukusalapo ukucita mu bumi bwenu. Apo calicindama nga nshi ukusalapo ukubatishiwa, mulingile ukwishiba bwino bwino umo ukubatishiwa kwalola no kutontonkanyapo sana. Finshi mulingile ukwishiba pa lubatisho? Finshi mulingile ukucita ilyo mushilabatishiwa na pa numa ya kubatishiwa? Tukasuka aya mepusho mu cipande cikonkelepo.