“Palameni kuli Lesa, na o akapalama kuli imwe.”—Yakobo 4:8
Bushe Lesa Alomfwa Amapepo Yesu?
Bushe mwalitala amuipushapo nga ca kuti Lesa alakutika ku mapepo yenu? Nga mwali-ipushapo, ninshi te imwe mweka. Abantu abengi balipepapo kuli Lesa ukuti abafwe ukupwisha amafya yamo, lelo ayo amafya tayapwa. Bushe ici calola mu kuti Lesa tasuka amapepo? Awe. Baibolo ilanda ukuti, Lesa alomfwa amapepo yesu nga ca kuti twapepa ukulingana ne fyo afwaya. Natulande pa fyo Baibolo ilanda.
LESA ALAKUTIKA.
Baibolo itila: “Mwe bomfwa ipepo, kuli imwe e ko abantunse bakesa.”—Amalumbo 65:2.
Bamo balanda ukuti ico bapepela, ni co balomfwako bwino nga bapepa nangu ca kuti bamona kwati takwaba uukutika ku mapepo. Lelo ifi te fyo caba. Baibolo itila: “Yehovaa aba mupepi na bonse abalilila kuli ena, kuli bonse abalilila kuli ena mu cishinka. . . . Akomfwa ne nkuuta yabo.”—Amalumbo 145:18, 19.
Kanshi kuti twashininkisha ukutila, Yehova Lesa, alakutika ku mapepo ya babomfi bakwe. Atweba ukuti: “Mukalilila kuli ine, mukesa no kupepa kuli ine, na ine nkomfwa kuli imwe.”—Yeremia 29:12.
LESA AFWAYA MULEPEPA KULI ENA.
Baibolo itila: “Beni no mute wa kupepa.”—Abena Roma 12:12.
Baibolo ilatukoselesha ukuti tulingile ‘ukulapepa lyonse.’ Kanshi kuti twatila, Yehova alafwaya tulepepa kuli ena.—Mateo 26:41; Abena Efese 6:18.
Cinshi Lesa afwaila ukuti tulepepa kuli ena? Tontonkanyeni pali ici: Abafyashi fye bonse, balafwaya ukuti abana balelomba ubwafwilisho kuli bena. Ca cine ukuti umufyashi kuti naishiba ifyo umwana alefwaya, nelyo ifyo aleumfwa, lelo ilyo umwana aeba umufyashi ukuti alefwaya ubwafwilisho, ninshi alelanga ukuti alicetekela umufyashi wakwe. Ifi fine e fyo caba na kuli Yehova. Nga twapepa, ninshi tulemulanga ukuti twalimucetekela, kabili tulefwaya ukuba ifibusa fyakwe.—Amapinda 15:8; Yakobo 4:8.
LESA ALIMUBIKAKO SANA AMANO.
Baibolo itila: “Mulepoosa amasakamika yenu yonse pali ena, pantu asakamana imwe.”—1 Petro 5:7.
Lesa afwaya tulepepa kuli ena pantu alitutemwa, kabili alitubikako amano. Alishiba ifitusakamika kabili alafwaya ukutwafwa.
Lyonse fye, Imfumu Davidi yalepepa kuli Yehova Lesa kabili yalemweba ifyo ileumfwa ne fyo iletontonkanya. (Amalumbo 23:1-6) Bushe Lesa aleumfwa shani pali ifi Davidi alecita? Lesa alitemenwe sana Davidi kabili alekutika ku mapepo yakwe. (Imilimo 13:22) Na ino ine inshita, icilenga Lesa alekutika ku mapepo yesu, ni co alitubikako sana amano.
“NATEMWA, PANTU YEHOVA ALOMFWA ISHIWI LYANDI”
Uwalembeleko ibuuku lya Amalumbo ilya mu Baibolo, e walandile aya amashiwi. Alishininkishe ukuti Lesa aleasuka amapepo yakwe, ne ci calilengele bucibusa akwete na Lesa ukukoselako kabili calilengele aleshipikisha ilyo alekwata amafya.—Amalumbo 116:1-9.
Nga twashininkisha ukuti Lesa alasuka amapepo yesu, tukalapepa lyonse. Natulande pa fyacitikile ba Pedro abekala ku Spain. Umwana wabo uwa myaka 19, alifwile mu busanso bwa pa musebo. Ilyo ba Pedro bali sana no bulanda, balipepele kuli Lesa ukuti abafwe no ku basansamusha. Bushe Lesa alyaswike ipepo lyabo? Batile: “Yehova alyaswike amapepo yandi, kabili alibomfeshe Abena Kristu banensu abatukoseleshe sana no mwina mwandi.”
Ilingi line Lesa alasuka amapepo yesu ukubomfya ifibusa fyesu ifyatutemwa
Nangu ca kuti Lesa tabuushishe umwana wa ba Pedro ilyo bapepele, alibafwile pamo no lupwa lwabo mu nshila ishacindama. Abena mwabo ba María Carmen batile: “Ipepo lyalengafwa ukushipikisha ilyo naleloosha. Nalimwene ukuti Lesa alemona ifyo nalepitamo, pantu nga napepa naleumfwako bwino.”
Ificitikila abantu muno nshiku e lyo ne fyaba mu Baibolo, filatulanga ukuti Lesa alasuka amapepo. Na lyo line, filatulanga no kuti te mapepo yonse Lesa asuka. Nomba cinshi cilenga Lesa aleasuka amapepo yamo no ku kana-asuka amapepo yambi?
a Yehova, e shina lya kwa Lesa.—Amalumbo 83:18.