Bushe Amapepo Kuti Yamwafwa Shani?

Ilyo ba Pamela balwele ubulwele bwa kansa, baliile ku cipatala ukuti babondape. Na kabili balipepele kuli Lesa ukuti abafwe ukushipikisha. Bushe ipepo lyalibafwile?

Ba Pamela batile: “Ilyo baleng’undapa, naleba sana no mwenso, lelo nga napepa kuli Yehova naleshipikisha kabili umwenso walecepako. Ncili ndomfwa ubukali, lelo ipepo lilangafwa ukukanaumfwa sana ububi. Abantu nga banjipusha ifyo ndeumfwa, mbeba ukuti, ‘nshileumfwa bwino, lelo ndi ne nsansa.’”

Kwena tatulingile ukulalolela ukuti ifyabipa fikatucitikile e lyo tukatendeke ukupepa. Bonse fye tulakwata amafya, ayakalamba na yanono, kabili tulakabila ukuti Lesa aletwafwa ukuyacimfya. Nomba bushe ipepo kuti lyatwafwa?

Baibolo itila: “Poosa icisendo cobe pali Yehova, na o akakukosha. Takaleke uwalungama ukutelententa.” (Amalumbo 55:22) Aya amashiwi yalatukoselesha icine cine. Nomba bushe ipepo kuti lyamwafwa shani? Nga mwapepa kuli Lesa mu nshila iyo afwaya ukuti mulepepelamo, akamupeela ifyo mulekabila pa kuti mucimfye amafya mukwete.—Belengeni akabokoshi akaleti “Ifyo Ipepo Lingamwafwa.”

Ifyo Ipepo Lingamwafwa

Kuti lyalenga mwaba no mutende

Baibolo itila: “Mwisakamikwa nangu kamo, lelo muli fyonse lekeni ifyo mulelomba fishibikwe kuli Lesa mu kupepa no kupapaata pamo no kutootela; no mutende wa kwa Lesa uwacila amatontonkanyo yonse ukalinda imitima yenu na matontonkanyo yenu muli Kristu Yesu.” (Abena Filipi 4:6, 7) Nga mwaeba Yehova fyonse ifili ku mutima, akamwafwa ukuba no mutende nangu ca kuti muli na mafya.

Kuti lyalenga Lesa amupeela amano

Baibolo itila: “E ico, nga ca kutila umo pali imwe abulwa amano, eleka ukulomba kuli Lesa na o akamupeela, pantu Lesa apeela fye kuli bonse ukwabula ukwebaula.” (Yakobo 1:5) Nga natukwata sana amafya, ilingi line tulafilwa ukupingula bwino pa fintu. Nga mwapepa kuli Lesa ukuti amupeele amano, kuti amwafwa ukwibukisha amashinte ya mafunde ayalembwa mu Cebo cakwe Baibolo.

Kuti lyalenga Lesa amupeela amaka no kumusansamusha

Baibolo itila: “Muli fyonse ndi na maka pantu kuli uulenkosha.” (Abena Filipi 4:13) Apo Yehova ni Lesa Wa Maka Yonse, kuti amupeela amaka ya kucimfya amafya mukwete nelyo aya kushipikisha. (Esaya 40:29) Baibolo ilanda no kuti Yehova ni “Lesa wa cisansamushi conse, uutusansamusha mu macushi yesu yonse.”—2 Abena Korinti 1:3, 4.

BUSHE NA IMWE KUTI MWATEMWA UKUTI LESA ALEASUKA AMAPEPO YENU?

Yehova tatupatikisha ukuti tulepepa kuli ena, lelo alatukoselesha ukulapepa. (Yeremia 29:11, 12) Nga ca kuti kale mwaleumfwa kwati Lesa taleasuka amapepo yenu, tamufwile ukumfwa ububi nelyo ukunenuka. Te lyonse umufyashi uwatemwa umwana wakwe engamupeela icintu cilya cine fye alefwaya, nelyo pa nshita ilya ine fye alecifwaya. Limo umufyashi kuti apeela umwana icintu icili bwino ukucila na pa co acilomba. Ukwabula no kutwishika, umufyashi uwatemwa umwana wakwe, alamwafwa.

Yehova Lesa Shifwe uwatutemwa ukucila umufyashi uuli onse, alafwaisha ukulamwafwa. Nga ca kuti muleibikilishako ukulacita ifyo tulandilepo muli ino magazini, Yehova akala-asuka amapepo yenu mu nshila iisuma ukucila na pa fyo mwingenekela.—Amalumbo 34:15; Mateo 7:7-11.