Ifyo Mucita Kuti Fyalenga Mwaisaikala Bwino ku Ntanshi Nelyo Iyo

Pa myaka 3,500 iyapita, Yehova Lesa alyebele abalemupepa ifyo balingile ukucita ifyali no kulenga baisaba ne nsansa ku ntanshi, atile: “Nimbika pa ntanshi yenu umweo ne mfwa, ipaalo ne citiipu; e ico saleni umweo pa kuti mube no mweo, imwe na bana benu.”—Amalango 30:19.

Kanshi balya bantu balingile ukusalapo bwino ifya kucita pa kuti bengaba ne nsansa. Naifwe bene e fyo tulingile ukucita. Baibolo yalitweba ifyo tulingile ukucita pa kuti tukabe ne nsansa, itila: ‘Muletemwa Yehova Lesa wenu, no kulaumfwila ishiwi lyakwe.’—Amalango 30:20.

KUTI TWATEMWA SHANI YEHOVA NO KULAUMFWILA ISHIWI LYAKWE?

IFYO BAIBOLO ISAMBILISHA: Pa kuti mutemwe Yehova mufwile ukubala mwasambilila pali ena muli Baibolo. Ilyo mwakulasambilila mwakulamona ukuti ni Lesa uwatutemwa kabili afwaya ukuti ifintu filetuwamina. Alanda ukuti mulepepa kuli ena “pantu asakamana imwe.” (1 Petro 5:7) Baibolo yalitulaya ukuti nga twabombesha ukupalama kuli ena, ‘na o akapalama kuli ifwe.’—Yakobo 4:8.

MULECITA IFYO MULESAMBILILA: Nga mulekonka ifyo Baibolo ilanda ninshi mulekutika kuli Lesa. Nga mulecita ifi “mukatunguluka kabili e lyo mukaba aba mano.”—Yoshua 1:8.