Amepusho Ukufuma ku Babelenga

Pa Ubwina Lebi 19:16 paba ifunde litila, “wilaiminina ku kushinina umunobe.” Bushe ili funde lyalola mwi, kabili finshi twingasambililako?

Yehova aebele abena Israele ukuti bafwile ukuba aba mushilo. Pa kuti babe aba mushilo, abebele no kuti: “Wilapitana mu bantu bobe ku kucita ulwambo. Wilaiminina ku kushinina umunobe ku kufwaya umulopa wakwe. Nine Yehova.”—Lebi 19:2, 16.

Amashiwi ya kuti “wilaiminina ku kushinina umunobe” baliyapilibula bwino sana ukulingana ne fyo yali mu ciHebere. Nomba bushe yalola mwi? Icitabo cimo icilanda pa Ubwina Lebi citila: “Aya mashiwi ayaba muli ici cikomo . . . yalyafya ukumfwikisha pantu taca-anguka ukwishiba umwalola aya mashiwi ya ciHebere. Nga kuyapilibula fye ukulingana ne fyo yaba, kuti yapilibula ukuti ‘wiiminina mupepi nelyo wiiminina.’”

Abasambilila bamo batila pa kuti tumfwikishe amashiwi yaba pali ici cikomo tulingile ukuyekatanya ku mashiwi yaba mu cikomo 15, ayatila: “Mwilafyenga ilyo mulepingula. Mwilawila ku mulanda, kabili mwilatemwapo umukankaala. Muleba no mulinganya ilyo mulepingula umunenu.” (Lebi 19:15) Ifi nga e fyo caba ninshi ifunde lyaba pa cikomo 16 ilitila “wilaiminina ku kushinina umunobe,” lyalolele mu kuti abena Israele tabali no kufyenga umunabo muli fyonse fye, nampo nga ni mu cilye, mu makwebo nelyo mu lupwa. Na kabili tabali na kucenjesha bambi pa kuti fye ifintu fibendele bwino. Ca cine ukuti tatufwile ukulacita ifi, na lyo line umu te mwalola amashiwi yaba mu cikomo 16.

Natulande pa mashiwi ya kubalilapo ayaba muli ici cikomo. Lesa aebele abantu bakwe ukuti tabalingile ukulacita ulwambo nelyo ukulalanda amashiwi ayabipa pa muntu. Umuntu nga alecita ulwambo, alaleta amafya. Lelo uulelanda amashiwi ayabipa pa muntu umbi, alacila na pa wa lwambo. (Amapi. 10:19; Luk. Mil. 10:12-14; 1 Tim. 5:11-15; Yako. 3:6) Umuntu uulanda amashiwi ayabipa pa muntu umbi, alalanda ifya bufi ku mufulo fye pa kuti amonawile ishina. Kabili kuti ashinina umunankwe ubunte bwa bufi nangu ca kuti naishiba ukuti ukucita ifyo kuti kwalenga umunankwe bamwipaya. Nga muleibukisha, abaume abalelanda ifyabipa e bashinine Nabote ubunte bwa bufi kabili ifi bacitile fyalengele bamupoole amabwe. (1 Isha. 21:8-13) Kanshi nga fintu amashiwi yaba pa Ubwina Lebi 19:16 yalanda, umuntu uulanda ifyabipa pa muntu umbi kuti aiminina ku kushinina umunankwe ku kufwaya umulopa wakwe.

Na kabili, icingalenga umuntu ukulalanda amashiwi ayabipa pa munankwe ni co alimupata. Pali 1 Yohane 3:15, patila: “Onse uwapata munyina ni kepaya, kabili mwalishiba ukuti kepaya takwata umweo wa muyayaya.” Ilyo Lesa alandile ukuti: “wilaiminina ku kushinina umunobe ku kufwaya umulopa wakwe,” alundilepo na mashiwi ya kuti: “Wilapata munonko mu mutima obe.”—Lebi 19:17.

Kanshi amashiwi ayaba pa Ubwina Lebi 19:16 ya kusoka fwe Bena Kristu. Tatufwile ukulatontonkanya ifyabipa pa bantu nangu ukulalanda amashiwi ayabipa. Kanshi kuti twatila nga ca kuti ‘twaiminina ku kushinina’ umuntu, e kutila ukulanda ifyabipa pali ena pa mulandu wa kuti tatwamutemwa nelyo twalimufimbila ninshi twalanga fye apabuta tuutu ukuti twalimupata. Fwe Bena Kristu tatufwile ukuba no lupato nangu panono.—Mat. 12:36, 37.