Muletungilila Yesu Kangalila Wesu

1. Cinshi Yehova afwaya tulecita muno nshiku?

MUNO nshiku Lesa afwaya ukuti imbila nsuma iya Bufumu ibilwe mwi sonde lyonse. (Marko 13:10; 1 Tim. 2:3, 4) Uyu mulimo wa kwa Yehova kabili walicindama nga nshi, e calenga apeele Umwana wakwe uo atemwisha ukuti aleutungulula. Kuti twashininkisha ukuti apo Yesu e utungulula uyu mulimo, tuli no kuubomba ukufika apo Yehova afwaya ukuti ubombwe ilyo impela ishilaisa.—Mat. 24:14.

2. Finshi twalasambilila muli cino cipande?

² Muli cino cipande twalasambilila pa fyo Yesu alebomfya “umusha wa cishinka kabili uwashilimuka” ukupeela abasambi bakwe ifya kulya fya ku mupashi e lyo no kubateyanya bwino pa kuti babombe umulimo uwacindama nga nshi uwa kubila imbila nsuma. (Mat. 24:45) Twalamona ne fyo ifwe umo umo twingacita pa kutungilila Yesu e lyo no musha wa cishinka.

YESU E UTUNGULULA UMULIMO WA KUBILA IMBILA NSUMA

3. Maka nshi ayo bapeela Yesu?

³ Yesu e utungulula umulimo wa kubila imbila nsuma. Bushe kuti twashininkisha shani ifi? Ilyo Yesu ashilaya ku muulu, aile ku lupili Galili uko amonene na basambi bakwe bamo aba cishinka. Abebele ukuti: “Nabampela amaka yonse mu muulu na pano isonde.” Nomba moneni amashiwi akonkeshepo atile: “E ico kabiyeni, kalengeni aba nko shonse ukuba abasambi.” (Mat. 28:18, 19) Pa maka ayo bamupeela paba na maka ya kutungulula umulimo wa kubila imbila nsuma.

4. Mulandu nshi twingacetekelela ukuti Yesu acili alatungulula umulimo wa kubila imbila nsuma?

⁴ Yesu atile abasambi bakwe bali no kubomba umulimo wa kubila imbila nsuma e lyo no kulenga abantu ukuba abasambi mu “nko shonse” kabili ali no kuba nabo “inshiku shonse mpaka na ku mpela ya calo.” (Mat. 28:20) Amashiwi Yesu alandile yalelangilila ukuti ali no kulatungilila umulimo wa kubila imbila nsuma ukufika na muno nshiku.

5. Bushe tufikilishako shani ubusesemo ubwaba pa Amalumbo 110:3?

⁵ Yesu tasakamene ukuti takwakabe aba kubomba umulimo wa kubila imbila nsuma mu nshiku sha kulekelesha. Alishibe ukuti amashiwi ayo uwaimbile amalumbo aseseme yakafikilishiwa, aya kuti: “Abantu bobe bakaipeela abene mu kuitemenwa mu bushiku ukemya ibumba lyobe ilya bashilika.” (Amalu. 110:3) Nga ca kuti mulabila imbila nsuma ninshi muletungilila Yesu no musha wa cishinka e lyo kabili ninshi mulefikilisha no ubu ubusesemo. Nangu ca kuti uyu mulimo ulebombwa, kwaliba amafya ayo abantu abaubomba bakwata.

6. Bwafya nshi bumo ubo ababila imbila nsuma bakwata muno nshiku?

⁶ Bumo ubwafya ubo ababila imbila nsuma bakwata kubakaanya. Abasangu, intungulushi sha mapepo, e lyo na baba mu fikansa fya calo baleba abantu abengi ifya bufi pa mulimo wesu. Nga ca kuti balupwa lwesu, abantu twaishiba, e lyo na bo tubomba nabo bakutika kuli ubu ubufi, kuti balatupatikisha ukuleka ukubombela Yehova e lyo no kuleka ukubila imbila nsuma. Mu fyalo fimo abalwani besu balatiinya aba bwananyina, balabekata, e lyo no kubapoosa fye na mu fifungo. Ifi bacita tafitupapusha. Yesu asobele ukuti: “Abantu ba mu nko shonse bakamupata pa mulandu we shina lyandi.” (Mat. 24:9) Ifi abantu batupata filangilila fye ukuti Yehova alasekelela pa fyo tumubombela. (Mat. 5:11, 12) Satana Kaseebanya e ulenga baletukaanya. Lelo Yesu alikwatisha amaka ukucila Satana! Pa mulandu ne fyo Yesu atungilila uyu mulimo, imbila nsuma ilebilwa ku bantu ba mu nko shonse. Twalalandako pali fimo ifyacitika ifilangilila ukuti imbila nsuma ilebilwa ku bantu aba mu nko shonse.

7. Finshi mumona ificitika ifilangilila ukuti amashiwi ayaba pa Ukusokolola 14:6, 7 yalefikilishiwa?

⁷ Ubwafya bumbi ubo tukwata ilyo tulebila imbila nsuma bwa kuti abantu balalanda indimi ishalekanalekana. Mu cimonwa ico Yesu alangile Yohane, amwebele ukuti imbila nsuma yali no kupwisha ubu bwafya muno nshiku. (Belengeni Ukusokolola 14:6, 7.) Yali no kupwisha shani ubu bwafya? Muno nshiku tulabila ku bantu abengi pa kuti bakutike ku mbila ya Bufumu. Abantu abengi mwi sonde lyonse balabelenga impapulo pa webusaiti yesu iya jw.org pantu paliba impapulo ishaba mu ndimi ukucila pali 1,000. Ibumba Litungulula lyasuminishe ukuti bapilibule icitabo citila Kuti Mwaba ne Nsansa Umuyayaya! mu ndimi ukucila 700. Kabili ici icitabo e co tubomfya sana pa kulenga abantu ukuba abasambi. Na kabili Ibumba Litungulula lilapekanya ifya kulya fya ku mupashi ukubomfya amavidio mu lulimi lwa bankomamatwi e lyo ne mpapulo mu filembo fya bashimona. Muno nshiku tulemona uko amasesemo ayaba mu Baibolo yalefikilishiwa. Abantu “mu ndimi shonse isha nko,” balesambilila ukulanda “ululimi ulwine lwine” ulwa cine icaba mu Baibolo. (Seka. 8:23; Sefa. 3:9) Fyonse ifi filefikilishiwa pa mulandu wa kuti Yesu Kristu e uletungulula umulimo wa kubila imbila nsuma.

8. Finshi fyafumamo ifi tubila imbila nsuma?

⁸ Muno nshiku abantu ukucila pali 8,000,000 mu fyalo 240 e baba mu cilonganino ca kwa Yehova kabili cila mwaka abantu abengi sana balabatishiwa. Nomba icacindama ukucila na pa mpendwa ca kuti, aba Bena Kristu balifwala “ubuntu bupya” e kutila baliba ne mibele iisuma. (Kol. 3:8-10) Abantu abengi balileka ukuba ne mibele yabipa iyo bakwete pamo nga ubulalelale, ulubuli, akapaatulula e lyo no kutemwisha icalo cabo. Amashiwi ayaba pali Esaya 2:4 aya kuti ‘tabakasambilile inkondo na kabili,’ yalefikilishiwa. Apo twaliba ne mibele iisuma, tulalenga abantu ukwisa mu cilonganino ca kwa Lesa, kabili tulangilila no kuti tutungululwa na Kristu Yesu. (Yoh. 13:35; 1 Pet. 2:12) Icilenga fyonse ifi filecitika ni co Yesu alatutungilila.

YESU ASONTA UMUSHA

9. Ukulingana na Mateo 24:45-47, cinshi Yesu asobele ukuti e cikacitika mu nshiku sha kulekelesha?

⁹ Belengeni Mateo 24:45-47. Yesu asobele ukuti mu nshiku sha kulekelesha ali no kusonta “umusha wa cishinka kabili uwashilimuka” uukalatupeela ifya kulya fya ku mupashi. E ico twenekela ulya umusha ukulabombesha muno nshiku. Ifi fine e fyo caba. Yesu alabomfya ibumba ilinono ilya baume basubwa ukupekanishisha abantu ba kwa Lesa na balefwaya ukusambilila Baibolo ifya kulya fya ku mupashi “pa nshita yalinga.” Aba baume tabatontonkanya ukuti ni bakapitao pa citetekelo ca ba bwananyina. (2 Kor. 1:24) Lelo balishiba ukuti Yesu Kristu ni ‘ntungulushi kabili umukalamba wa bashilika’ uwa bantu bakwe.—Esa. 55:4.

10. Citabo nshi pa fitabo fili pa cikope icalengele mutendeke ukubombela Yehova?

¹⁰ Ukutula mu 1919, umusha wa cishinka alapekanya impapulo ishalekanalekana ishilenga abantu bafwaisha ukusambilila Baibolo. Mu 1921 umusha wa cishinka alipekenye icitabo icitila The Harp of God umo abantu balesambilila amasambililo ya mu Baibolo aya kutendekelako. Ilyo papitile inshita balilembele impapulo na shimbi. Citabo nshi icalengele ukuti mwishibe no kutemwa Shifwe wa ku muulu? Bushe citabo ca kuti “Lekeni Lesa Abe Uwa Cine!,” Icine Icitungulula ku Bumi bwa Ciyayaya, Kuti Waikala Kuli Pe na pe muli Paradise Pe Sonde, Ukwishiba Uko Kutungulula ku Mweo wa Muyayaya, Bushe Cinshi Baibolo Isambilisha?, nelyo icitabo icitila Kuti Mwaba ne Nsansa Umuyayaya!, icitabo icipya ico tulebomfya? Ifi fitabo fyonse bafipangile pa kuti filetwafwa ukulenga abantu ukuba abasambi kabili fyalefuma fye pa nshita twalefikabila.

11. Mulandu nshi cacindamina ukuti bonse tulesambilila sana pali Yehova e lyo na Baibolo?

¹¹ Te basambi fye abalingile ukulasambilila pali Yehova e lyo na Baibolo. Bonse fye tulingile ukulasambilila. Umutumwa Paulo alembele ukuti: “Ifya kulya ifyakosa fya bakalamba.” Paulo alandile no kuti ukulaisambilisha sana pali Yehova e lyo na Baibolo kuti kwalenga twalalekanya “icalungama ne calubana.” (Heb. 5:14) Muli shino nshiku, calyafya ukumfwila amafunde ya kwa Yehova pantu abantu abengi baliba ne mibele yabipa. Nomba Yesu alashininkisha ukuti twasambilila ifyo tulingile ukwishiba pa kuti tukoshe icitetekelo cesu. Ifyo tusambilila fifuma mu Cebo ca kwa Lesa Baibolo. Yesu e utungulula umusha wa cishinka ukutupekanishisha no kutupeela ifya kulya fya ku mupashi.

12. Bushe twacindika shani ishina lya kwa Lesa nga filya Yesu alicindike?

¹² Twalicindika ishina lya kwa Lesa nga filya fine Yesu alicindike. (Yoh. 17:6, 26) Ku ca kumwenako, mu 1931 twalitendeke ukubomfya ishina lya mu Malembo ilya kuti Inte sha kwa Yehova. Ukucita ifi kwalilangile ifyo twacindika ishina lya kwa Lesa kabili twalefwaya ukwishibikilwa kwi shina lyakwe. (Esa. 43:10-12) Ukutula mu October 1931 ishina lya kwa Lesa lyalitendeke ukuba pa nkupo ya Ulupungu lwa kwa Kalinda. Na kabili muli Baibolo Amalembo ya Calo Cipya, ishina lya kwa Lesa balilibwesesha apo lilingile ukuba. Ifi fyalipusana ne fyo ababa mu macalici ya batila Bena Kristu bacita, pantu bena balifumya ishina lya kwa Lesa mu ma Baibolo yabo ayo bapilibula.

YESU ALATEYANYA ABASAMBI BAKWE

13. Cinshi calenga mushininkishe ukuti Yesu alabomfya “umusha wa cishinka kabili uwashilimuka” muno nshiku? (Yohane 6:68)

¹³ Yesu alipanga icilonganino pano isonde umwaba ukupepa kwa cine ukubomfya “umusha wa cishinka kabili uwashilimuka.” Bushe mumfwa shani pa kuba muli ici cilonganino? Nalimo muletontonkanya pa mashiwi umutumwa Petro aebele Yesu ukuti: “Ni kuli nani twingaya? Ni mwe muli na mashiwi ya mweo wa muyayaya.” (Yoh. 6:68) Bushe atukaanaba mu cilonganino ca kwa Yehova nga ni kwisa twaba? Kristu abomfya icilonganino cakwe pa kushininkisha ukuti twakwata fyonse ifyo tulekabila, ifilenga twaba aba cishinka kuli Lesa. Alatusambilisha ne fya kubomba bwino umulimo wa kubila imbila nsuma. Na kabili alatwafwa ukufwala “ubuntu bupya” pa kuti tulelenga Yehova alesekelela.—Efes. 4:24.

14. Cinshi mwatemwa ifi mwaba mu cilonganino ca kwa Yehova mu nshita ya cikuko ca COVID-19?

¹⁴ Yesu alatweba ifya kucita ilyo tuli na mafya. Twalimwene ukuti e fyo acita ilyo icikuko ca COVID-19 catendeke. Ilyo abengi mwi sonde tabaishibe ifya kucita, Yesu alishininkishe ukuti batweba ifyo tulingile ukucita pa kuti tuicingilile ku cikuko. Balitukoseleshe ukulafwala akasalu ka kufimba pa mona na pa kanwa ilyo tuli ku cintubwingi e lyo no kulatalukana. Baeluda nabo balibebele ukulalanshanya sana na ba mu cilonganino baba e lyo no kulaishiba ifyo balekabila pa kuti baicingilile ku cikuko na pa kuti bapalame sana kuli Yehova. (Esa. 32:1, 2) Na kabili ukutamba amalipoti ye Bumba Litungulula kwaletukoselesha sana pantu e mo baletweba ifya kucita.

15. Mu nshita ya cikuko, bushe batwebele ukuti twakulalongana shani e lyo no kubila imbila nsuma, kabili fisuma nshi fyacitika?

¹⁵ Ilyo kwali icikuko balitwebele ifyo twali no kulacita pa kuti tulelongana e lyo no kulabila imbila nsuma. Bwangu bwangu twalitendeke ukubomfya Intaneti pa kulongana kwa pa cilonganino, ukulongana kwa muputule e lyo no kwa citungu. Na kabili twatendeke ukubila imbila nsuma ukubomfya amafoni e lyo no kulemba amakalata. Yehova alipaalile ifyo twalebombesha. Aba pa ma Bethel ayengi batile, impendwa ya bakasabankanya ileilekulilako. Na kuba, bamunyinefwe na bankashi abengi balilandile pa fisuma ifyacitike mu nshita ya cikuko.—Moneni akabokoshi akaleti “Yehova Alapaala Umulimo Wesu uwa Kubila Imbila Nsuma.”

16. Cinshi tufwile ukucetekela?

¹⁶ Bamo nalimo baletontonkanya ukuti icilonganino ca kwa Lesa calikoseshe sana amafunde ya kukonka mu nshita ya cikuko. Na lyo line, pa miku iingi twalimwene ukuti ifyo baletweba fyali fye bwino. (Mat. 11:19) Nga twatontonkanya pa fyo Yesu aletungulula abasambi bakwe, tatutwishika no kutwishika ukuti te mulandu ne fili no kucitika ku ntanshi, Yehova no Mwana wakwe bakatwafwa.—Belengeni AbaHebere 13:5, 6.

17. Mumfwa shani ifi Yesu atutungulula?

¹⁷ Twaliba sana ne nsansa ifi Yesu e ututungulula! Twaba mu cilonganino umushaba akapaatulula pa mulandu no kupusana kwa ntambi, ifyalo e lyo ne ndimi. Balatusambilisha ifingi ukufuma mu Cebo ca kwa Lesa kabili balatusambilisha ne fyo tulingile ukucita pa kuti tulebomba bwino umulimo wa kubila imbila nsuma. Bonse fye balatusambilisha ukuba ne mibele iisuma e lyo no kulatemwana. Kanshi kuti twaba ne nsansa pantu Yesu e ututungulula!