Amepusho Ukufuma Ku Babelenga

Ni bani abakabuushiwa pe sonde, kabili kubuuka nshi kukabako?

Moneni ifyo Baibolo yasuka ifi ifipusho.

Imilimo 24:15 itila kukaba “ukubuuka kwa balungama na bashalungama.” Abalungama, bantu abaleumfwila Lesa ilyo bashilafwa. Kanshi amashina yabo yalilembwa mwi buuku lya mweo. (Mal. 3:16) Pa bashalungama, paba abantu abashasambililepo Yehova bali no mweo. Kanshi amashina yabo tayalembwa mwi buuku lya mweo.

Yohane 5:28, 29 ilanda pali aya yene mabumba yabili ayalembwa pa Imilimo 24:15. Yesu alandile ukuti “abalecita ifisuma bakabuukila ku mweo,” e lyo “abalecita ifibi bakabuukila ku bupingushi.” Abalungama, bantu abalecita ifisuma ilyo bashilafwa. Bakabuuka, pantu amashina yabo yalilembwa mwi buuku lya mweo. Abashalungama bantu abalecita ifyabipa ilyo bashilafwa. Bena bakabuukila ku bupingushi. Ilyo bakabuuka, amashina yabo ninshi tayalalembwa mwi buuku lya mweo, kabili pali iyi nshita bakalabaceceeta ukumona nga nabalinga ukulembwa mwi buuku lya mweo. Pali iyi nshita, bakalasambilila pali Yehova pa kuti amashina yabo yakalembwe mwi buuku lya mweo.

Ukusokolola 20:12, 13 kulondolola ukuti bonse abakabuushiwa bakakabila ukulaumfwila ifyalembwa mu “mabuuku yapombwa” e kutila amafunde ayapya ayo Lesa akatupeela mu calo cipya. Bonse abashakaleumfwila aya mafunde, Yehova akabonaula.—Esa. 65:20.

Daniele 12:2 yasobele ukuti bamo abafwa bakabuukila “ku mweo wa muyayaya, [e lyo bambi] ku kuseebana kabili ku kusuulwa kwa muyayaya.” Ici cikomo cilanda pa fyo abakabuuka bakabapingula, e kutila ukubukila ku “mweo wa muyayaya nelyo ku kusuulwa kwa muyayaya.” Kanshi ilyo imyaka 1,000 ikapwa, abantu bamo bakaba no mweo wa muyayaya, e lyo bambi bakonaulwa umuyayaya.—Ukus. 20:15; 21:3, 4.

Kuti twapashanya aya mabumba yabili ku bantu abalefwaya ukukuukila ku calo cimbi. Abalungama kuti twabapashanya ku bantu abo bapeela icitupa ca kubasuminisha ukubomba nelyo ukwikala mu calo. E lyo abashalungama, ku bantu abo bapeela icitupa ca kubasuminisha ukwikala mu calo inshita fye iinono nelyo abo bapeela icitupa ca kubasuminisha ukwikala mu calo nga bele fye mu kutandala. Pa kuti aba bantu batwalilile ukwikala mu calo, bafwile ukulacita ifilelanga ukuti nabalinga. Ifi fine e fyo cikaba na ku bashalungama abakabuuka. Pa kuti bakatwalilile ukwikala mu Paradaise, bakakabila ukulaumfwila amafunde ya kwa Yehova, no kulacita ifikalalanga ukuti balungami. E fyo caba na kubakuukila ku calo cimbi abo bapeela icitupa ca kwikalamo fye inshita iinono nelyo ukwikalilila, bonse bafwile ukulaumfwila amafunde ya mu calo. Pantu nga tabalekonka amafunde kuti babatamfyamo. Ifyo bakalacita ilyo bali mu calo e fikalenga bakatwalilile ukwikalamo nelyo ukubatamfyamo. Ifi fine e fyo cikaba na ku bakabuuka, ifyo bakaba aba cishinka mu calo cipya e fikalenga bakatwalilile ukwikalamo nelyo iyo.

Yehova ni Lesa wa luse, uwa mulinganya kabili taba na lufyengo. (Amala. 32:4; Amalu. 33:5) Pa mulandu wa kuti aliba no kutemwa, akabuusha abalungama na bashalungama. Na lyo line, akalaenekela bonse abo akabuusha ukulakonka amafunde yakwe ayalanda pa calungama ne calubana. Bantu fye abakalanga ukuti balimutemwa kabili abakalaumfwila amafunde yakwe e bakekala umuyayaya mu calo cipya