Ifyo Mwingacita pa Kuti Mube no Mutende Ilyo Muli na Mafya

1. Bushe “umutende wa kwa Lesa” mutende nshi, kabili tunonkelamo shani nga twakwata uyu mutende? (Abena Filipi 4:6, 7)

KWALIBA umutende uo abantu ba muli cino calo bashaishiba, no yu “mutende wa kwa Lesa” uo tukwata pa mulandu wa kuba ifibusa na Shifwe wa ku muulu. Nga tuli no mutende wa kwa Lesa, tulomfwa ukuti twalicingililwa. (Belengeni Abena Filipi 4:6, 7.) Tulaba ifibusa na bantu abatemwa Shifwe wa ku muulu, kabili tulaba ifibusa sana na “Lesa wa mutende.” (1 Tes. 5:23) Nga twaishiba Shifwe, tulemucetekela e lyo no kulamumfwila, umutende wa kwa Lesa kuti watusansamusha nga tuli na mafya.

2. Mulandu nshi twingacetekelela ukutila kuti twaba no mutende wa kwa Lesa?

² Bushe kuti twaba no mutende wa kwa Lesa ilyo tuli na mafya pamo nge cikuko, amasanso ayakalamba, ifimfulunganya, nelyo nga baletucusha? Amafya ya musango uyu kuti yalenga twaba no mwenso. Lelo Yesu aebele abasambi bakwe ati: “Mwisakamikwa kabili mwitiina.” (Yoh. 14:27) Icawamako ca kuti, bamunyinefwe na bankashi balacita ifi Yesu alandile. Yehova alalenga baba no mutende ilyo bakwete amafya ayakalamba.

IFYO TWINGABA NO MUTENDE ILYO KULI ICIKUKO

3. Bushe icikuko kuti calenga shani mwafilwa ukuba no mutende?

³ Ifintu filaaluka sana nga kuli icikuko. Natulandeko pa fyacitikile abantu abengi ilyo kwali icikuko ca COVID-19. Pa bantu abo baipwishe, abengi balefilwa ukulaala pa mulandu wa cikuko. Ici icikuko calengele abantu abengi balesakamana sana, baletalalilwa, balenwa sana ubwalwa, balebomfya imiti bubi bubi, balelwa mu mayanda, kabili bamo balefwaya no kuipaya. Nga ca kuti uko mwikala kwaba icikuko, kuti mwacita shani pa kuti mube no mutende wa kwa Lesa, na pa kuti mwilasakamana sana?

4. Mulandu nshi ukwishibila ifyo Yesu alandile ukuti e fikalacitika mu nshiku sha kulekelesha filengela twaba no mutende?

⁴ Yesu asobele ukuti mu nshiku sha kulekelesha, mukaba ifikuko nelyo amalwele yalekanalekana “mu ncende shimo shimo.” (Luka 21:11) Bushe ukwishiba ifi kulenga shani twaba no mutende? Tatupapa nga kwaba ifikuko pantu Yesu alilandile ukuti fikalacitika. Kanshi tulakonka amashiwi Yesu aebele abali no kulaikala mu nshiku sha ku mpela, ayakuti: “Cenjeleni ukuti mwikatiina.”—Mat. 24:6.

5. (a) Ukulingana na mashiwi yaba pa Abena Filipi 4:8, 9, cinshi tufwile ukupepelapo nga ca kuti kwaba icikuko? (b) Bushe nkashi umo anonkelemo shani ilyo alekutika kuli Baibolo iyo babelenga, kabili finshi twingasambililako?

⁵ Nga kwaba icikuko kuti twatendeka ukusakamana sana no kumfwa umwenso. Ifi e fyacitikile bankashi Desi.b Ilyo bawishi mwaice, abakalamba babo, e lyo na badokota babo bafwile ku cikuko ca COVID-19, balitendeke ukumfwa umwenso. Baletontonkanya ukutila kuti ba-ambula akashishi no kwambukisha banyina abali abakoloci. Pa mulandu wa cikuko, baletontonkanya ukuti nalimo incito kuti yapwa, kabili balesakamana uko bali no kulafumya indalama isha kushitamo ifya kulya e lyo no kusonkela ing’anda. Ifi fyonse fyalebasakamika sana ica kuti balefilwa ukulaala. Nomba cinshi calengele ba Desi baleke ukusakamana? Balipepele kuli Yehova ukuti alenge bateke umutima, e lyo no kulatontonkanya pa fintu ifisuma. (Belengeni Abena Filipi 4:8, 9.) Balekutika kuli Baibolo iyo babelenga, kabili cali kwati Yehova “alelanda” nabo. Batile: “Amashiwi ayasuma aya bantu ababelenga Baibolo, yalelenga naleka ukusakamana kabili yalenjibukisha ukuti Yehova alansakamana.”—Amalu. 94:19.

6. Bushe ukuisambilisha Baibolo e lyo no kulongana kuti kwamwafwa shani ilyo kuli icikuko?

⁶ Nga kuli icikuko te kuti tulecita fyonse ifyo twalecita kale. Lelo tatulingile ukuleka ukuisambilisha Baibolo nelyo ukulalongana. Amalyashi ayo balemba mu mpapulo shesu e lyo na mavidio, yakamwibukisha ukuti aba bwananyina balitwalilila ukuba aba cishinka, te mulandu no kuti balekwata amafya ayo na imwe mukweteko. (1 Pet. 5:9) Nga mulelongana, cikalenga mukaletontonkanya pa fintu ifisuma ifyaba mu Baibolo. Na kabili, ukulongana kukalenga mulekoseleshanya na ba bwananyina. (Rom. 1:11, 12) Nga muletontonkanya pa fyo Yehova aafwile ababomfi bakwe ilyo balwele, ilyo bali no mwenso, nelyo ilyo batalalilwe, icitetekelo cenu cikakoselako. Kabili na imwe muli no kucetekela ukuti ali no kumwafwa.

7. Finshi twingasambilila ku fyacitile umutumwa Yohane?

⁷ Mulelanshanya na ba bwananyina. Nga kuli icikuko, kuti batweba ati twilapalamana na bantu, ukubikako fye na ba bwananyina. Ifi nga fyacitika, kuti mwaumfwa nge fyo umutumwa Yohane aumfwile. Alefwaisha ukumonana na cibusa wakwe Gai. (3 Yoh. 13, 14) Na lyo line, alishibe ukuti tali no kumonana na cibusa wakwe. E ico alimulembele kalata. Nga ca kutila te kuti mube pamo na ba bwananyina, mulebatuminako foni, ukubalembelako ama meseji, nelyo ukubatumina foni ukubomfya Intaneti. Nga ca kuti mulelanshanya sana na ba bwananyina, tamwakaletalalilwa kabili tamwakalesakamikwa sana. Nga mwasakamikwa sana muletumina baeluda pa kuti bamukoselesheko.—Esa. 32:1, 2.

IFYO MWINGABA NO MUTENDE NGA KWACITIKA AMASANSO AYAKALAMBA

8. Bushe amasanso ayakalamba kuti yalenga shani mwaleka ukuba no mutende?

⁸ Nga ca kuti uko mwikala kwaliko mulamba, icinkukuma, nelyo umulilo, kuti mwalaumfwa ububi pa nshita yalepa. Nga ca kuti lupwa wenu nangu cibusa wenu alifwile, ifipe mwakwete fyalyonaike, kuti mwalaumfwa sana ubulanda, ukupelelwa nelyo ukufulwa. Ici tacilepilibula ukuti mwalitemwa ifyuma, nelyo tamwaba ne citetekelo. Ifyamucitikile fyalibipile kabili abantu bamo kuti baenekela ukutila mwalanenuka. (Yobo 1:11) Nomba te mulandu ne fyamucitikile, kuti mwaba no mutende. Finshi mwingacita pa kuti mube no mutende?

9. Finshi Yesu alandile ifingalenga twaipekanya ku masanso ayakalamba?

⁹ Ibukisheni ifyo Yesu asobele. Abantu bamo batontonkanya ukuti amasanso ayakalamba te kuti yacitike uko bekala, lelo twalishiba ukuti muli shino nshiku sha kulekelesha amasanso ayakalamba yakalabako kabili yamo kuti yalenga twaba na mafya. Yesu aebele abasambi bakwe ukuti kukaba “ifinkukuma ifikalamba,” e lyo na masanso yambi ilyo impela ishilaisa. (Luka 21:11) Na kabili asobele ukuti kuli no kuba “ukufulisha kwa bubi,” kabili ifi fine e fyo tumona muno nshiku. (Mat. 24:12) Ku ca kumwenako, tulamona ifimfulunganya e lyo no ko ifipondo fisansa abantu. Yesu tatile ifi fikalacitikila fye abashili fibusa fya kwa Yehova. Na kuba, amasanso ayakalamba yalicitikilapo ababomfi ba kwa Yehova aba cishinka. (Esa. 57:1; 2 Kor. 11:25) Yehova nalimo te kuti atucingilile mu cipesha amano ku masanso ayakalamba, lelo akatwafwa ukuteka umutima e lyo no kuba no mutende.

10. Bushe ukuipekanishisha ku masanso pali ino nshita kulanga shani ukuti twaliba ne citetekelo? (Amapinda 22:3)

¹⁰ Kuti twaishiba ifya kucita nga kwacitika amasanso, nga twali-ipekanishisha kabela. Bushe nga twaipekanishisha ku masanso ayakalamba ninshi tatwacetekela Yehova? Awe nakalya! Na kuba, kulanga fye ukuti twalicetekela Yehova ukutila kuti atusakamana. Mulandu nshi twalandila ifyo? Icebo ca kwa Lesa citusambilisha ukuti tulingile ukuipekanishisha ku masanso. (Belengeni Amapinda 22:3.) Kabili icilonganino ca kwa Lesa calitwalilila ukutukoselesha ukuipekanishisha ku masanso. Cibomfya ifipande fiba mu mpapulo, ukulongana, e lyo ne fya kubilisha.c Bushe twalicetekela Yehova? Nga twalimucetekela, ninshi tukakonka ifyo batufunda ili line ilyo kushilacitika amasanso.

11. Cinshi tulesambilila ku fyacitile ba Margaret?

¹¹ Natulandeko pa fyacitile bankashi Margaret. Abalashi ba buteko balibebele ukufulumuka ilyo ku ncende baleikala kwali umulilo wa mpanga. Apo abantu bafulumukile pa muku umo, imisebo yaliswile kabili imyotoka shalilekele ukwenda. Kwali sana icushi icafiita, kabili ba Margaret balifililwe ukufuma muli motoka. Lelo balipuswike pantu bali-ipekanishishe kabela. Mu cola cabo mwali mapu iyo babomfeshe pa kuti basange inshila imbi iya kubomfya pa kuti bafulumuke muli ilya ncende. Balipitilemo kale muli iyi nshila pa kuti beshibe ifyo bali no kwenda nga kwaba ubusanso. Ifi ba Margaret baipekenye, calengele bapusuke ilyo kwali ubusanso.

12. Cinshi tukonkela ifyo batweba pa kuti tuicingilile?

¹² Pa kuti abalashi ba buteko batucingilile, kuti batweba ukuleka ukwenda pa nshita imo, ukufulumukila ku cifulo cimbi, nelyo ukuleka ukucita fimo pa kuti tuicingilile. Abantu bamo tabakonka ifyo babeba ukucita, nelyo kuti bawayawaya ukucita ifyo babeba pa mulandu wa kuti tabalefwaya ukusha ifipe bakwata. Inga Bena Kristu bena bacita shani? Baibolo itila: “Pa mulandu wa kwa Shikulu, mulenakila umuntu onse: nampo nga ni mfumu pantu e mukalamba pali bonse atemwa abalashi pantu e bo imfumu yapeela amaka.” (1 Pet. 2:13, 14) Icilonganino ca kwa Lesa na co cilatweba ifya kucita pa kuti citucingilile. Lyonse balatwibukisha ukuti tulepeela baeluda amanambala yesu aya foni, nelyo apo twikala pa kuti bengatusanga nga kwacitika amasanso. Bushe mwalipeela baeluda amanambala yenu aya foni e lyo na po mwikala? Inshita shimo kuti batweba ukuyaikala kumo nelyo ukufulumukila kumbi. Na kabili kuti batweba ifyo twingacita pa kuti tupokelele ifyo tulekabila, nelyo ukwafwilishako bambi. Nga twakaana ukukonka ifyo batweba, kuti twailetelela nelyo twaletelela baeluda. Muleibukisha ukutila aba baume ba cishinka balinda imyeo yesu. (Heb. 13:17) Ba Margaret batile: “Nalishininkisha ukuti ukukonka ifyo baeluda batwebele e lyo ne fyo icilonganino ca kwa Lesa catwebele, e kwalengele mpusuke.”

13. Cinshi cilenga Abena Kristu abengi abafulumuka batwalilile ukusekelela no kuba no mutende?

¹³ Bamunyinefwe na bankashi abengi abafulumuka pa mulandu wa masanso, inkondo, nelyo ifimfulunganya, balitwalilila ukubombesha mu mulimo wa kwa Lesa konse uko baya. Nga filya fine Abena Kristu ba kubalilapo abafulumwike pa mulandu wa kuti balebacusha balecita, aba bwananyina nabo balatwalilila ‘ukubila imbila nsuma ya cebo ca kwa Lesa.’ (Imil. 8:4) Ukubila imbila nsuma kulalenga baletontonkanya sana pa Bufumu bwa kwa Lesa ukucila ukulatontonkanya pa mafya bakwete. Ici cilenga baletwalilila ukusekelela e lyo no kuba no mutende.

IFYO TWINGABA NO MUTENDE ILYO BALETUCUSHA

14. Bushe ukutucusha kuti kwalenga shani twafilwa ukuba no mutende?

¹⁴ Nga baletucusha, kuti twafilwa ukuba no mutende. Lelo tulaba ne nsansa nga tulelongana pamo, ukubila imbila nsuma ukwabula abakutukanya, nelyo ukulabomba imilimo imbi iya kwa Lesa ukwabula ukusakamana ukuti balatwikata. Nomba nga tatulelongana pamo, tulasakamana sana pa fyalacitika. Kwena tacabipa ukumfwa ifi. Na lyo line tufwile ukucenjela. Yesu alandile ukuti abasambi bakwe bamo bali no kuleka ukuba ne citetekelo pa mulandu wa kubacusha. (Yoh. 16:1, 2) Kuti twatwalilila shani ukuba no mutende ilyo baletucusha?

15. Mulandu nshi tushilingile ukutiinina ukutucusha? (Yohane 15:20; 16:33)

¹⁵ Baibolo itila: “Bonse abafwaisha ukwikala ukulingana na bukapepa muli Kristu Yesu bakabacusha.” (2 Tim. 3:12) Munyinefwe Andrei calimukosele ukwishiba ukuti ababomfi ba kwa Lesa bonse bali no kubacusha, ilyo babindile umulimo wa Nte sha kwa Yehova mu calo ekala. Aletontonkanya ukuti: ‘Muno calo cesu ba Nte bengi. Bushe abalashi kuti bakaka shani ba Nte bonse aba?’ Ifi fyalengele ba Andrei balesakamana sana. Aba bwananyina bambi balicetekele Yehova, kabili tabaletontonkanya ukutila te kuti babekate. Balishibe ukuti bali no kubekata, lelo tabasakamene sana nge fyo ba Andrei bali. Ba Andrei balitendeke ukupashanya aba bwananyina no kucetekela sana Yehova. Tapakokwele, baishileba no mutende kabili pali ino nshita balasekelela te mulandu na mafya. Na ifwe bene kuti twaba no mutende, kabili kuti twalasekelela te mulandu na mafya. Nangu ca kuti Yesu alitusokele ukuti bakulatucusha, alitwebele no kutila kuti twatwalila ukuba aba cishinka.—Belengeni Yohane 15:20; 16:33.

16. Finshi ifyo tulingile ukulakonka ilyo baletucusha?

¹⁶ Nga ca kuti babinda umulimo wesu, aba ku Bethel nelyo baeluda kuti batweba fimo ifya kukonka. Ifyo bengatweba kuti fyatucingilila, kuti fyalenga twatwalilila ukupokelela ifya kulya fya ku mupashi e lyo kuti fyalenga twatwalilila no kubila imbila nsuma. Nga bamweba ifya kucita, mulekonka bwino bwino ifyo bamweba, nangu ca kuti tamwishibe ico bamwebela ukucita ifyo. (Yako. 3:17) Na kabili, tamufwile ukulalanda ifyebo pa ba bwananyina e lyo na pa fyo icilonganino cibomba ku bantu abashilingile ukufishiba.—Luk. Mil. 3:7.

17. Nga filya fine abatumwa bacitile, cinshi tufwile ukufwaisha ukucita?

¹⁷ Cimo icilenga Satana ukusansa abantu ba kwa Lesa, ni co ‘balikwata umulimo wa kushimikila pali Yesu.’ (Ukus. 12:17) Mwilaleka Satana na bantu aba muli ici calo balemutiinya. Tulaba ne nsansa no mutende nga tulebila imbila nsuma, no kusambilisha abantu. Mu nshita ya Bena Kristu ba kubalilapo, intungulushi sha baYuda shaebele Abena Kritsu ukuleka ukubila imbila nsuma, lelo balya baume ba cishinka basalilepo ukunakila Lesa. Tabalekele ukulabila imbila nsuma, kabili calengele babe ne nsansa. (Imil. 5:27-29, 41, 42) Nga ca kuti ubuteko bwalibinda umulimo wesu uwa kubila imbila nsuma, tufwile ukuba abacenjela ilyo tulebomba uyu mulimo. (Mat. 10:16) Lelo nga tulebombesha, tukaba no mutende uo tukwata nga tulelenga Yehova ukulasekelela, e lyo na uo tukwata nga tulebila imbila nsuma.

“LESA WA MUTENDE AKABA NA IMWE”

18. Nani wingatupeela umutende wa cine cine?

¹⁸ Tulecetekela ukuti na mu nshita ya mafya kuti twaba no mutende. Nga twakwata amafya tuleibukisha ukuti ico tukabila mutende wa kwa Lesa, e kutila umutende uo Yehova apeela. Mulemucetekela nga kwaba icikuko, amasanso ayakalamba, nelyo nga balemucusha. Tekwesha ukufuma mu cilonganino cakwe. Muletontonkanya pa fisuma ifili no kucitika ku ntanshi. Nga mulecita ifi fyonse, “Lesa wa mutende akaba na imwe.” (Fil. 4:9) Mu cipande cikonkelepo, tukasambilila pa fyo twingafwa Abena Kristu banensu ukuba no mutende wa kwa Lesa ilyo bali na mafya.