Ifyo Abengi Bakonka Ilyo Balesala Ifya Kucita

Mupepi fye na bantu bonse balishiba ukuti ifintu fimo fyaliba bwino e lyo fimbi fyalibipa. Ku ca kumwenako, abantu abengi balishiba ukuti, ukwipaya, ukulaala na bantu pa maka, e lyo no kucenda abana kwalibipa. Balishiba no kuti ukuba no mulinganya, icikuuku, no luse kwaliwama. Nomba ifintu pamo nga ukusala uwa kulaala nankwe, ukuba ne cishinka, nelyo ifya kukusha abana, abantu abengi bamona ukuti icili conse ico wingasala ukucita pali ifi, caliba fye bwino. Bamo balasalapo ukucita ifintu fimo pa mulandu ne fyo baleumfwa, e lyo ne fyo balupwa lwabo ne fibusa baleumfwa pali uyo umulandu. Bushe ukucita ifi kwaliba fye bwino?

BUSHE TULINGILE UKULAPINGULA PA FINTU UKULINGANA FYE NE FYO TULEUMFWA?

Ilingi line tulasala ifya kucita ukulingana ne fyo tuleumfwa ukuti e fili bwino, na kuba ifi e fyo beta no kuti kampingu. (Abena Roma 2:​14, 15) Nangu fye bana abanono baleshiba nga ca kuti umuntu umo bamufyenga, kabili balomfwa ububi nga ca kuti balufyanya. Mu kuya kwa nshita, ifyo tusambilila mu lupwa lwesu, ku fibusa fyesu, kuli bakafundisha besu, uko twikala, uko tupepa, na ku ntambi isho tukonka, filakuma kampingu yesu. Ilyo twasala ifya kucita, kampingu ilatweba nga ca kuti ifyo tusalile fili fye bwino nelyo iyo.

Ifyo tumona ifyabipa e lyo ne fisuma, filakuma ifyo tumfwila abantu uluse, ifyo tutasha, ifyo tuba no mulinganya e lyo ne fyo tulangulukila abanensu. Na kabili kuti fyalenga twilacita ifingalenga twaba na mafya pamo no lupwa lwesu, nelyo fingalenga twaseebana no kumfwa ububi.

Bushe lyonse tulingile ukulakonka fye ifyo tumfwa? Ilyo ba Garrick bali abaice, balecita fye ifyo abene balemona ukuti e fili bwino. Nomba basangile ukuti te lyonse ifintu fyaleba bwino nga bacita fye ifyo abene balemona ukuti e fisuma. Mu kuya kwa nshita baishileba ne mibele iyabipa pamo nga ubulalelale, ukubomfya bubi bubi imiti iyabindwa, bucakolwa, e lyo no lubuli.

IFYO BAMBI BOMFWA

Tatucita fye ifintu ukulingana ne fyo tuleumfwa, lelo tulakonka ne fyo abanensu baleumfwa. Nga twacita ifi, tulasambililako ku fya bacitikilapo e lyo na ku fyo baishiba. Nga tulecita ifyo balupwa, ifibusa fyesu, e lyo na bena mupalamano besu baishiba ukuti e fyalungama, balatucindika sana.

Bushe lyonse tulingile ukulakonka fye ifyo abantu bambi bamona ukuti e fyalungama? Ilyo ba Priscila bali abaice balecita fye ifyo abanabo balemona ukuti e fisuma kabili balecita ubulalelale. Baishilesanga ukuti ukulacita ifyo abanabo balemona ukuti e fisuma takwalengele baba ne nsansa. Batile: “Ukucita ifyo abanandi bonse balecita, takwalelenga ndeumfwa bwino. Lelo kwalilengele ndecita ifintu ukwabula ukutontonkanyapo kabili ndeibika mu busanso.”

NOMBA CINSHI CINGATWAFWA UKULAPINGULA BWINO PA FINTU?

Ilyo tulesala ifya kucita, calicindama ukutontonkanya pa fyo tumfwa, ne fyo abantu bambi bomfwa. Nomba te lyonse ukucita ifi kulenga twasala bwino ifya kucita. Inshita shimo kuti twafilwa ukumona ifyabipa ifingafuma mu fyo twasala ukucita. (Amapinda 14:12) Kabili nangu ca kuti ifwe e lyo na bantu bambi tulemona ukuti icintu cimo caliba fye bwino, nga twacita ico cintu nalimo kuti mwafuma amafya kabili mu kuya kwa nshita ifyo tumona ico cintu kuti fya-aluka. Na kuba, imibele imo iyo kale abantu balemona kuti yalibipa, pali ino nshita abengi baimona ukuti yaliba fye bwino, e lyo imibele iyo balemona ukuti yaliba fye bwino, baimona ukuti yalibipa.

Nomba cinshi cingatwafwa ukusala bwino ifya kucita? Bushe kwaliba icingatwafwa ukuba ne mibele iisuma iishakaaluke nangu pakapite imyaka iingi?

Icawamako ca kuti, kwaliba icingatwafwa ukwishiba ifya kucita pa fintu, icingafwa umuntu uuli onse fye. Mu cipande cikonkelepo tuli no kulanda pa cingatwafwa ukwishiba ifisuma ne fyabipa.