Mulingile Ukusalapo pa Kucita Ifisuma no Kucita Ifyabipa
Imibele iyo tusalapo ukukwata ilakuma sana ifyo ifintu fiba mu bumi bwesu ku ntanshi. Yehova Lesa alishiba ici cishinka. E co afwaila tulekonka amafunde yakwe.
Yehova afwaya tuleikala umutende kabili tuleba ne nsansa
“Ine, ne Yehova, nine Lesa obe, uukusambilisha ifingakuwamina, uukwensha mu nshila iyo ufwile ukwendamo. Nga wabika fye amano ku mafunde yandi, umutende obe kuti waba ngo mumana, no bulungami bobe nga mabimbi ya pali bemba.”—Esaya 48:17, 18.
Kabumba Lesa wesu e waishiba bwino ifyo tulingile ukulaikala. Alitweba ukuti tulekonka amafunde yakwe pa kuti ifintu filetuwamina. Nga tulekonka amafunde ya kwa Lesa tatwakaletwishika nga ca kuti ifintu fikaba fye bwino ku ntanshi.
Yehova tatweba ukuti tulecita ifyo tushingakumanisha.
“Pantu ili ifunde ndemweba lelo talikosele sana kuli imwe ukulikonka, kabili talili ukutali.”—Amalango 30:11.
Pa kuti tulekonka amafunde ya kwa Lesa tulingile ukwaluka mu fyo tutontonkanya na mu fyo tucita. Na lyo line, Yehova tatupeela amafunde ayakosa ukukonka. Pantu na kuba ni Kabumba wesu uwaishiba bwino ifyo tushingakumanisha ukucita. Kabili ilyo twaishiba bwino Yehova, tusanga ukuti “amafunde yakwe taya-afya.”—1 Yohane 5:3.
Yehova alilaya ukuti akula-afwa bonse abakonka amafunde yakwe.
“Ine, ne Yehova Lesa obe, ndeikata ukuboko kobe ukwa ku kulyo, ndekweba ati, ‘Witiina. Ine nkakwafwa.’”—Esaya 41:13.
Kuti twakumanisha ukukonka amafunde ya kwa Lesa pantu alatwafwa. Kuti atwafwa ukubomfya Icebo cakwe Baibo, icitukoselesha no kulenga twaba ne subilo.
Abantu abengi nga nshi balimona ukuti ifintu mu bumi bwabo filawaminako nga ca kuti balekonka amafunde ayaba mu Baibo. Bushe kuti mwatemwa ukwishibilapo na fimbi pa fyo Baibo ilanda? Kuti mwatendeka ukusambilila Baibo ukubomfya broshuwa itila Kuti Mwaba ne Nsansa Umuyayaya! Kuti mwakopolola iyi broshuwa ukwabula ukulipila pa jw.org. Yalilanda pa fintu pamo nga:
Bushe Baibo Kuti Yamwafwa Shani?
Baibo Ilalenga Abantu Baba ne Subilo
Bushe Kuti Mwacetekela Ukuti Ifyaba mu Baibo fya Cine?
Ilyo mulesambilila ifyaba mu Cebo ca kwa Lesa Baibo, muli no kumona ukuti fyonse ifyabamo tafyaleka ukubomba, lelo umuntu kuti aficetekela “kabili fya muyayaya.” (Amalumbo 111:8) Ifintu filatuwamina sana nga tulekonka ifyo Baibo ilanda. Nomba, Lesa tatupatikisha ukukonka ifyo ilanda. (Amalango 30:19, 20; Yoshua 24:15) Bonse tulingile ukusalapo, nampo nga twakulakonka ifyo Icebo ca kwa Lesa cilanda nelyo iyo.