Bamunyinefwe Babili abo Basontele Ukuba mwi Bumba Litungulula

PALI Citatu, pa 18 January, 2023, kwali icishibisho icali pa jw.org, icalandile ukuti Munyinefwe Gage Fleegle na Munyinefwe Jeffrey Winder balibasontele ukuba mwi Bumba Litungulula ilya Nte sha kwa Yehova. Bonse babili balibombela Yehova ne cishinka pa myaka iingi.

Munyinefwe Fleegle akulile ku masamba ya citungu ca Pennsylvania, U.S.A., kabili bafyashi bakwe bamusambilishe icine. Ilyo ali umusepela, ulupwa lwakwe lwakukiile ku musumba uunono ukwali ukukabila. Tapakokwele, alibatishiwe pa 20 November, 1988.

Abafyashi ba ba Fleegle lyonse balebakoselesha ukubomba umulimo wa nshita yonse. Ilingi line balesunga bakangalila ba muputule e lyo na balebombela pa Bethel mu ng’anda yabo, kabili Munyinefwe Fleegle alemona ifyo aba aba bwananyina bali ne nsansa. Tapakokwele sana ukutula apo babatishiwilwe, balitendeke bupainiya bwa nshita yonse. Batendeke pa 1 September, 1989. Lyena pa numa ya myaka ibili, balifikilishe ifyo bapangile ukucita ilyo bali ne myaka 12, e kuti ukubombela pa Bethel. Batendeke ukubombela pa Bethel ya ku Brooklyn mu October 1991.

Ilyo bali pa Bethel, balibombeele Umwa Kupangila Ifitabo pa myaka 8. Lyena batendeke ukubombela ku Dipartimenti ya Mulimo. Pali ilya nshita pa myaka iinono, bali mu cilonganino ca lulimi lwa ciRussian. Mu 2006, balyupene na ba Nadia kabili nabo bene batendeke ukubombela pa Bethel. Balilongenepo mu cilonganino ca ciPortuguese kabili ukucila pa myaka 10, baba mu cilonganino ca ciSpanish. Pa numa ya kubombela mu Dipartimenti ya Mulimo pa myaka iingi, Munyinefwe Fleegle atendeke ukubombela mwi ofeshi lya Komiti ya Kusambilisha e lyo pa numa atendeke ukubombela mwi ofeshi lya Komiti ya Mulimo. Mu March 2022, balibasontele ukuba kaafwa muli Komiti ya Mulimo iye Bumba Litungulula.

Munyinefwe Winder akulile mu musumba wa Murrieta, ku California, U.S.A. Abafyashi bakwe e bamusambilishe icine, kabili abatishiwe pa 29 March, 1986. Umweshi wakonkelepo, alitendeke bupainiya bwa kwafwilisha. Alitemenwe sana ulya mulimo ica kuti alefwaya ukutwalilila. Kanshi pa numa ya kubombako pa myeshi iinono, alitendeke bupainiya bwa nshita yonse pa 1 October, 1986.

Ilyo ba Winder bali umusepela, balitandalile abakalamba babo abaume babili abalebombela pa Bethel. Ifi Munyinefwe Winder acitile fyalengele alafwaya ukubombela pa Bethel nga akula. Kabili mu May mu 1990, balimwitile ukutendeka ukubombela pa Bethel ya ku Wallkill.

Ilyo ali pa Bethel, alibombele mu madipartimenti ayalekanalekana, pamo nga Dipartimenti ya Busaka, Dipartimenti ya Farmu, e lyo na mu maofeshi yambi aya pa Bethel. Mu 1997, alyupene na ba Angela kabili bonse babili babombela pa Bethel ukufika na lelo. Mu 2014, bakukiile ku Warwick uko Munyinefwe Winder atendeke ukwafwilisha mu bukuule bwa maofeshi yakalamba. Lyena mu 2016, baile ku Watchtower Educational Center ku Patterson, uko Munyinefwe Winder alebombela mu Audio/Video Services. Ilyo papitile imyaka 4, balibwelele ku Warwick, kabili Munyinefwe Winder atendeke ukubombela mwi ofeshi lya Komiti Isakamana aba mu Mulimo Waibela. Mu March 2022 balimusontele ukuba kaafwa muli Komiti Isakamana aba mu Mulimo Waibela iye Bumba Litungulula.

Tulepepa ukuti Yehova alepaala aba abaume ababa “fya bupe ku bantu” ilyo baletwalilila ukubombesha mu mulimo wa Bufumu.—Efes. 4:8.