Bushe Mwalikwata Icitetekelo?

Pa kuti tulelenga Yehova alesekelela, tufwile ukukwata ne citetekelo. Nomba Baibo itila “te bantu bonse abakwata icitetekelo.” (2 Tes. 3:2) Ilyo umutumwa Paulo alandile aya mashiwi, alelanda pa bantu ababipa kabili “imbifi” abalemucusha. Alefwaya ukuti Lesa amupokololeko kuli aba bantu. Lelo aya mashiwi Paulo alandile pa citetekelo, tayalelanda fye kuli aba bantu abalemucusha. Abantu bamo balakaana ukusumina ukuti Lesa e ko aba kabili e wabumbile ifintu fyonse. (Rom. 1:20) Bambi nabo nalimo balanda ukuti balisumina ukuti kwaliba icintu cimo nelyo umuntu uwakwata sana amaka. Nomba nga ca kuti ifi e fyo umuntu asuminamo fye, te kutila ninshi alikwata icitetekelo.

Tufwile ukusumina ukuti Yehova e ko aba no kuti “alalambula” bonse ababa ne citetekelo ca cine cine. (Heb. 11:6) Pa kuti tube ne citetekelo ca musango uyu, tufwile ukulomba umupashi wa mushilo. Pa kuti Lesa atupeele umupashi wa mushilo, tufwile ukumulomba. (Luka 11:​9, 10, 13) Cimbi icacindama ico tufwile ukucita pa kuti Lesa atupeele umupashi wa mushilo, kulabelenga Icebo Cakwe. Lyena tufwile ukulatontonkanya pa fyo tulebelenga no kulaesha apapelele amaka yesu ukulacita ifyo tulesambilila. Nga tulecita ifi, tukalenga umupashi wa mushilo uwa kwa Yehova ukaletwafwa pa kuti tukalecita ifilanga ukuti twaliba ne citetekelo icilenga alesekelela.