Mwilashingashinga Ukubatishiwa

1. Mulandu nshi mulingile ukubatishiwilwa?

BUSHE mwalitemwa Yehova Lesa uwamupeela ifya bupe fyonse ifyo mwakwata, kumo no bumi? Bushe mulafwaya ukulanga ukuti na imwe mwalimutemwa? Inshila iyawamisha iyo mwingalangilamo ukuti mwalitemwa Yehova, kuipeela kuli ena no kubatishiwa. Nga mwacita ifi, mukaba mu lupwa lwakwe. Ici cikalenga Shinwe kabili Cibusa wenu akalemutungulula kabili akalemusakamana pantu ninshi muli ba mu lupwa lwakwe. (Amalu. 73:24; Esa. 43:​1, 2) Na kabili nga mwaipeela kuli Yehova no kubatishiwa, mukakwata isubilo lya kwisaikala umuyayaya.—1 Pet. 3:21.

2. Finshi twalasambililapo muli cino cipande?

² Bushe kwaliba icalenga muleshingashinga ukubatishiwa? Te imwe mweka mushingashinga. Kwaliba abantu na bambi abengi abalingile ukwaluka mu fyo balecita na mu fyo baletontonkanya pa kuti bafikepo ukubatishiwa. Pali ino nshita balabombela Yehova ne nsansa kabili baliba abacincila. Finshi mwingasambilila ku bantu bamo ababatishiwe mu nshita ya batumwa? Natulande pa mafya ayo bakwete kabili tumone ne fyo twingasambililako kuli bena.

ABENA SAMARIA BALIBATISHIWE

3. Ni muli finshi abena Samaria balingile ukwaluka pa kuti bengabatishiwa?

³ Abena Samaria abaliko ilyo Yesu ali pano isonde, bali mu kabungwe ka mapepo kabili baleikala mupepi no musumba wa Shekemu no wa Samaria, ku kapinda ka ku kuso aka Yudea. Ilyo abena Samaria bashilabatishiwa, balingile ukwishibilapo na fimbi pa fyaba mu Cebo ca kwa Lesa. Abena Samaria basumine fye mu fyaba mu mabuuku 5 aya kutendekelako aya mu Baibo, e kutila ibuuku lya Ukutendeka ukufika kwi buuku lya Amalango. Nalimo balisumine na mwi buuku lya kwa Yoshua. Lelo kwena bale-enekela ukuti Mesia ali no kwisa pantu e fyo Lesa alaile nga fintu Baibo ilanda pa Amalango 18:​18, 19. (Yohane 4:25) Pa kuti abena Samaria babatishiwe, balingile ukusumina ukuti Yesu, e wali Mesia uo Lesa alaile ukuti ali no kwisa. Baibo itila: “Abengi abena Samaria” balisumine. (Yoh. 4:39) Apo abengi abali Abena Kristu mu nshita ya batumwa bali baYuda, abena Samaria balingile ukuleka ukuba na kapaatulula ku baYuda.—Luka 9:​52-54.

4. Ukulingana na fintu Baibo ilanda pa Imilimo 8:​5, 6, 14, bushe abena Samaria bamo bacitile shani ilyo Filipi abilile imbila nsuma kuli bena?

⁴ Finshi abena Samaria bacitile pa kuti babatishiwe? Ilyo Filipi uwali kabila wa mbila nsuma asambilishe abena Samaria “pali Kristu,” abena Samaria bamo “balitetekele icebo ca kwa Lesa.” (Belengeni Imilimo 8:​5, 6, 14.) Nangu ca kuti Filipi ali muYuda, tabakeene ukukutika kuli ena. Nalimo baleibukisha ifikomo fimo ifya mu mabuuka 5 aya kubalilapo aya mu Baibo ifilanda ukuti Lesa takwata akapaatulula. (Amala. 10:​17-19) Baibo itila ‘balibikileko amano ilyo Filipi alelanda’ pali Kristu kabili balishininkishe ukuti Lesa e walemutungilila. Filipi alicitile ifipesha mano ifingi, pamo nga ukuposha abalwele no kufumya ifibanda.—Imil. 8:7.

5. Finshi mwingasambilila ku bena Samaria?

⁵ Abena Samaria abalafwaya, nga balikeene ukusambilila kuli Filipi pantu ali muYuda. Lelo pa mulandu wa kuti e wali umuku wa kubalilapo ukumfwapo ifyo Filipi alebasambilisha, balisumine. Ilyo abena Samaria bashininkishe ukuti ifyo Filipi abasambilishe cali e cine, tabashingashingile ukubatishiwa. Baibo itila: “Lelo abaume na banakashi nga basumina ifyo Filipi alelanda, uwalebila imbila nsuma pa Bufumu bwa kwa Lesa na pe shina lya kwa Yesu Kristu, balebatishiwa.” (Imil. 8:12) Bushe mwalishininkisha ukuti Icebo ca kwa Lesa e cine, no kuti Inte sha kwa Yehova balesha na maka yabo yonse pa kuti belaba na kapaatulula? Na kabili, bushe mwalishininkisha ukuti Inte sha kwa Yehova balalanga ukutemwa kwa cine uko Yesu alandile ukuti eko abasambi bakwe bafwile ukulalanga? (Yoh. 13:35) Nga mwalishininkisha, ninshi tamulingile ukutiina ukubatishiwa. K abili nga mwabatishiwa, Yehova akalamupaala.

6. Finshi mwingasambilila ku lyashi lya ba Ruben?

⁶ Ba Ruben aba ku Germany bakuliile mu lupwa lwa ba Nte. Lelo ilyo bali abaice, baletwishika nga ca kuti kwaliba Lesa. Bacitile shani pa kuti baleke ukutwishika? Ba Ruben balilwike ukuti tabaishibe ifingi pali ili lyashi. E ico basalilepo ukuti basambililepo na fimbi. Batile: “Ilyo naleisambilisha, nalefwaisha ukwishiba ifishinka. Nalingile ukuisambilisha pa cisambilisho ca kuti ifintu fyonse fyasangwike fye. Nali-isambilishe pali ici cisambilisho pa miku iingi.” Ba Ruben balibelengele icitabo ca mu ciNgeleshi icitila Is There a Creator Who Cares About You? (Bushe Kwaliba Kabumba Uumusakamana?) Ifyaba muli ici citabo, fyalengele ba Ruben bacetekela sana ukuti kwaliba Lesa. Batile, ‘Cine cine, Yehova eko aba!’ Na kabili ilyo ba Ruben batandalile amaofesi yakalamba aya Nte sha kwa Yehova, balitemenweko ifyo fwe bantu ba kwa Yehova mwi sonde lyonse twaba abaikatana. Ilyo babwelele ku Germany, balibatishiwe ninshi bali ne myaka 17. Nga ca kuti mulatwishika ifyo musambilila, mulingile ukufwailapo ifyebo na fimbi mu mpapulo shesu pa kuti mwishibe ifishinka. Kuti mwaleka ukutwishika nga ca kuti ‘mwaishiba bwino bwino’ icine. (Efes. 4:​13, 14) Na kabili nga muleumfwa amalyashi ayalanda pa fyo abantu ba kwa Yehova mu fyalo fimbi batemwana ne fyo baba abaikatana, mukalatemenwako aba bwananyina mwi sonde lyonse.

SAULI UMWINA TARSI ALIBATISHIWE

7. Finshi Sauli aletontonkanya ifyo alingile ukwalukamo?

⁷ Natulande pali Sauli umwina Tarsi. Sauli alishibe sana amafunde ya baYuda kabili alelunduluka sana mu mipepele yabo. (Gal. 1:​13, 14; Fil. 3:5) Pa nshita abaYuda abengi balemona Abena Kristu ukuti bali basangu, Sauli alecusha sana Abena Kristu. Alemona kwati filya alebacusha alecita ifyo Lesa alefwaya. (Imil. 8:3; 9:​1, 2; 26:​9-11) Pa kuti Sauli atetekele Yesu kabili abatishiwe no kubatishiwa, abe no Mwina Kristu, alingile ukuitemenwa ukumucusha.

8. (a) Bushe Sauli acitile shani pa kuti abatishiwe? (b) Nga fintu Imilimo 22:​12-16 ilanda, bushe Anania ayafwile shani Sauli? (Moneni ne cikope.)

⁸ Finshi Sauli acitile pa kuti abatishiwe? Ilyo Shikulu Yesu alandile na Sauli ukufuma ku muulu, Sauli alilekele ukumona. (Imil. 9:​3-9) Pa nshiku shitatu talelya kabili ukwabula no kutwishika, aletontonkanya sana pa fyamucitikile. Cine cine, Sauli alishininkishe ukuti Yesu e wali Mesia no kuti abasambi bakwe e balepepa Lesa ukulingana ne fyo afwaya. Sauli afwile alyumfwile ububi sana pa fyo na o asuminisheko ukuti abantu bepaye Stefani. (Imil. 22:20) Pa numa ya nshiku shitatu, umusambi Anania alile kuli Sauli, amundapa e lyo amukoselesha ukuti abatishiwe. (Belengeni Imilimo 22:​12-16.) Shauli ali-icefeshe, alikutike kuli Anania kabili alibatishiwe.—Imil. 9:​17, 18.

9. Finshi mwingasambilila kuli Sauli?

⁹ Kuli ifyo twingasambilila kuli Sauli. Alafwaya, nga alitwalilile ukuba ne cilumba nelyo ukutiina sana abantu ica kuti afilwa no kubatishiwa. Lelo ali-icefeshe kabili ali-itemenwe ukwaluka pa kuti engaba umusambi wa kwa Kristu. (Imil. 26:​14, 19) Sauli ali-itemenwe ukuba Umwina Kristu nangu ca kuti alishibe ukuti abantu bali no kulamucusha. (Imil. 9:​15, 16; 20:​22, 23) Na pa numa ya kubatishiwa, Sauli alitwalilile ukushintilila pali Yehova uwali no kulamwafwa pa kuti aleshipikisha amafya. (2 Kor. 4:​7-10) Na imwe bene nga mwabatishiwa pa kuti mube Inte ya kwa Yehova, mukalakwata amafya nelyo amesho, lelo Yehova akalamwafwa. Kuti mwacetekela ukuti Lesa na Kristu bakalamwafwa.—Fil. 4:13.

10. Finshi mwingasambilila ku lyashi lya ba Anna?

¹⁰ Ba Anna bakulile mu lupwa lwa bena Kurd, ku Bulaya. Ilyo banyinabo babatishiwe, ba Anna balitendeke ukusambilila Baibo ninshi bali ne myaka 9 kabili bashibo balibasuminishe ukulasambilila. Ifi ba Anna bacitile, fyalengele balupwa lwabo bambi abo baleikala nabo balabacusha. Na kabili balupwa lwabo balemona kwati filya ba Anna bafumine mu mipepele ya fikolwe fyabo, baliseebenye ulupwa lonse. Ilyo ba Anna bali ne myaka 12, balipwishe bashibo nga kuti babasuminisha ukubatishiwa. Bashibo balefwaya ukwishiba nga ca kuti ba Anna abene e basalilepo ukubatishiwa nelyo muntu umbi alebapatikisha ukubatishiwa. E ico ba Anna baebele bashibo abati, “Ico ndefwaila ukubatishiwilwa ni co nalitemwa Yehova.” Lyena balibasuminishe ukubatishiwa. Pa numa ya kubatishiwa, balupwa lwa ba Anna balitwalilile ukubapumya kabili balebacusha. Bashikulwibo babebele abati: “Kuti cawamapo ulecita ubulalelale, ulepeepa na fwaka ukucila ukuba Inte ya kwa Yehova.” Cinshi calengele ukuti ba Anna batwalilile ukushipikisha? Balandile abati: “Yehova alenkosha kabili batata na bamayo nabo, balentungilila sana.” Ba Anna balalemba imiku iyo Yehova abafwapo, kabili mu nshita mu nshita balapituluka muli ifi balemba, pa kuti belalaba ifyo Yehova abafwa. Nga ca kuti mulatiina ukumucusha, muleibukisha ukuti na imwe bene Yehova akalamwafwa.—Heb. 13:6.

KORNELI ALIBATISHIWE

11. Finshi nalimo fyali no kulenga Korneli ashingashingile ukubatishiwa?

¹¹ Kuti twasambililako na ku lyashi lya kwa Korneli. Korneli ali mukalamba wa bashilika, aletungulula ibumba lya bashilika abena Roma 100. (Imil. 10:1 ftn.) Pa mulandu ne ci cifulo icikalamba ico akwete, abantu elyo na bashilika bafwile balimwishibe sana. Korneli “alepeela abapiina ifya bupe ifingi.” (Imil. 10:2) Yehova atumine umutumwa Petro ukuyabila imbila nsuma kuli ena. Bushe Korneli alishingashingile ukubatishiwa pa mulandu ne cifulo akwete?

12. Finshi fyalengele Korneli abatishiwe?

¹² Finshi Korneli acitile pa kuti abatishiwe? Baibo itila: “Ena [Korneli] na ba mu ng’anda yakwe bonse baletiina Lesa.” (Imil. 10:2) Na kabili, Korneli alepaapaata Lesa lyonse. (Imil. 10:2) Ilyo Petro abilile imbila nsuma kuli Korneli no lupwa lwakwe, bonse mu lupwa balitetekele Kristu kabili ilyo line balibatishiwe. (Imil. 10:​47, 48) Ukwabula no kutwishika, Korneli ali-itemenwe ukwaluka mu fyo alingile ukwalukamo pa kuti ena no lupwa lwakwe balepepa Yehova.—Yosh. 24:15; Imil. 10:​24, 33.

13. Finshi mwingasambilila kuli Korneli?

¹³ Nga filya fine Sauli acitile, Korneli na o talekele icifulo ico akwete calenga afilwa ukuba Umwina Kristu. Bushe na imwe mulingile ukwaluka sana pa kuti mubatishiwe? Nga e fyo cili, ninshi Yehova akamwafwa pa kuti mukaaluke. Akalamupaala nga ca kuti mulekonka amashinte ya mafunde ya mu Baibo pa kuti mulemubombela.

14. Finshi mwingasambilila ku lyashi lya ba Tsuyoshi?

¹⁴ Ba Tsuyoshi aba ku Japan balingile ukwalulako fimo pa ncito balebomba pa kuti bengafikapo ukubatishiwa. E bali inkonkani ya bakafundisha mukalamba pe sukulu lya Ikenobo apo basambilisha abantu ifya kutantika bwino amaluba. Ilingi line nga ca kuti bakafundisha mukalamba tabakumanishe ukuyasangwa ku cililo, ba Tsuyoshi e baleya mu kubemininako, kabili balekonka ne ntambi sha baBuddha. Nomba ilyo ba Tsuyoshi baishibe icine pa fyo abafwa baba, balilwike ukuti ifi balecita fyali no kulenga befikapo ukubatishiwa. E ico balilekele ukulakonka intambi sha baBuddha. (2 Kor. 6:​15, 16) Ba Tsuyoshi balilanshepo na bakafundisha mukalamba pali ili lyashi. Ilyo balanshenye, tababatamfishe incito nangu ca kuti balilekele ukulakonka intambi sha baBuddha isha pa cililo. Lyena balibatishiwe pa numa ya mwaka umo ukutula apo batampiile ukusambilila Baibo.a Nga ca kuti naimwe mulingile ukwalulako fimo pa ncito mubomba pa kuti mwingalasekesha Lesa, cetekeleni ukuti akalamupeela pamo no lupwa lwenu ifyo mukalakabila.—Amalu. 127:2; Mat. 6:33.

ABENA KORINTI BALIBATISHIWE

15. Finshi fyali no kulenga cikosele abena Korinti ukubatishiwa?

¹⁵ Abantu abaleikala mu musumba wa Korinti balitemenwe sana icuma kabili balikwete imibele iyabipa. Abengi abaleikala muli ulya musumba balecita ifintu ifyo Lesa ashifwaya. Kanshi cifwile calekosela sana abantu abaleikala muli ulya musumba ukutendeka ukubombela Yehova. Nomba ilyo umutumwa Paulo aile muli ulya musumba, abila ne mbila nsuma pali Kristu, “abena Korinti abengi abaumfwile balitetekele no kubatishiwa.” (Imil. 18:​7-11) Lyena Shikulu Yesu Kristu aebele Paulo mu cimonwa ati: “Muli uno musumba mwaliba abantu bandi abengi.” E ico Paulo alitwalilile ukubila imbila nsuma muli ulya musumba pa mwaka umo ne myeshi 6.

16. Finshi fyalengele abena Korinti babatishiwe? (2 Abena Korinti 10:​4, 5)

¹⁶ Finshi fyalengele abena Korinti babatishiwe? (Belengeni 2 Abena Korinti 10:​4, 5.) Icebo ca kwa Lesa no mupashi wakwe uwa mushilo uwa maka, e fyabafwile pa kuti baaluke sana. (Heb. 4:12) Abaleikala mu Korinti abatetekele imbila nsuma pali Kristu balilekele ukuba ne misango yabipa, pamo nga ukukolwa, ukwiba ne cimusango ca baume ukulaalala na baume banabo, e lyo na banakashi ukulaalala na banakashi banabo.—1 Kor. 6:​9-11.b

17. Finshi mwingasambilila ku bena Korinti?

¹⁷ Nangu ca kuti abena Korinti bamo balikwete imibele iyabipa iyakosa ukuleka, tabaletontonkanya ukuti cali no kubakosela sana ukuleka ukuba na iyi mibele pa kuti bengaba Abena Kristu. Bali-ibikilisheko pa kuti bengatendeka ukwenda mu musebo uwacepa uutwala ku mweo wa muyayaya. (Mat. 7:​13, 14) Bushe calimukosela ukuleka imibele imo iyabipa, nelyo ukuleka ukucita fimo ifyabipa pa kuti mwingafikapo ukubatishiwa? Tamufwile ukunenuka! Mulepaapaata Yehova ukuti alemupeela umupashi wakwe uwa mushilo, uukalamwafwa pa kuti mulelwisha amatunko ya kucita ifyabipa.

18. Finshi mwingasambilila ku lyashi lya ba Monika?

¹⁸ Ba Monika aba ku calo ca Georgia bali-ibikilisheko pa kuti baleke ukuba ne milandile yabipa, baleke no kulalesesha icitendwe mu fintu ifyabipa, pa kuti bengafikapo ukubatishiwa. Batile: “Ilyo nshilabatishiwa, icalengele ukuti njaluke ni co nalepepa sana kuli Yehova. Yehova alishibe ukuti nalefwaya ukulacita ifisuma. E ico lyonse alengafwa kabili alentungulula.” Ba Monika babatishiwe ninshi bali ne myaka 16. Bushe kwaliba ifyabipa fimo ifyo mucita, ifyo mulingile ukuleka pa kuti mulebombela Yehova ukulingana ne fyo afwaya? Twalilileni ukumulomba ukuti alemwafwa pa kuti mutwalilile ukwaluka. Yehova akalaitemenwa ukumupeela umupashi wakwe uwa mushilo pa kuti ulemwafwa.—Yoh. 3:34.

ICITETEKELO CENU KUTI CALENGA IMPILI SHASELA

19. Mibele nshi mulingile ukukwata pa kuti mupwishe amafya ayakalamba? (Moneni ne cikope.)

¹⁹ Mulecetekela ukuti Yehova alimutemwa kabili afwaya mwaba mu lupwa lwakwe, nangu mwingakwata amafya ya musango shani ayengalenga camukosela ukubatishiwa. Yesu aebele abasambi bakwe ati: “Nga mwakwata icitetekelo icilingene na akaluseke akanono sana, kuti mwaeba ulu lupili amuti, ‘Fuma pano uye kulya,’ nalo kuti lwafumapo, kabili takuli ico mwingafilwa ukucita.” (Mat. 17:20) Ilyo abebele aya amashiwi ninshi tapalakokola ukutula apo babelele abasambi bakwe. E ico pali iyi nshita icitetekelo cabo ninshi cicili cilekula. Lelo Yesu abebele ukuti nga bakwata icitetekelo icakosa, Yehova ali no kubafwa pa kuti bapwishe amafya ayali nga ulupili. Na imwe bene Yehova akamwafwa!

20. Bushe ifyo mwasambilila ku Bena Kristu ba mu nshita ya batumwa na ba muno nshiku, fyalenga mwalafwaya ukucita cinshi?

²⁰ Nga ca kuti namukwata amafya ayalelenga muleshingashinga ukubatishiwa, mufwile ukwangufyanya ukucitapo cimo pa kuti muyapwishe. Kuti mwasambililako ku Bena Kristu ba mu nshiku sha batumwa, na ba muno nshiku. Ifyo mukasambililako, fikalenga mukaipeele kuli Yehova kabili mukabatishiwe. Ala nga mwacita ifi, ninshi mwasalapo ukucita icintu icawamisha pa fintu fyonse!