Mule-endela mu Kutetekela

1. Cinshi calengele umutumwa Paulo abe ne nsansa pa fyo alebombela Yehova?

INSHITA imo umutumwa Paulo alishibe ukuti bali mu kumwipaya. Lelo ilyo atontonkanye pa fyo abombeele Yehova, ali ne nsansa. Pa mulandu wa kuti alisalilepo ukubombela Yehova atile: “Nimbutuka ulubilo ukufika na ku mpela, nintwalilila ukuba uwakosa mu citetekelo.” (2 Tim. 4:​6-8) Paulo alicitile bwino filya asalilepo ukulabombela Yehova, kabili alishininkishe ukuti Yehova alesekelela pali filya asalilepo. Na ifwe bene tulingile ukusalapo ukucita ifingalenga Yehova atutemwa. Kuti twacita shani ifyo?

2. Bushe calola mwi ukwendela mu kutetekela?

² Paulo alilandile ifyo ena na Abena Kristu banankwe aba cishinka bali. Atile: “Twendela mu kutetekela, te mu kumona.” (2 Kor. 5:7) Bushe Paulo aloseshe mwi? Mu Baibo ishiwi lya kuti “ukwenda” inshita shimo lipilibula ifyo umuntu asalapo ukucita. Umuntu nga ale-endela mu kumona, ifyo asalapo filingana fye ne fyo alemona, ifyo aleumfwa ne fyo aleumfwa pa fintu. Lelo umuntu nga ale-endela mu citetekelo ifyo asalapo ukucita filalanga ukuti alicetekela Yehova Lesa. Ifyo acita filangilila ukuti alishininkisha ukutila Lesa akamulambula no kuti akanonkelamo nga ca kuti alekonka ifyo Yehova amupanda amano ukupitila mu Cebo cakwe.—Amalu. 119:66; Heb. 11:6.

3. Bushe ifintu fituwamina shani nga ca kuti tule-endela mu kutetekela? (2 Abena Korinti 4:18)

³ Kwena inshita shimo bonse tulasalapo ukucita ifintu ukulingana ne fyo tulemona ne fyo tuleumfwa. Nomba kuti twakwata amafya, nga ca kuti tuleshintilila fye pa fyo tulemona nelyo ifyo tuleumfwa ilyo tulesalapo ukucita ifintu ifyacindama. Cinshi twalandila ifi? Ni co ifyo tumona ne fyo tumfwa limo kuti fyatulufya. Nga ca kuti tulesalapo ukucita ifintu pa mulandu fye ne fyo tulemona ne fyo tuleumfwa, ifyo twingasalapo nalimo kuti fyalenga Yehova akalipa. (Luk. Mil. 11:9; Mat. 24:​37-39) Nomba nga tule-endela mu kutetekela, ifyo tukalasalapo ukucita, ‘fikalasekesha Shikulu.’ (Efes. 5:10) Nga tulekonka ifyo Icebo ca kwa Lesa cilanda, tukalaba no mutende ne nsansa sha cine cine. (Amalu. 16:​8, 9; Esa. 48:​17, 18) Na kabili nga twatwalilila ukulaendela mu kutetekela, tukatwata umweo wa muyayaya.—Belengeni 2 Abena Korinti 4:18.

4. Bushe umuntu kuti aishiba shani nga ca kuti ale-endela mu kutetekela nelyo ale-endela mu kumona?

⁴ Kuti twaishiba shani nga ca kuti twendela mu kutetekela nelyo twendela mu kumona? Bonse tulingile ukuyipusha atuti: ‘Finshi filenga ndesalapo ukucita ifintu fimo? Bushe nshitilila fye pa fintu ifyo mona? Nelyo nshitilila pa fyaba mu Cebo ca kwa Yehova? Natulande pa fyo twingatwalilila ukwendela mu kutetekela mu fintu fitatu ifyacindama: ilyo tulesala incito ya kwingila, ilyo tulesala uwa kuupana nankwe e lyo ne fyo tucita nga ca kuti icilonganino ca kwa Yehova catweba ifya kucita. Pa kulanda pali cimo na cimo, twalalanda pa fyo tufwile ukubikako amano lintu tulesalapo ifya kucita pali ifi fintu fitatu.

ILYO TULESALA INCITO YA KWINGILA

5. Finshi tufwile ukutontonkanyapo pa kwingila incito?

⁵ Bonse fye tulafwaya ukulaisakamana no kulasakamana ulupwa lwesu mu fyo lukabila. (Luk. Mil. 7:12; 1 Tim. 5:8) Ababomba incito shimo balafola indalama shingi. Indalama bafola kuti bashibomfya mu kusakamana ulupwa lwabo mu fyo lukabila cila bushiku, kabili kuti basungako na shimo isha kubomfya ku ntanshi. Lelo ababomba incito shimbi bafola fye indalama ishalinga isha kushitamo ifyo ulupwa lwabo lukabila, pamo nga ifya kulya, umwakwikala ne fya kufwala. Ilyo tulesalapo incito ya kwingila, caliba fye bwino ukutontonkanya pa ndalama tukalafola. Lelo nga twabika fye amano ku ndalama isho tukalafola ninshi tatule-endela mu kutetekela.

6. Kuti twaendela shani mu kutetekela ilyo tulesala incito ya kwingila? (AbaHebere 13:5)

⁶ Nga tule-endela mu kutetekela, tukatontonkanya na pa fyo incito iyo tulefwaya ukwingila ikakuma bucibusa bwesu na Yehova. Kuti twayipusha atuti: ‘Bushe incito ndefwaya ukwingila ikalalenga ndecita ifyo Yehova ashifwaya?’ (Amapi. 6:​16-19) ‘Bushe ikalalenga nilapepa bwino Yehova, kabili ikalalenga nilaba no lupwa lwandi pa nshita iitali?’ (Fil. 1:10) Nga ca kuti ifi e fyo incito mulefwaya ukwingila ikalenga ifintu fikebe, ninshi kuti cawama tamwingile iyo ncito nangu ca kuti calikosa ukusanga incito. Pa mulandu wa kuti twendela mu kutetekela, ifyo tusalapo ukucita filingile ukulanga ukuti twalishininkisha ukuti Yehova akalatusakamana mu fyo tukabila.—Mat. 6:33; belengeni AbaHebere 13:5.

7-8. Bushe munyinefwe umo uwa ku South America aendele shani mu kucetekela? (Moneni ne cikope.)

⁷ Natumone ifyo munyinefwe Javiera uwa ku South America amwene ico ukwendela mu kutetekela kwacindamina. Atile: “Nalilembele kalata ya kwipushishapo incito iyali no kulenga ndefola indalama ishingi sana ukucila pa sho nalefola, kabili nali no kutemwa sana iyo ncito.” Lelo ba Javier balefwaisha ukutendeka bupainiya. Balandile no kuti: “Balintantike ukuti nkayelanshanya no mukalamba wa kampani uwa mu calo cesu. Ilyo tushilatampa ukulanshanya, nalipepele kuli Yehova pantu nalishininkisha ukuti Yehova alishibe ifyali no kungwamina. Nalefwaya icifulo ca pa muulu, ukulafola indalama ishingi ukucila pa sho nalefola, lelo nshali no kusumina ici icifulo nga ca kuti cali no kulenga nafilwa ukulabombela sana Yehova.”

⁸ Ilyo twalelanshanya no mukalamba wa ncito, anjebele ukuti nali no kulabomba na pa numa ya kwinuka. Nalimwebele mucinshi mucinshi nati te kuti ndebomba na pa numa ya kwinuka pa mulandu wa kupepa Yehova.” E ico ba Javier balikeene ukubomba iyi ncito. Pa numa ya milungu ibili ba Javier balitampile bupainiya. Mu kupita kwa nshita muli ulya wine mwaka, ba Javier balingile incito iishali ya kubomba ama-awala ayengi. Ba Javier batile: “Yehova alyumfwile ipepo lyandi, kabili alilengele nasanga incito iyali no kulenga ndebomba bupainiya. Ala nalitemwa sana ifi nakwata incito iilenga ndekwata inshita iikalamba iya kubombela Yehova na ba bwananyina.”

9. Finshi mwasambilila ku lyashi lyaba Trésor?

⁹ Finshi tufwile ukucita nga twaishiba ukuti incito tubomba tailenga tule-endela mu kutetekela? Natulandeko pa lyashi lya kwa munyinefwe Trésor uwa ku Congo. Atile: “Incito natendeke ukubomba, e ncito nalefwaisha ukulabomba. Natendeke ukufola indalama ishingi sana ukucila isho nalefola pa ncito nalebomba kale kabili abantu balicindike sana. Nomba pa mulandu ne iyi ncito ba Trésor batendeke ukulabomba, tabaleya lyonse mu kulongana pantu balebomba na pa numa ya kwinuka. Na kabili abo balebomba nabo balebapatikisha ukulabepa pa kuti abantu belaishiba ifyo kampani yabo yalelufyanya. Ba Trésor balefwaya ukuleka incito, lelo balesakamana nga ca kuti bali no kusanga incito imbi. Cinshi calengele ukuti baleke ukusakamana? Batile: “Amashiwi ayaba pali Habakuki 3:​17-19 yalengele naishiba ukuti nangu naleka incito, Yehova ali no kulansakamana. E ico nalilekele incito.” Ba Trésor balandile no kuti: “Abengi abengisha incito batontonkanya ukuti umuntu nga alefola indalama ishingi kuti asuulilapo ulupwa, kuti asuulilapo no kupepa Lesa. Naliba ne nsansa sana pantu nalicingilila bucibusa bwandi na Yehova no lupwa lwandi. Ilyo papitile umwaka umo, Yehova alingafwile ica kuti nalisangile incito iilenga ndekwata indalama ishalinga isha kusakamaninamo ulupwa, kabili ndekwata inshita iikalamba iya kubombela Yehova. Nga twabika Yehova pa ntanshi, nalimo kuti twakwata indalama ishinono, lelo Yehova akulatusakamana.” Cine cine, nga tulekonka ifyo Yehova atufunda, twacetekela ne fyo atulaya, tukalaendela mu kutetekela kabili Yehova akulatupaala.

ILYO TULESALA UWA KUUPANA NANKWE

10. Finshi fingalenga twalaendela mu kumona ilyo tulesala uwa kuupana nankwe?

¹⁰ Icupo bupe ubo Yehova atupeela kabili caliba fye bwino ukufwaya ukuupa no kuupwa. Nga ca kuti nkashi alefwaya ukuupwa kuli munyinefwe umo, nalimo kuti alatontonkanya fye pa fyo uyo munyinefwe amoneka, ifyo acita, ifyo abantu bambi bamumona, ifyo abomfya indalama, nelyo nga afwile ukusunga ulupwa elyo ne fyo uyu munyinefwe alenga uyu nkashi alaumfwa.b Kwena caliba fye bwino ukutontonkanya pali ifi. Nomba nga ca kuti ifi fine e fyo abikako fye amano, ninshi ale-endela mu kumona.

11. Kuti twaendela shani mu kutetekela ilyo tulesala uwa kuupana nankwe? (1 Abena Korinti 7:39)

¹¹ Yehova alatemwa sana nga ca kuti bamunyinefwe na bankashi balekonka ifyo atufunda ilyo balesala uwa kuupana nankwe! Ku ca kumwenako, balakonka sana ifyo atufunda ukuti ilyo bashilatendeka ukwishishanya balingile ‘bacila pa mushinku wa bwaice.’ (1 Kor. 7:36) Ico babikako sana amano nga balefwaya uwa kuupana nankwe, kufwaya umuntu uwakwata imibele iyo Yehova alanda ukuti e yo umulume umusuma nelyo umukashi umusuma afwile ukukwata. (Amapi. 31:​10-13, 26-28; Efes. 5:33; 1 Tim. 5:8) Nga ca kuti uushili Nte afwaya ukuti bopane nankwe, balakonka ifyo Baibo itufunda pali 1 Abena Korinti 7:39 (belengeni.) ukuti, ‘tufwile ukuupilwa fye muli Shikulu.’ Ababwananyina balatwalilila ukwendela mu kutetekela pantu balishininkisha ukuti Yehova e wingabafwa sana ukucila ifyo umuntu engabafwa.—Amalu. 55:22.

12. Finshi mwasambilila ku lyashi lya ba Rosa?

¹² Natulande pa lyashi lya ba Rosa bapainiya ba ku Colombia. Umwaume uo balebomba nankwe incito uushali Nte atendeke ukubalanga ukuti alibatemenwe. Ba Rosa nabo balimutemenwe. Batile: “Alemoneka ukuti ali muntu umusuma. Aleafwa abantu uko aleikalila, kabili alemoneka kwati alikwete imibele iisuma. Nalitemenwe ifyo aleba ne cikuuku kuli ine. Alikwete imibele iisuma iyo nalefwaya ukuti umwina mwandi engakwata. Icabipileko fye ca kuti tali ni Nte.” Ba Rosa balandile no kuti: “Calinkosele ukumukaana pantu nalefwaya uwa kwishishanya nankwe. Pali ilya nshita naletalalilwa kabili nalefwaya uwa kuupana nankwe, lelo nshasangile uwa bwananyina uwa kuti ningopana nankwe.” Nomba ba Rosa tababikile fye amano ku fyo balemona, lelo batontonkenye na pa fyo bucibusa bwabo na Yehova bwali no kuba nga ca kuti batendeka ukwishishanya na ulya mwaume. E ico balilekele ukulanshanya nankwe, kabili babikile sana amano ku kubombela Yehova. Tapakokwele ba Rosa balibetile kwi Isukulu lya Bakabila ba Bufumu kabili pali ino nshita ni bapainiya baibela. Batile: “Yehova alilenga naba ne nsansa sana.” Nangu ca kuti cilakosa ukulaendela mu kutetekela maka maka mu fintu ifyo twatemwa sana, nga twakonka ifyo Yehova atufunda, ifintu filatuwamina.

NGA CA KUTI ICILONGANINO CA KWA YEHOVA CATWEBA IFYA KUKONKA

13. Finshi fingalenga twalaendela mu kumona nga ca kuti icilonganino ca kwa Yehova catweba ifya kukonka?

¹³ Ilingi line baeluda, bakangalila wa muputule, aba ku musambo, aba mwi Bumba Litungulula balatweba ifya kukonka pa kuti tulebombela Yehova. Nomba inshita shimo tatwishiba ifilenga aba bwananyina baletweba ifya kukonka? Nalimo kuti twalatwishika nga ca kuti ifyo batweba fili fye bwino. Kuti twalabika na mano ku fyo aba bwananyina abaletweba ifya kukonka balufyanya.

14. Finshi tufwile ukucita pa kuti tule-endela mu kutetekela nga ca kuti icilonganino ca kwa Yehova catweba ifya kucita? (AbaHebere 13:17)

¹⁴ Nga tule-endela mu kutetekela kuti twacetekela ukuti Yehova e uletungulula icilonganino cakwe no kuti alishiba ifingatuwamina. Ne ci cilenga tuleangufyanya ukukonka ifyo batweba ukwabula ukuilishanya. (Belengeni AbaHebere 13:17.) Tuleshiba ukuti nga tulekonka ifyo icilonganino ca kwa Yehova ciletweba, tulatwalilila ukuba abaikatana. (Abena Efese 4:​2, 3) Twalishiba ukutila nangu ca kuti aba bwananyina abatutungulula tabapwililika, nga tulebomfwila Yehova akalatupaala. (1 Sam. 15:22) Twalicetekela no kuti nga ca kuti Yehova amona ukuti fimo fifwile ukwaluka mu cilonganino, akalenga fikaluke.—Mika 7:7.

15-16. Cinshi calengele munyinefwe umo ale-endela mu kutetekela nangu ca kuti pa kubala aletwishika ifyo icilonganino ca kwa Yehova cabebele ukucita? (Moneni ne cikope.)

¹⁵ Natulande pa ca kumwenako cimo icilanga ubusuma bwaba mu kukonka ifyo icilonganino ca kwa Yehova citweba. Mu calo ca Peru, nangu ca kuti abantu abengi balanda iciSpanish, abantu abengi pa mayanda balanda indimi shabo. Lumo pali ishi ndimi, lulimi lwa ciQuechua. Pa myaka iingi bamunyinefwe na bankashi abalanda iciQuechua nga balebila imbila nsuma, balefwaya fye abantu abalanda iciQuechua mu ncende iyo balebilamo. Pa kuti bakonke amafunde ya buteko, icilonganino ca kwa Yehova calyalwileko inshila ya kubililamo imbila nsuma. (Rom. 13:1) E ico aba bwananyina bamo baletwishika nga ca kuti iyo nshila yali no kubomba mu cifulo ico balebilamo imbila nsuma. Apo aba bwananyina balikonkele ifyo icilonganino ca kwa Yehova cabebele, basangile ukuti batendeke ukubila imbila nsuma ku bantu abengi abalanda iciQuechua.

¹⁶ Ba Kevin baeluda abali mu cilonganino ca Quechua, bali pa ba bwananyina abasakamene. Balondolwele abati: “Naletontonkanya nati, ‘nomba tukalasanga shani abantu abalanda iciQuechua?’” Finshi ba Kevin bacitile? Batile: “Naibukishe amashiwi ayaba pa Amapinda 3:5. Natontonkenye na pali Mose. Yehova amwebele ukucita ifintu ifyalemoneka ukuti te kuti fibombe. Amwebele ukuya mu kufumya Abena Israele mu calo ca Egupti, no kubatungulula kuli Bemba Wakashika uko cali no kubakosela ukupusuka ku bena Egupti. Lelo Mose alyumfwilile Yehova, kabili Yehova alimupaalile pantu alipuswishe abena Israele mu cipesha mano.” (Ukufuma 14:​1, 2, 9-11, 21, 22) Ba Kevin balikonkele inshila ya kubililamo imbila nsuma iyo icilonganino cabebele. Finshi fyafuminemo? Batile: “Nalipapile pa fyo Yehova atupaalile. Kale twale-enda sana pa kubila imbila nsuma kabili inshita shimo twalesanga fye umuntu umo nelyo babili abalanda iciQuechua. Nomba pali ino nshita tuya mu kubila imbila nsuma ku ncende ukwaba abantu abengi abalanda iciQuechua. Ne ci calenga tulesanga abantu abengi abakubilako imbila nsuma, tulebwelela ku bantu abengi abo twabilileko imbila nsuma, kabili tulesambilisha abantu abengi Baibo. Na kabili abantu abesa mu kulongana balifulilako.” Cine cine, nga tule-endela mu kutetekela, Yehova alatupaala.

17. Finshi mwasambilila muli cino cipande?

¹⁷ Twalanda pa fintu fitatu ifyacindama umo tufwile ukulakonka ifyo Yehova atweba ilyo tulesalapo ifya kucita. Lelo tufwile ukutwalilila ukulaendela mu kutetekela na mu fintu fimbi pamo nga, ifyo tuleseshamo icitendwe, amasambililo tufwile ukukwata e lyo ne fya kukusha abana. Muli fyonse ifyo tusalapo ukucita tatulingile ukulakonka fye ifyo tulemona. Lelo tulingile ukulabika amano kuli bucibusa bwesu na Yehova, ifyo atweba ukucita, na ku fyo atulaya ukuti akalatusakamana. Nga tulecita ifi “twakulaendela mwi shina lya kwa Yehova Lesa wesu umuyayaya umuyayaya.”—Mika 4:5.