“Salenipo Mwe Bene . . . Uo Mwakulabombela”

1. Pa kuti tuleba ne nsansa sha cine cine, cinshi tufwile ukulacita, kabili mulandu nshi? (Esaya 48:​17, 18)

SHIFWE wa ku muulu alitutemwa nga nshi. Afwaya tuleikala bwino pali ino nshita kabili tukaleikala bwino na ku ntanshi. (Luk. Mil. 3:​12, 13) Atubumbile na maka ya kucita ifintu ifya kupapusha, lelo tatupeele amaka ya kulaitungulula nelyo aya kulaisalila icisuma ne cibi. (Luk. Mil. 8:9; Yer. 10:23) Alishiba ukuti pa kuti tuleba ne nsansa sha cine cine, tufwile ukulamubombela no kulakonka amafunde yakwe.—Belengeni Esaya 48:​17, 18.

2. Finshi Satana afwaya twasumina, kabili finshi Yehova acitapo pali ifi Satana afwaya?

² Satana afwaya twasumina ukutila, kuti twalaba ne nsansa nga ca kuti Yehova taletutungulula no kuti fwe bantunse kuti twaiteka fye bwino fwe bene. (Ukute. 3:​4, 5) Pa kuti Yehova ashinine Satana ukuti wa bufi, alisuminisha abantunse ukulaiteka. Cali-ilanga fye apabuuta tuutu ukuti abantu balifilwa ukuiteka. Lelo Baibo yalilanda pa baume na banakashi abengi abali ne nsansa pa mulandu wa kuti balebombela Yehova. Yesu Kristu e wali ne nsansa sana ukucila bonse aba. Twalabalilapo ukusambilila pa calengele Yesu asalepo ukulabombela Yehova. Lyena, twalasambilila pa mulandu tulingile ukulapepela Shifwe Yehova. Na mu kulekelesha, twalasambilila pa fyalenga tusalepo ukulabombela Yehova.

ICALENGELE UKUTI YESU ASALEPO UKULABOMBELA YEHOVA

3. Cinshi Satana aebele Yesu ukuti acite, kabili cinshi Yesu acitile?

³ Ilyo Yesu ali pano isonde alingile ukusalapo uo alingile ukulabombela. Tapakokwele ukutula apo Yesu abatishiwilwe, Satana amwebele ukuti ali no kumupeela amabufumu ya mwi sonde lyonse nga ca kuti amupepako fye umuku umo. Yesu amwebele ati: “Fuma apa, we Satana! Pantu calilembwa ukuti: ‘Yehova Lesa obe e o ulepepa, kabili eka fye e o ulebombela.’” (Mat. 4:​8-10) Cinshi calengele Yesu ebe Satana ifi? Natulande pali fimo ifyalengele.

4-5. Finshi fyalengele Yesu asalepo ukulabombela Yehova?

⁴ Icikalamba icalengele ukuti Yesu asalepo ukulabombela Yehova ni co alimutemwa sana. (Yoh. 14:31) Na kabili Yesu alabombela Yehova pa mulandu wa kuti ukumubombela, e cintu icisuma ico afwile ukucita. (Yoh. 8:​28, 29; Ukuso. 4:11) Alishiba ukuti Yehova e ntulo ya bumi, kuti twamucetekela kabili ni kapekape. (Amalu. 33:4; 36:9; Yako. 1:17) Lyonse Yehova ale-eba Yesu icishinka kabili e wamupeele fyonse ifyo akwete. (Yoh. 1:14) Nomba Satana alipusana sana na Yehova, pantu ena alilenga abantu balabembuka kabili balafwa. Satana wa bufi, mufunushi kabili ali-itemwa. (Yoh. 8:44) Yesu alishibe bwino sana Yehova, kabili alishibe bwino sana Satana. E ico talefwaya ukupashanya Satana nangu panono.—Fil. 2:​5-8.

⁵ Na cimbi icalengele ukuti Yesu asalepo ukulabombela Yehova, ni co aletontonkanya pa fisuma ifyali no kufumamo nga atwalilila ukumubombela. (Heb. 12:2) Alishibe ukuti nga atwalilila ukuba uwa cishinka, ali no kulenga ishina lya kwa Wishi lyaba ilya mushilo, kabili ali no kulenga amafya yonse ayo Satana aleta yakapwe.

UMULANDU TULINGILE UKULAPEPELA YEHOVA

6-7. Cinshi calenga abantu abengi belabombela Yehova, lelo mulandu nshi tulingile ukulamubombela?

⁶ Icalenga abantu abengi muno nshiku belabombela Yehova, ni co tabaishiba imibele yakwe iisuma kabili tabaishiba fyonse ifisuma ifyo abacitila. Baba kwati bantu abo Paulo abilileko imbila nsuma mu Atena. Tabaishibe Lesa.—Imil. 17:​19, 20, 30, 34.

⁷ Paulo abalondolwelele ukuti Lesa wa cine “e upeela abantu bonse umweo, e ulenga baba no bumi kabili e ubapeela ifintu fyonse.” Alandile no kuti: “E walenga ukuti tube abomi, ukuti tule-enda kabili tubeko.” Lesa ni Kabumba, kabili “mu muntu umo e mo alengele inko shonse isha bantunse.”—Imil. 17:​25, 26, 28.

8. Cinshi Yehova ashicita? Londololeni.

⁸ Apo Yehova ni Kabumba kabili e walinga Ukuteka mu muulu na pano isonde, nga alefwaya kuti apatikisha abantu ukuti balemubombela. Nomba Yehova tapatikisha abantu ukulamubombela. Lelo alitupeela ifintu ifingi ifilanga ukuti e ko aba kabili alitemwa umuntu umo umo. Afwaya abantu abengi baba ifibusa fyakwe umuyayaya. (1 Tim. 2:​3, 4) E mulandu wine Yehova atusambilishisha ifya kusambilisha abantu pa fisuma ifyo afwaya ukucitila abantu bonse. Tulabasambilisha na pa fyo akacita pa kufikilisha ifi afwaya. (Mat. 10:​11-13; 28:​19, 20) Alitubika mu cilonganino umo tumupepela, umwaba baeluda abatutemwa kabili abatwafwa.—Imil. 20:28.

9. Bushe Yehova alanga shani ukuti alitemwa abantu bonse?

⁹ Yehova alalanga ifyo atemwa abantunse mu fintu ifisuma ifyo acitila abantu abashifwaya ukusumina ukuti e ko aba. Tontonkanyeni pali ici: Pa myaka iingi abantu abengi balaisalilapo ukucita ifyo balemona ukuti e fisuma ukucila ukulaumfwila Yehova. Nangu caba ifyo, Yehova alileka batwalilila ukuba abomi, batwalilila no kulaikala bwino. (Mat. 5:​44, 45; Imil. 14:​16, 17) Na kabili alilenga bakwata ifibusa na balupwa ababatemwa, balakwata abana, balabomba kabili balaipakisha ubumi. (Amalu. 127:3; Luk. Mil. 2:24) Ifi Shifwe wa ku muulu aba, filangilila fye bwino bwino ukuti alitemwa abantu bonse. (Ukufu. 34:6) Nomba natulandeko pali fimo ifyalenga tusalepo ukulabombela Yehova na pa fyo atupaala pa mulandu wa kuti twalisalapo ukulamubombela.

ICALENGA TUSALEPO UKULABOMBELA YEHOVA

10. (a) Bushe icikalamba icalenga tulebombela Yehova cinshi? (Mateo 22:37) (b) Bushe mwanonkelamo shani mu fyo Yehova amubelela uluse? (Amalumbo 103:​13, 14)

¹⁰ Nga filya fine cali kuli Yesu, na ifwe bene icikalamba icalenga ukuti tulebombela Yehova ni co twalimutemwa sana. (Belengeni Mateo 22:37.) Nga twaishiba imibele ya kwa Yehova tulaba ifibusa fyakwe. Ku ca kumwenako, tontonkanyeni pa fyo Yehova atubelela uluse. Ilyo abena Israele bamupondokele, abapaapeete ati: “Lekeni ukucita ifyabipa.” (Yer. 18:11) Yehova alebukisha ukuti tatwapwililika, tuli lukungu. (Belengeni Amalumbo 103:​13, 14.) Nga mwatontonkanya pa fyo Yehova amubelela uluse, bushe tamufwaya ukuba cibusa wakwe umuyayaya?

11. Finshi fimbi fyalenga tusalepo ukulabombela Shifwe wa ku muulu?

¹¹ Na cimbi icalenga tulebombela Yehova ni co, ukumubombela e cintu icawama ico tufwile ukucita. (Mat. 4:10) Na kabili twalishiba ukuti nga twatwalilila ukuba aba cishinka kuli Yehova, mukafuma ifintu ifisuma. Nga twatwalilila ukubombela Yehova ne cishinka, tulalenga ishina lyakwe lyaba ilya mushilo, tulalenga caishibikwa ukuti Satana wa bufi, kabili tulalenga Shifwe wa ku muulu alasekelela. Kabili nga twasalapo ukulabombela Yehova muno nshiku, tukakwata isubilo lya kumubombela umuyayaya!—Yoh. 17:3.

12-13. Cinshi tulesambilila ku lyashi lya ba Jane na ba Pam?

¹² Kuti twatemwa sana Yehova na lintu tucili fye abaice. Nga twacita ifi, tukatwalilila fye ukumutemwa na lintu tukakula. Ifi fine e fyo cali ku banankashi babili, ba Jane na ba Pam.a Ba Jane bali ne myaka 11 e lyo ba Pam bali ne myaka 10 ilyo batampile ukusambilila Baibo. Nangu ca kuti abafyashi babo tabalefwaya ukusambilila Baibo, balibasuminishe ukusambilila Baibo ne Nte sha kwa Yehova, kulila fye batwalilila ukulaya ku ceici no lupwa pa mpela ya cila mulungu. Ba Jane batile, “Ifyo ba Nte balensambilisha mu Baibo fyalelenga nilabomfya imiti bubi bubi kabili nilacita ubulalelale nga fintu abana be sukulu banandi abengi balecita.”

¹³ Ilyo papitile imyaka iinono, ba Jane na ba Pam baishileba bakasabankanya. Pa numa, baishiletendeka bupainiya bwa nshita yonse uku ninshi balesakamana abafyashi babo abali abakalamba. Ba Jane balilandile ifyo bomfwa pali fyonse ifyo Yehova abacitila. Batile: “Nalisambilile ukuti Yehova alasakamana ifibusa fyakwe, nga filya fine Baibo ilanda pali 2 Timote 2:19. Itila, ‘Yehova alishiba abantu bakwe.’” Cailanga fye apabuuta tuutu ukuti lyonse Yehova alasakamana abamutemwa kabili abasalapo ukumubombela!

14. Bushe kuti twapokololako shani Yehova mu fyo tulanda na mu fyo tucita? (Moneni ne fikope.)

¹⁴ Tufwaya abantu baishiba icishinka pali Yehova. Tontonkanyeni pali ci: Tutile mwalikwata umunenu uwaba ne cikuuku, kapekape kabili uwelela. Nomba bushiku bumo mwaumfwa umuntu alelanda pali uyu cibusa wenu ukuti munkalwe kabili taba ne cishinka. Bushe kuti mwacita shani? Kuti mwapokololako cibusa wenu. Ifi fine e fyo caba na kuli ifwe. Nga twaumfwa abantu balelanda ifya bufi pali Yehova, tulalanda icishinka pali ena pa kuti tumupokololeko. (Amalu. 34:1; Esa. 43:10) Tulanga ukuti twalitemwa Yehova kabili tulafwaya ukulamubombela mu fyo tulanda na mu fyo tucita.

15. Fisuma nshi fyafuminemo muli filya Paulo ayalwileko fimo pa kuti alebombela Yehova? (Abena Filipi 3:​7, 8)

¹⁵ Tulaitemenwa ukwalulako ifintu fimo pa kuti tulesekesha Yehova, na pa kuti tulemubombela sana. Ku ca kumwenako, umutumwa Paulo alikwete icifulo icikalamba mu mipepele ya baYuda. Lelo ali-itemenwe ukufuma muli iyi mipepele pa kuti engaba umusambi wa kwa Kristu, na pa kuti engalabombela Yehova. (Gal. 1:14) Ne cafuminemo ca kuti alibombeele Yehova imilimo iisuma, kabili ali no kulateka pamo na Kristu ku muulu. Paulo talangulwike filya asalilepo ukulabombela Yehova. Na ifwe bene tatwakalanguluke nga twasalapo ukulabombela Yehova.—Belengeni Abena Filipi 3:​7, 8.

16. Finshi tulesambilila ku lyashi lya ba Julia? (Moneni ne fikope.)

¹⁶ Na ifwe bene nga ca kuti ukubombela Yehova e ko twabika pa ntanshi, Yehova akalatupaala pali ino nshita na ku ntanshi. Natulande pali nkashi Julia. Ilyo ba Julia bali abaice, baleimba sana mwi bumba lya bakemba ilya mu ceici ilyo balepepako. Baleimba bwino sana ica kuti umo uwaishibe sana ukwimba alibasambilishe pa kuti nabo bengaba bakalapashi mu kwimba. Tapakokwele ba Julia balishibikwe sana. Baleya na mu kwimba mu fikuulwa ifyaishibikwa sana. Ilyo balesambilila pa sukulu apo balesambilisha abantu ifya kwimba, umwana we sukulu munabo atendeke ukubebako pali Lesa kabili abalondolwelele ukuti ishina lya kwa Lesa ni Yehova. Tapapitile ne nshita iikalamba ba Julia batendeke ukusambilila Baibo imiku ibili mu mulungu. Mu kupita kwa nshita basalilepo ukubika amano ku kubombela Yehova ukucila ukubika amano ku kwimba inyimbo. Calibakosele ukusalapo ukucita ifi. Batile, “Abengi balenjeba ukuti nalilufyenye filya nalekele ukwimba pa kuti ningalabombela Yehova. Lelo nalefwaya ukuti ndebombela sana Yehova.” Nomba bomfwa shani ifi basalilepo ukulabombela Yehova apo nomba napapita ne myaka ukucila pali 30? Balandile abati: “Nalikwata umutende kabili nalicetekela ukuti ku ntanshi Yehova akampeela fyonse ifyo umutima wandi ufwaya.”—Amalu. 145:16.

TWALILILENI UKUBOMBELA YEHOVA

17. Bushe ifi tuleikala mu nshiku sha kulekelesha, fyakuma shani abasalapo ukubombela Lesa na bashilasalapo ukumubombela?

¹⁷ Cino calo cili mupepi no kupwa. Umutumwa Paulo alembele ati: “Pantu kushele fye ‘akashita akanono,’ ninshi ‘uuleisa afika kabili takokole.’” (Heb. 10:37) Finshi tusambilila kuli aya mashiwi? Tusambililako ukuti inshita iisheleko iya kuti abantu basalepo ukulabombela Yehova inono. (1 Kor. 7:29) Na kabili nga ca kuti twalisalapo kale ukulabombela Yehova, twalishiba ukuti nangu ca kuti tukalakwata amafya ayo tufwile ukulashipikisha, aya mafya ya pa “kashita fye akanono.”

18. Finshi Yesu na Yehova bafwaya tulecita?

¹⁸ Yesu akoseleshe abantu ukuti balingile ukuba abasambi bakwe kabili balingile ukutwalilila ukuba abasambi bakwe. (Mat. 16:24) E ico nga ca kuti twalibombela Yehova pa myaka iingi tatufwile ukunenuka. Tufwile ukuibikilishako pa kuti twingatwalilila ukubombela Yehova. Kwena calikosa ukutwalilila ukubombela Yehova, lelo tulaba ne nsansa kabili Yehova akulatupaala!—Amalu. 35:27.

19. Finshi tulesambilila ku lyashi lya kwa Gene?

¹⁹ Bamo batontonkanya ukuti ababombela Yehova balaipusula ifintu ifingi. Nga ca kuti muli bacaice, bushe na imwe mumona ukuti mulaipusula ifintu fimo pa mulandu wa kuti mulabombela Yehova? Munyinefwe wacaice Gene alandile ati: “Nalemona kwati nshakwete ubuntungwa pa mulandu wa kuti nalebombela Yehova. Nalemona kwati abacaice abo nalekula nabo baleipakisha ukuya ku maparte, ukwishishanya, nelyo ukuteya ifyangalo fya pa kompyuta umwaba ubunkalwe, nomba ine nalepoosa inshita iikalamba mu kulongana na mu kubila imbila nsuma.” Bushe ifi Gene aletontonkanya fyalengele alacita finshi? Alandile ukuti, “Na ine natendeke ukulacita ifintu ifyabipa ifyo abanandi balecita, kabili naleumfwa bwino nga nacita ifi. Lelo nshalekwata insansa sha cine cine. Natendeke ukulatontonkanya pa busuma bwaba mu kulakonka ifyo Baibo ilanda kabili nasalilepo ukulabombela Yehova no mutima wandi onse. Ukutula ilya nshita nalimona ifyo Yehova asuka amapepo yandi yonse.”

20. Cinshi tulingile ukutwalilila ukulacita?

²⁰ Kemba wa malumbo aimbiile Yehova ati: “Wa nsansa uo musala kabili uo mulenga apalama kuli imwe, pa kuti aleikala mu mansa shenu.” (Amalu. 65:4) E ico natutwalilile ukulabombela Yehova nga filya Yoshua alandile. Atile: “Lelo ine na ba mu ng’anda yandi twakulabombela Yehova.”—Yosh. 24:15.